《台文通訊精選》

 | | | 轉寄

Embro ê馬偕博士

作者 Wilma Welsh 2006.12.17

我真榮幸來參加今á日ê特別奉獻禮。Tī恁ê歷史上，有一個真大ê榮耀，tō是上帝呼召恁ê子弟Rev. Dr. George Leslie Mackay 去Formosa，tsit-má叫做台灣ê所在做伊ê工。恁無的確m̄知影這個名tī台灣hō͘人講起juā-tsē擺，伊受台灣人juā大ê疼痛。 今á日，我beh恭喜恁教會為著伊tī台灣所做ê事工來舉行這個紀念匾奉獻禮。

台灣ê教會攏真尊敬馬偕博士。舊年ê 6月30日，tī Woodstock ê法院門口咱有為馬偕博士設立一座銅像。 Tse是淡水ê真理大學、古早叫做Oxford 學院送ê。馬偕博士是Oxford學院ê創設者。

這個Zorra 鄉ê子弟tī台灣留落來ê是啥物款ê傳奇故事leh？伊m̄-niā受hia ê基督徒ê尊敬，mā受著非基督徒ê尊敬。我會記得有一擺，我穿一領紀念馬偕過身100年ê短衫tī彰化街á teh行，衫頂面有伊ê翁á頭。一個tī店裡teh賣物件ê少年查某gín-á kí hit個像用台灣話講：「真好ê人」。伊koh講馬偕是英國人。我隨時kā伊講，馬偕是恁tsia去ê加拿大人。

George Leslie MacKay tī 1844年3月21日出世tī離這個教會無juā遠ê十號路ê所在。伊ê pē母是tuì Sutherland森林區來ê Scotland高地難民。伊是咱Zorra鄉ê教會所養成ê四十個牧師中間ê一位。伊tī美國ê Princeton kap英國ê Edinburgh大學讀神學。伊是加拿大長老教會第一位去台灣ê海外宣教師。

Bē曉半句台灣話，伊一個人tī 1872年3月初9去到台灣。伊相信伊是受著上帝ê呼召去向台灣人傳福音。伊tiāⁿ-tiāⁿ hō͘人叫做『烏鬚蕃』。

台灣這個國家自早到taⁿ攏teh苦鬥，因為伊ê人民過去受著外來ê葡萄牙人、荷蘭人、日本人kap 中國人ê 統治。Tī日本人ê統治下底，台灣人無好過。但是第二次世界大戰了後tuì中國來ê蔣介石政權，hō͘ in koh-khah艱苦。台灣人無受統治者ê看重，所以in要求in ê領導者應該ài有職位。國民黨要求in提出領導者ê名單。名單提出了後，每一個人kap in ê朋友攏無外久tō hông掠去槍殺。聽講有3萬到10萬ê台灣人tī 二二八事件(1947年2月28日) hông謀殺。有一本歷史冊提起一位加拿大傳教者ê護士Hildur Hermanson ，hit陣tī馬偕病院門口救人ê代誌。Hit個兵á m̄敢kā伊tuāⁿ槍，所以伊會tàng救人。現此時ê台灣政府已經有起一個紀念碑來紀念當時犧牲ê人。有真久ê時間，台灣ê人攏m̄敢講著這個事件。我會記得bat問一位當時是少年家ê牧師朋友。我kap伊真熟sāi，所以敢問伊這款問題。伊講伊mā bat問in老pē,m̄-koh in老pē講知影lú少lú好。這個牧師ê兄哥tī我猶tī台灣ê時，猶hō͘人關tī監牢。伊是tī讀齒科醫ê時，用英語寫一篇政府無kah意ê文章，hō͘人掠去關。台灣有真tsē政治良心犯，真tsē是少年人。猶有真tsē政治良心犯tī全世界，in攏無放棄台灣beh 獨立ê目標。In為著台灣人ê人權khiā出來。我相信這個勇氣是tuì馬偕博士hia來ê。今á日tī咱ê中間mā有一個bat hō͘人關過ê青年人beh為台灣講幾句話 (譯者註：羅益世代表台灣社團致詞)。

咱若tī這陣倒轉去看133年前，我真正ài感謝上帝kā海外宣道這個寶貴ê禮物帶去hit個島嶼。咱若聽著台灣人ê歷史kap奮鬥，咱tio̍h會想起基督教對台灣人民ê影響力。台灣有真讚ê醫療系統kap技術，有水準真kuân ê現代化教育，攏是早期基督教宣教師所開創ê。馬偕博士tī台灣北部建立真tsē基督教會，是大家所公認ê tī北台灣ê基礎。英國宣教師比伊早七年去到台灣南部傳福音。

台灣這個國家繼續teh受苦，台灣人民mā繼續teh受苦。In為著in國家ê定位teh奮鬥，對in來講，無hō͘聯合國承認是一個真痛苦ê代誌。 Tī這個國家，教會無法度m̄ tshap政治。 In知影tī國民黨政權戒嚴統治下底ê人民是按怎過日ê。因為in是基督徒tō受迫害。教會知影這種政治權力一定ài改革。我本身tō有因為是基督徒，tī戒嚴統治下痛苦kap奮鬥ê經驗。

台灣到taⁿ猶m̄是世界衛生組織ê會員，甚至連觀察員ê身份to無。但是兩年前SARS發生ê時，mā無避過台灣。

過去幾冬來，我攏有kap加拿大ê教會團体去台灣訪問。每一擺去到淡水，我無法度無受感動。真tsē人真久以前，tō攏有聽過馬偕博士所做ê工 – 阮khiā tī hia，koh hō͘阮想起這種忠實宣道ê工。 阮行過淡江中學ê校園，探訪馬偕博士ê墓園。基督徒行過馬偕博士墓園ê時，大家攏真恬靜。Tī這個小小ê墓園邊，有教室，有gín-á teh上課，真tsē活動，mā真吵。馬偕博士tī淡水開始伊ê事工，伊ê後生George William Mackay tī hia創設淡江中學。我相信George Leslie kap George William兩位馬偕tâi tī這個非常無îng kap真吵ê墓地，對in來講是真適當ê。

恁應該為恁ê 子弟感覺驕傲！這個人有作人應該有ê勇氣，mā有kap親像軍隊應該有ê堅忍。台灣mā為恁ê子弟感覺驕傲！

(這篇是Wilma tī 2005年2月20日tī 馬偕ê故鄉Embro ê Knox聯合教會、馬偕紀念匾奉獻禮ê演講稿，陳星旭翻譯做漢羅。Wilma tī台灣長老教會工作六冬。伊 tī 2004年退休轉來加拿大故鄉。2006年擔任加拿大基督長老教會總會議長。關於伊tī 台灣ê工作奉獻，請參考台文通訊106期 “疼台灣ê威厲心姑娘”。 )