《台文通訊精選》

 | | | 轉寄

灌溉母語ê田園

作者 李勤岸 2007.06.24

阮某請我lim一杯咖啡，叫我ê筆借伊，kā寫伊教台語ê經驗hō͘大家做參考。

本文…

我tī市內大漢，m̄ bat做過sit 、m̄ bat種過田，不時聽阮翁講in莊腳人播稻á、搓草juā辛勞、ak水灌溉juā艱苦，聽bóng聽，無法度體會。一直到我有機會pih手ńg 、捲褲腳，潦落去田裡，家己tī日頭腳做sit，我才完全瞭解伊ê講法。

二冬前，有一個機會，我tī美國ê大學教一冬台語。

教台語ê教授開二班台語課，初級班kap中級班。伊愛我做伊ê助教，負責初級班ê教學。中級班有三個學生，攏是阿tok á ，以前就有修過教授ê課。初級班有六個人，攏m̄ bat修過教授ê台語課。有一個日本人，是博士班ê學生，bat去台灣留學過，加減會曉講台語，伊學習真認真。Tshun ê攏是台灣來ê留學生，tī台灣專科學校畢業，來美國讀大學部。In koh bē bái，無像台灣tsit-má ê少年學生kan-na會曉講華語，in ê台語講了猶會使。不過，in修課ê動機主要是beh來the̍h營養學分，因為in ê功課真重，ài修真tsē課，台語已經會曉講，想講修這門課上輕可。

教授tī前幾節課，kā重要ê概論lecture了後，就hō͘我負責實際ê操練工作。醫生看病看了，注射ê khang-khuè mā是交hō͘護士去處理。

按呢我就開始體會做sit人ê辛苦。

有ê草是真蠻皮，無hiah–ni̍h好處理，m̄是由在你搓。In本底想beh輕鬆來the̍h學分，想講tshìn–tshìn-tshái-tshái三學分tio̍h曲腳lián嘴鬚kā lián起來。

M̄-koh我感覺bē使害人開錢來美國讀冊無學著物件，而且我koh是第一遍做老師，家己真緊張，用真tsē時間準備，上課前一工規暝攏睏bē去。

田潦落去a，當然ài kā草搓hō͘清氣，kā水潑hō͘滿田，hō͘稻á有夠營養thang大欉。In kā我講是beh來the̍h營養學分，我想就是這個意思，期待我hō͘ in真tsē營養份thang大欉lah！

教授講：「羅馬字是學台語上基本ê。」

In感覺學羅馬字是加ê，in講羅馬字是用來教bē曉講台語ê外國人，in已經會曉講台語，根本無需要學羅馬字。

我hō͘ in講kah m̄知beh按怎應。

In koh講羅馬字是西方羅馬帝國ê人leh用ê字，是外國ê物件，咱m̄免用，咱用漢字tō好。

我走去教授hia討救兵，教授叫我講故事hō͘ in聽：

「羅馬字本底是西方羅馬帝國征服世界ê時，tī中東發現ê文字，發現真好用就用來征服世界。果然規世界hō͘伊征服了了，tshun台灣猶未征服，就派兵來攻打台灣。想bē到，去hō͘台灣ê原住民拍敗，羅馬帝國就用羅馬字進貢hō͘台灣，所以咱tsit-má才有羅馬字thang用。」

學生聽了笑kah東倒西歪，講tse kap in讀ê歷史真無仝，概成是臭彈，m̄ koh真趣味。

後來我發現需要加強in ê台灣意識，若有台灣人ê意識就khah要緊家己ê語言文字。我就開始教in讀真有台灣精神ê台語詩，koh hō͘ in 讀真有台灣意識ê 陳雷ê小說，發現in愈來愈有趣味，愈來愈愛上台語課。

我koh招in參我下晝時tī學校ê餐廳lim咖啡，做伙開講，講一kuá台灣故鄉ê代誌。

咖啡lim了suah tiâu leh。大家時間到就準時來。聽講咖啡mā真有營養，mā是西方人進貢ê 。我發現in這區台語班ê田，用咖啡灌溉了後，稻á一暝大一寸。

教一冬台語，我ê心得是：台灣人母語這區田，無愛hō͘伊拋荒去，ài用心種作，用台灣心去犁田。另外，用咖啡灌溉mā真有效！