《台文通訊精選》

 | | | 轉寄

向鮭魚致敬

作者 秀美 2007.11.04

B.C. (英屬哥倫比亞) 省若是到十月，攏會引起tsē tsē人去hia觀賞鮭 (kuê) 魚ê迴游，今年(1998) tú好是Sockeye Salmon每四年大迴游ê時陣。1990年亞當斯河 (Adams River) 破記錄大約有三百萬尾Sockeye Salmon游轉去故鄉產卵。1994年因為商業漁船亂掠魚kap水土ê破壞，只有50萬尾ê鮭魚成功轉去到in ê出生ê所在，所以今年B.C.省政府嚴禁超量捕掠這類ê魚種。10月17日阮去到亞當斯河ê時，根據漁業專員ê估計，已經大約有150萬尾魚，kā清清ê細條溪染紅ah，in也繼續tī hia生產in ê第二代。漁業是B.C.省森林以外排第二位ê產業。美國kap加拿大政府有開銷真大ê經費，去研究鮭魚ê生態，按怎改善河流ê水質(比如廢水處理，拓寬急流ê所在做人工通道，hō͘魚á會tàng順利通過難關，轉去故鄉) 增加鮭魚ê產量，提供美加兩國市場ê消費。

太平洋ê鮭魚攏總有六種，除了櫻花鮭魚kan-taⁿ tī亞洲南太平洋看會著以外，其他五種是Tsum Salmon、Sockeye Salmon、Coho Salmon、Pink Salmon kap Tsinook Salmon。Pink Salmon每兩年(單年)迴游，所以今年菲沙河口ê魚群tō無看著in ê陣容。Tsum kap Pink兩種鮭魚tī第二年ê春天冰溶(iûⁿ)了後，tō直接向大海siû。其他三種鮭魚tī五月左右攪(kâ )群結隊，tī烏暗暝向大湖siû，閃過鳥類、魚類ê捕食kap攻擊，tī湖裡生長一年了後，才siû去北太平洋生活二至五年。鮭魚ê體內有特殊功能ê細胞，會tàng平衡鹽份kap水份，hō͘魚á會tàng自由出入淡水kap海洋。 今年是Sockeye四年ê大迴游，in是商業kap漁業所重視ê魚類，價值佔市場總價值ê三分之二。因為Sockeye ê肉深紅結實，koh真幼軟，滋味真好，通常市面上ê Smoke Salmon tō是這類ê魚製成ê，是全世界ê人真愛ê高級食品。

今年台加文化協會主辦ê亞當斯河鮭魚大迴游生態旅遊，一暝兩日，由環保生態專家林博士領隊，沿路做詳細ê解說。順著鮭魚迴遊ê河流(菲沙河kap伊ê支流湯普斯河到小支流亞當斯) 向頂面駛去，陪in轉去故鄉，意義真大。Tī ba-suh頂頭向下面看，看著山谷中間水湧真強ê河水，koh khah深深體會魚á一路所經歷ê苦難，in m̄驚困難向頂頭siû去，戰嬴急流，跳過二、三尺ê小瀑布，千辛萬苦，轉去到in ê出生地，生產第二代，犧牲自我，完成使命，是非常奇妙ê自然奇景。後擺若想beh觀賞Sockeye攪群結隊，kā溪水染紅ê景色，tio̍h-ài等到公元2002年ah。

這擺專工uì多倫多去溫哥華觀賞這個hō͘人感嘆ê大自然奇景，hō͘我感觸真深。鮭魚ê輪迴生命，落葉歸根，對家鄉bē-tàng分割ê感情，宇宙生命再生ê偉大kap奧妙，按一尾鮭魚ê生kap死，hō͘我體會著西藏生死書內有一段佛陀ê話「咱ê存在親像秋天ê雲hiah-nih短，看著眾生ê生死，親像是看著舞步，生命ê時光親像是天頂ê sih-nà，ná像急流衝落山脊(tsiah)，緊緊流失」。咱人有一日總是會死，m̄-koh m̄知影tang時會死，或是按怎死？咱希望會tàng活真久，所以對死亡非常驚惶。看著完成責任的鮭魚，成千成萬ê死屍，散佈tī溪水ê兩岸kap河流裡。In短短四年ê生命，無一點á驚惶，聽著故鄉呼叫的聲，一群一群，一隊一隊，uì二、三千海哩ê外海，趕來到菲沙河口，koh再向kuân逆(gi̍k)游，轉去到亞當斯河，大約有四百九十公里，in無怨無悔，行入傳宗接代kap死亡ê不歸路，遵照幾萬年in祖先仝款ê腳步，壯烈來結束kap奉獻in寶貴的生命。

菲沙河四旁有九百外條大大細細ê河kap溪，亞當斯河是其中之一，是Sockeye ê大本營。四年了成熟ê魚á，in身軀內ê某種器官hō͘ in信息，tī真正確ê仝一個時間，真有秩序，集合tī菲沙河口，快快樂樂行向歸鄉ê路。仝一條支流ê魚á，一群一群集合，bē混亂去，一梯次，一梯次迴游轉去。

成熟ê鮭魚tī海洋裡全身是銀白色，腳脊 phiaⁿ是藍綠色。Siû泅入菲沙河了後，in開始禁食，kan-taⁿ用身軀內ê油質kap蛋白質，來維持每日所需要ê能量kap體力。In暝日趕路，每日大約需要siû 25公里，ài 18日才會siû到目的地。In進入溪水了後，皮膚會起變化，變kah真厚koh真粗，色tì 變做血紅，頭殼變做綠色。公ê魚骨骼會起大變化，腳脊phiaⁿ ê部份會thó͘出來，嘴變做鉤á形，嘴齒變kah真尖，以後會變做是攻擊其他公魚ê魚器。母ê魚骨骼並無juā大ê變化，因為腹肚內有成千ê魚卵，變kah真肥，只有Sockeye ê皮膚變做血紅色。In一路經歷急流，hō͘石頭割kah規身軀攏是傷，頭破血流，每擺渡過一個急流，in會規陣 tī靜靜ê水邊休息，恢復體力了後，才koh再向前siû去， 一心一意只有想beh轉去故鄉。in有真敏感ê鼻孔，會tàng辨認水中傳來ê故鄉ê植物、微生物、野草ê混合味，正確tshuē著出生ê河道。

當成千成萬ê Sockeye來到水清安靜ê亞當斯河，母魚開始tshuē適合產卵ê所在，公魚會tiàm邊a守護，並且kā 其他ê公魚趕走，母魚會用身軀kā細塊石頭sak開，koh再用強koh有力ê尾挖一個phiat á形ê窟á，一面搖尾á，一面tī窟á內生卵，公魚隨時tī卵頂放精，母魚通常會做幾個窟，才會kā卵pàng完，然後in會真小心kā石頭e轉去pàng過卵ê窟頂，來保護tsia ê受精卵。鮭魚完成生卵了後，通常是母魚先死，接落來公魚也會接續死去。河裡kap兩旁ê魚屍，變做河裡其他魚類ê食品，成千ê鷹鳥mā tī空中天頂飛，等待拾食tsia ê死屍，暗時其他ê動物也會來分食iā 散tī 兩岸ê魚肉。鮭魚就按呢壯烈結束inê 一生。in 肉体ê結束卻是另外一個活力生命ê開始，一切攏是hiah-nih奇妙，koh是一個謎，只有感嘆宇宙偉大無形ê力量ah。

亞當斯河tī十一月中koh再恢復過去ê平靜，大自然tī冰雪am-khàm下睏去，m̄-koh另外一個生命卻是恬恬tī石縫內開始ah。第二年ê五月，親像pín針hiah-nih大ê細隻魚，tī暗暝suá去附近ê大湖(Shuswap Lake)裡生活一年，大約tī一歲半，in會離開淡水湖，順著in父母siû轉來ê河道游入太平洋，tī hia 渡過二年ê海洋生活。根據B.C.漁業局ê統計，每一隻母魚會tàng生產四千粒卵，成功受精ê大約有800粒，泅入湖中生長ê只有400尾細隻魚，成功泅去海洋ê kan-taⁿ tshun 200尾，四年後成功轉來到菲沙河口ê只有十尾，八尾tī河口hō͘商業魚船掠去，最後只有tshun二尾會tàng順利轉去到出生地，產卵留傳inê後代。

鮭魚tī短短ê生命週期，m̄驚千山萬水路途ê遙遠，勇敢向前，無失志，m̄驚一切ê困難，抱著一般人對故鄉ê熱情，辛辛苦苦留傳後代，無怨無恨，壯烈來死，看了hō͘人感動koh感傷。希望tī四年後ê十月，當in成熟回鄉，順著菲沙河迴游，開始in生命最後ê旅程ê時，會有koh khah tsē ê人來亞當斯河，in ê故鄉，kāin致人類最高ê敬意！！