《台文通訊精選》

 | | | 轉寄

后宅ê故事

作者 施澄匯 2009.04.18

我出世tī鹿港，阮tau khiā tī tsit-má鹿港市á ê西旁。阮tuà ê角頭號作「后宅」，因為古早阮ê祖先是uì泉州ê｢后宅」這個所在過--來，所以kā這個地名tsah--過-來。后宅tuà ê人大多數是姓施--ê，到tsit-má猶是，所以厝邊頭尾攏是親tsiâⁿ抑是親堂á，會使講是鹿港姓施ê大本營。Tī阮厝邊有一間「潤澤宮」，阮攏叫作「王爺廳」，服侍「大房頭十三王爺」，這尊神明是阮祖先古早分靈過--來-ê，所以這間廟是阮后宅ê信仰中心，也就是阮ê角頭廟。

古早后宅uá舊港溝(舊鹿港溪)，是碼頭區，有tsiâⁿ tsē ê｢苦力」tuà tī tsia，「苦力」就是tsit-má ê碼頭工人，攏是用khuì力teh拚命--ê。阮阿公hit陣就是teh kā人擔水thàn錢ê苦力。早期ê碼頭安全設施無好，三不五時就有苦力teh作khang-khuè ê時，無注意pua̍h落去水--裡淹--死。為著希望大家平安，而且超渡tsia ê死--去ê靈魂，就tī港溝kîⁿ khiā一tè｢庵嘛呢叭爾牛」ê佛號碑，tsit-má這tè碑猶koh有tī--leh。

除了知影舊港溝有苦力pua̍h落去死以外，我也聽講古早有一團樂團(可能是南管樂團)坐船á beh來鹿港表演，tú著風颱大水，結果規團ê人suah攏淹--死。了後聽講若是有透風落雨ê暗時，就會聽著港溝khîⁿ hit旁有樂團teh演奏ê聲。莫怪我細漢ê時，阮阿媽攏m̄ hō͘我tī暗時行uì hit旁--去。

雖然這條舊港溝tī 1898年，因為hō͘沙á that kah船á駛buē入--來，日本人kā伊「截彎取直」，漸漸這個所在就變作草埔á。這三、四十年來已經起tsiâⁿ tsē huàn-厝大樓，變作市街，完全看buē出一百外年前是一個港溝碼頭ê所在。不而過，到tsit-má阮后宅ê人猶會tī每年舊曆7月25這工，tshuân物件tī這tè佛號碑頭前普渡，祭拜早期tī這旁淹--死ê好兄弟á。

Ta̍k年7月25普阿彌陀(佛號碑另外名)ê時，我就會想起這個過去ê代誌kap傳說。我希望用「鹿港苦力」ê精神，用筆kap紙、相機kap錄影機kā我tuà ê這個所在ê種種詳細記錄--落-來，留hō͘後代ê kiáⁿ孫知影。