《台文通訊精選》

 | | | 轉寄

春天ê花

作者 蕭莉莉 2007.07.28

我tú tuì台灣過來，台灣tsit-má是春天。陽明山規山ê花開kah足suí，我ê媽媽選tī這個日子來離開，相信是上帝替伊選ê日子，媽媽真親像春天。媽媽ê笑聲是春天ê溪水，tsiah-ni̍h開朗、樂觀，hō͘人聽了真歡喜。媽媽ê歌聲是春天ê鳥á，規日teh唱，唱無停，唱kah真快樂。媽媽ê感情tsiah-ni̍h豐富，不管是對人抑是做代誌，攏是用伊全心全意ê感情，親像春天ê花蕊，用in全部ê性命teh開花。

人講一個藝術家一定ài有豐富ê感情。媽媽就是一個藝術家，伊tuì台北第三高女畢業了後，就去日本東京體育音樂大學讀冊。伊tī大學四年內，非常拍拚。伊tuì m̄-bat摸過琴，學到會曉彈世界名曲。媽媽真愛跳舞，大姨mā講，媽媽ê國際標準舞有職業ê水準。伊上大ê天份是編舞劇。有時為著編舞劇，規日聽音樂，靈感一來，半暝peh起來，比看māi趕緊寫落來。媽媽編ê舞劇，真現代，有創意，有藝術ê眼光。

伊大學畢業了後，去京都ê女子學院做講師，後來轉來台灣，tī長榮女中教冊。Hit時長榮女中英國籍ê女校長，真欣賞媽媽，推薦伊去英國進修，因為阿媽保守反對才去無成。Tī長榮女中教冊hit段日子，媽媽有真tsē好朋友。伊kap後來長榮中學ê校長劉子安先生，台大ê張采湘教授，koh一kuá當時ê少年人常常做伙peh山，in去peh幾nā擺玉山。Hit時ê玉山猶無路，in tō家己開路、peh山、hip相。轉來了後、家己設暗房，洗相片。In ê生活充滿文化kap藝術。

對一個愛藝術ê人，灶腳ê代誌tō真食力。媽媽bat對我講，伊做一個家庭主婦實在真無彩。爸爸對媽媽ê疼，媽媽mā真清楚。伊做一個主婦比別人koh khah拍拚。媽媽生阮ê時，因為年歲khah大，阮三個gín-á體質攏無好，媽媽tshuā阮比別人加倍辛苦，但是伊教阮真tsē道理。細漢ê時爸爸不時出差，無tī厝，伊kā阮講，恁第一ài感謝ê是上帝，第二ài感謝是爸爸ê辛苦。因為按呢，結婚了後，我會曉體貼尊重我ê翁婿。媽媽kap我ê阿嬸、阿姑，感情攏真好，親像親姊妹。細漢阮認為是當然，大漢才知影beh做到tsia真無簡單。

媽媽是有福氣ê人，伊上大ê福氣就是認bat上帝，也因為按呢，伊bē欣羨這個世界ê奢花。伊食bái，穿衫過日子攏真簡單。Tī新竹ê時，爸爸有參加扶輪社。Hit時伊kap許金德先生、嚴家淦先生，koh一kuá有名人士ê夫人，大家攏有鬥陣。Hit時陣新竹女中ê女校長曹金英女士bat講，tī tsiah tsē夫人內底m̄-bat掛珠寶ê，只有伊kap蕭局長夫人。媽媽無欣羨這個世界ê奢花，tī基督ê路，伊行了真歡喜。

媽媽第二大ê福氣是認bat咱多倫多教會ê兄弟姊妹。這段日子，不管透風落雪，不管路遠，恁攏不時去探訪伊，飼伊食飯，kā伊安慰，m̄驚麻煩。恁做tī我媽媽身軀頂ê，上帝攏會記念恁。媽媽帶著大家ê疼去上帝ê厝，伊會真平安。

我tī tsia介紹我ê媽媽，我感覺我是一個真幸福ê gín-á。｡