《台文通訊精選》

 | | | 轉寄

文旦柚芳

作者 張秀滿 2006.12.31

三月轉去台灣，鄭雅怡老師邀請陳雷先生kap我去真理大學kap台語系ê學生座談。我雖然答應，心內想麻豆ê真理大學是beh按怎去？真tú好，tī成功大學ê海內外台文工作座談會，tú著真理大學ê校牧也是台語系ê系主任黃輝爵牧師，伊講你坐電車來『隆田』，我來車頭接你。

去台南車頭買車票，發現這個我熟sāi ê火車頭，已經加真現代化，買車票mā無需要排列，kap台北ê捷運仝款，錢lok入去，票tō家己走出來。電車？原來tō是古早ê普通車。

電車經過『大橋』、『永康』、『新市』、『善化』、『拔林』，一站過一站，我ê記池mā一層過一層。讀高中ê時，通學生in ta̍k日tō是坐這款ê普通車，tuì無仝ê所在趕來台南讀冊。Hit陣真欣羨in m̄免參加升降旗，有時mā聽in講一kuá車頂ê心適代，通車雖然辛苦，mā有in ê甜甘。記持tō猶bē回倒轉來，『隆田』已經到ah！

落車頭，隨感受著這個所在ê樸實，kap都市比起來加真開闊，草地厝kap現代ê西方建築lām做伙，tse是現代ê台灣莊腳。

黃牧師駛車來接我，伊先tshuā我去農會ê福利社食碗粿。食了，阮tō向北勢寮ê真理大學駛。車駛到半路，黃牧師突然kā車停落來。伊講你kā窗á ká落來，鼻看有啥物味？我kā窗á ká落來，一陣一陣ê清芳，一直入來。這款ê芳相信任何名牌ê芳水攏tuè bē著，是啥物ná tsiah-nih芳？黃牧師講tse是柚á花ê芳味，tsit-má是柚á開花ê季節。我心內想，若準我身邊有一支kan-á，敢會tàng kā這個芳té轉來Toronto？

車駛過柚á園，koh看著ê是一片一片ê水窟á。有一陣（tīn)一陣ê白鵝，tī水面頂泅來泅去，這個畫面ê後壁有幾nā棟新式ê建築，tō是真理大學麻豆分校。

Kap台語系ê學生座談真趣味，in問為啥物恁beh辦『台文通訊』？寫台文ê經過？當in知影陳雷是『麻豆』出身ê台文作家，真受鼓勵。問陳雷真理大學這片地過去是啥物？陳雷回答講是灌肚peh á、掠蟋蟀á ê好所在。

座談會了，黃牧師tshuā阮參觀真理大學ê『台灣文學資料館』。這個文學館是1997年tī『淡水』校區設立，2002年才遷來『麻豆』。伊ê外表雖然無『國家台灣文學館』ê suí，m̄-koh內容真豐富。有三個展示室，第一展示室，典藏作家ê手稿kap原跡。第二展示室典藏日本時代ê文獻，包括完整ê戰前雜誌『文藝台灣』、『民俗台灣』，kap一kuá重要ê日文著作。第三展示室是民國時代ê文獻，包括作家ê作品、文藝雜誌、每一屆『台灣文學牛津獎』得主ê專櫃、鄉土文學、母語刊物，有『台文通訊』一~十二期ê合訂本，亦有陳雷ê冊。另外koh有西川滿先生、郭榮桔先生、楊逸舟先生ê紀念文庫kap吳進義先生、張良澤先生個人收集ê文庫。In亦定期出版『台灣文學評論季刊』。

無來參觀，m̄知影真理大學ê文學館有tsiah-nih豐富ê收藏。看了，hō͘阮真感動，beh離開進前，文學館ê負責人the̍h毛筆kap紙來，希望阮會tàng留一句話hō͘ in。陳雷先生寫『真理大學台灣文學資料館文旦柚芳』。