《台文通訊精選》

 | | | 轉寄

若是時間會倒轉去

作者 陳雷 2006.03.12

舊年我ê老母tī台北過身了，有一包身軀邊ê物件留落來。The̍h轉來加拿大了後，一直無去tín動。最近tháu開來看，內面一kuá舊物件kap相片、一張五十kho͘ ê美金、kap一張美國ê批，就是我二十七年前出國ê時，來到美國了後寫轉去ê第一張批。Tsit-má讀起來，suah 增加了失去親人ê空虛。一時非常ǹg望，若是時間會tàng koh倒轉去二十七年，設使我有機會koh再來寫這張批，內容大概也是相像，總是我會用台語寫，才會khah順嘴，意思khah真切。所以我就kā這張批按頭到尾用台灣話重寫一擺，算作是重寄hō͘伊一封慢了二十七年ê批：

「阿母，我已經平安來到美國，飛機起飛ê時，土腳頂ê物件漸漸變無去，我知影恁tī機場內面，也一定是目睭金金看我ê飛機飛無去。幾禮拜以來為著無îng出國ê倉pōng,變做了一時ê和平，雄雄體覺著離別ê現實，像緊流ê大水hit款，我家己問家己，……是為著啥物？……Tī tang時才會koh轉來？……。坐tī隔壁ê美國阿婆問我一句話， 我kā伊講：「I am free now !」我ê英語伊m̄知聽有無？若是聽有，我ê意思伊m̄知知影無？

我tuà tī宿舍，家己一間房間。窗á口看出去，對面遠遠是一片闊闊半山ê楓樹，葉á已經開始teh變色，有ê金ê,有ê紅ê｡西照日ê時，景緻kap咱厝裡hit本雜誌介紹ê美國仝款仝款，tsia就是美國ê密西根。

我三頓tī病院ê餐廳食，ta̍k日lóng食雞。病院驚我新來欠錢用，先發一個月ê薪水。其實tuà tī宿舍，無啥費用。也無欠錢。

Tú來iáu未有朋友也無遇著熟悉ê人。Tī tsia雖然孤單，但是這自由ê空氣hō͘我心情真和平。我日日夜夜思念恁，親像恁teh思念我按呢。

這張批內面有一張美金五十kho͘，hō͘恁作費用。阿林、阿文khah tsia̍p寫批來聯絡。