《台文通訊精選》

 | | | 轉寄

孝女ê願望

作者 阿粉姐 2006.10.08

美子小姐雖然真了解老母ê疼，但是對老母表現母疼ê方式，感覺真疑問。

親像講，食飯ê時，老母總是家己食昨昏ê tshìng飯，khioh gín-á食tshun ê菜，koh時常講：「愛食ê無食，愛穿ê無穿，才kā恁飼大漢。」

美子ê想法是老人也是人，應該享受人ê價值，老母完全bē記得家己ê精神，gín-á感覺艱苦心，按呢犧牲家己ê享受，gín-á絕對bē-tàng感覺一sut á歡喜kap幸福。

這款想法，若直接kā老母講，koh驚會傷著老人ê心，美子就想著用讀者投書ê方式來表達心聲。

幾日後，某一個報紙刊出一篇用假名寫ê讀者投書，按呢寫：

「老母儉腸neh肚，攏是ǹg望hō͘ gín-á了解，但是這款自我克苦ê古早作風，卻bē hō͘ gín-á感覺家己是生活tī一個幸福ê樂園裡，試想，將家己ê快樂建立tī 老母自我犧牲ê頂面，做子女ê 會滿心歡喜？子女敢bē 感覺心疼？koh老母也是人，tio̍h親像按呢來生活！我相信按呢才是母kiáⁿ間真正ê幸福。」

報紙刊出來了後，讀者有真tsē反應，正反兩面ê意見攏繼續刊tī 報紙，當然美子ê老母也有看著。

「現在ê gín-á敢tsiâⁿ實是用這款心情來接受老母ê心意？你ê看法按怎？」

「母親，我完全贊成投書者ê意見，我認為有比自我犧牲hit種消極ê幸福koh khah可貴ê積極ê幸福。」