《台文通訊精選》

 | | | 轉寄

門內門外

作者 阿秀 2006.07.16

Tī我讀冊ê時，國民黨tī台灣推行ê國語政策已經真成功，特別我讀ê攏是女子學校，查某gín-á比較khah乖，khah聽話。「北京話」tī有心ê教育政策下面成做真普遍ê語言，用來讀冊、思考、寫文章。時間一下久，tī日常生活雖然講台灣話，但是若beh講道理，就ài用「國語」才講會清楚，我ê阿母bat真受氣講「你講ê話，nái哩哩囉囉親像外省gín-á?」這種情形，出國了後mā無改變。88年有一擺去普林斯頓拜訪一位同鄉，每一擺我開嘴講話，主人就掠我金金看，後來伊擋bē tiâu，問我「你是按怎攏講北京話？」tse是我第一擺聽著我講ê話叫做「北京話 」。

90年來多倫多，因為tī台語教會出入，四周圍ê同鄉講台語真自然，有時我mā有機會表達意見，才發覺家己ê台語講bē liàn-tńg。雖然台語是母語，用tī日常生活，但是長期用北京話思考寫文章，beh改變思考ê方式真困難。

95年多倫多台文班成立，朋友相招作伙讀台文。Hit時陣台文是啥物，我並無真清楚，聯誼ê心情大過讀冊。但是經過一段時間，我確實tī台文班內讀著真tsē 好文章，有ê真趣味，有ê hō͘人感動流目屎，我才漸漸了解台文ê重要性，分出台文kap中文ê無仝，有ê台語一定ài用台文表達才十分有意思，若換做中文就走精去。台文詩幼秀koh有感情，kap中文詩ê氣勢差別真tsē。台語原本就是一個成熟ê語言，會tàng用做真闊ê文學創造。

就按呢，我經過台文班讀kap寫ê訓練，台語ná講ná順。最近有時明明是講北京話ê場合，台灣話mā無張無持講出來，我才發覺tī不知不覺中，台語已經是我思考ê語言。

最近有人送我真tsē有聲ê冊，就是演講ê錄音帶。有一khûn是鄉土文學作家陳映真先生ê｢台灣社會與文化」。原來我抱真大ê趣味beh來聽這khûn錄音帶，無想著一開始就聽伊講「有一些台獨派的朋友，主張講台灣話，用台灣話來寫文章、寫詩，我不嘲笑這些人，只是語言要成為文學語言，需要百年，甚至二百年以上的時間。搞台語的人，對漢語不清楚，漢語一字一拼音字表示不清楚」。伊koh講「國民政府為什麼選用北京話做為國語？是為了我們民族的前途，因為北方語系有較多的文學作品。」真可惜！一位台灣籍ê鄉土作家對咱家己ê語言無清楚，對家己ê土地無認同，啥物是民族ê前途？家己是啥物人，家己知。若是一般百姓無清楚，就無要緊，上害是有名ê作家有這款錯誤ê觀念，koh 製造錄音帶，四界流傳。

幾冬前，另外一位台籍ê作家，陳若曦女士來多倫多演講，tī伊ê簡介內底提起「對目前大勢所趨的本土化運動，獨獨對台語寫作不以為然，主張用『台灣國語』才是康莊大道」。我會tàng了解長期用中文寫文章ê人對台文ê困難，我知影台文對中文作家bē tàng期待，因為in攏khiā tī門腳口。只是我mā相信，台灣beh成做一個有信心ê國家，語言是伊ê第一步。

我有一位讀物理ê朋友，用伊ê觀點講「語言是感情ê載波（carrier），kan-na母語會得kap靈魂，產生natural frequency ê共振。所以心理治療需要用母語，緊急中所使用ê語言也是母語」。 母語是咱本來有ê物件，我相信真tsē人kap我相仝，kā伊放sak去。今á日，因為我有機會學台語文，才kā伊khioh轉來，恁若iáu khiā tī門口，歡迎恁行入來，tī台文ê世界，恁會tshuē著另外一片新ê天地。