《宋澤萊新著《天路拾穗》台譯版》

 | | | 轉寄

第一部：稱義得救_主題5：用《使徒信經》建立老步定ê信仰根基

作者 宋澤萊 2026.02.01

第一部 稱義得救


主題5：用《使徒信經》建立老步定ê信仰根基

咱往往hông問to̍h「án怎信？」Ánne ê問題，有時咱to̍h hông問kah bē曉回答，一時間竟然m̄知tio̍h án怎回答。

真tsē有名ê傳道人大多數對「信」tsit項tāitsì lóng採用霧霧無明ê態度，bē giàn明確表示。因為信徒有可能是因為好奇心ê催逼tsiah來信基督教；á是因為受tio̍h忽然間ê靈光閃sih來信基督教；á是親目看tio̍h他人ê神跡來信基督教；á是是因為kakī ê病症忽然hō͘ 耶穌醫好來信基督教……等等，總講一句to̍h是五花十色。Tī tsitê狀況下，若是hō͘初信者一个硬性規定，ánne to̍h kiámtshái ē kā hit位信徒嚇驚tio̍h，suah無達tio̍h留tiâu信徒ê目的à。

就ánne有人to̍h講：「信to̍h是信上主。」Á是講：「信to̍h是信《聖經》。」了後to̍h講kah真廣泛，非常霧霧無明。總講一句，kahná是《聖經》內面記錄ê往事á是申論ê文字lóng屬tī「信」ê範圍。就ánne，一屑á都無邊無墘，就ánne hō͘信仰ê人完全脫線去à。

其實，《聖經》內面ê文字有一大部分是屬tī「望」ê範圍；有一大部分是屬tī「疼」ê範圍，無一定都屬tī「信」tsit項tāitsì。某一kóa iáu無一定是屬tī「信望愛」tsit三个範圍，只是話仙而已；甚至有kóa是魔鬼ê烏白講，若是無辯是非，lóng總lóng信，he to̍h慘loh。

M̄koh，一个負責ê傳道者無應該四kè用扶tháⁿ信徒做考量；因為一種無夠堅定碇tauh ê信仰，tī短暫期間kiámtshái對基督徒影響無大；m̄koh長時間以後，kiámtshái ē致使伊tī靈命上無法度更新，kiámtshái信了十年、二十年，猶原kah初信者仝款，一屑á都無成長。

「信」tsit項tāitsì終其尾lóng是teh講是ētàng劃定一个範圍，甚至做成一篇文章，因為ánne加爾文tsiah特別kā信心稱做智識。譬如講「疼」tsit項tāitsì比較khah屬tī倫理實踐ê範圍是仝款。

原來咱ê信是有一定內容，m̄是一屑á都無底止ê信；mā m̄是咱想beh信啥物to̍h去信，m̄信啥物to̍h m̄信。

「信」乃是指ài咱一再斟酌、一再認同、一再確定ê意思；也to̍h是講，咱tio̍h tī信ê內容ta̍k工追問，ta̍k工tshōe求，ta̍k工確定。Ánne tsiah ē ta̍k工lóng有進步，月月lóng有進步，年年lóng有進步，終其尾達到無憢疑ê地步，tsit種信tsiah是真信！

Ánne，究竟tsitê「信ê智識內容」是啥物leh？簡單來講，siōng重要to̍h是《使徒信經》內底有關耶穌hit部分ê文字，tsitmá我kā它抄寫tī下kha：
「我信耶穌基督，上主ê獨生kiáⁿ，咱ê主；因為聖靈投胎，tùi在室女馬利亞出世；tī本丟彼拉多任內遭遇災難，被釘tī十字架頂，死去，埋葬；落陰府；第三工tùi死人中koh活；了後tsiūⁿ天，坐tī無所不能ê父上主ê正pêng；將來beh tùi hia降臨，審判活人kah死人。」

Kā tsit一kóa文字擴大開拆，to̍h是〈四福音書〉裡所有耶穌ê簡要記錄，乃是《聖經》ê siōng核心部分。Tī《信義宗信徒手冊》內底講tio̍h：信義宗有五份siōng重要ê改革家文獻，中間一份to̍h是〈馬丁路德小問答〉，〈小問答〉裡to̍h包括有《使徒信經》ê解說（註1），可見馬丁路德對《使徒信經》ê重視。加爾文寫作伊ê《基督教要義》ê計畫完全仿照《使徒信經》ê結構。《信經》既然包含四部，to̍h是：第一論父上主；第二論聖Kiáⁿ；第三論聖靈；第四論教會，所以加爾文mā kā《基督教要義》全部分做四卷，thang好kah《使徒信經》相呼應，可見《使徒信經》tī改革宗ê重要性m̄是小khóa。

尤其是內面ê耶穌部分，koh khah是咱ài特別注意ê，它乃是hō͘ 咱ta̍k工追問，ta̍k工思考，ta̍k工確信ê文字，bētàng一工遠離它。你一定tio̍h一字一句去確信它，準講有懷疑，he to̍h bēsái。

一般來講，tú信教ê人beh確信tsiahê文字是有困難，m̄koh等到你有突破hit中間ê某一kóa無法度確信ê文句，kiámtshái to̍h全部通達à。前總統李登輝bat講tio̍h伊tú信基督教ê時，to̍h無法度突破「因為聖靈懷胎，tùi在室女馬利亞出世」tsitê關口，suah停步不前，因為beh信he實在真oh，m̄koh到siōng尾，伊終其尾ētàng信à，to̍h貫通kui个基督教重要ê道理。我相信「第三工tùi死人中koh活」tsit句話mā仝款真oh信，m̄koh一旦想通，to̍h ē帶來驚人ê成果。可見tsiahê文句tú好是基督教ê入門戶碇；信了，to̍h進入基督教；m̄信，to̍h iáu是基督教ê門外漢。

所以當一个人講伊信基督教ê時，你千萬tio̍h注意伊「信啥物」，若是伊kantaⁿ信耶穌ē hō͘伊一千萬元ê新台幣，你千萬m̄thang當做伊是真信。你總是ài the̍h《使徒信經》裡ê tsiahê文字來考伊，若是伊從來lóng bē明白tsiahê內容，ánne你to̍h kā伊講伊離信基督教iáu遠leh，一定tio̍h tùi《使徒信經》開始信tsiah tio̍h。千萬m̄thang因為beh kho͘伊óa來，kā伊扶tháⁿ講伊已經真正信耶穌。假使ánne脫線去舞，你一定無法度真正拯救一條靈魂，你顛倒是teh陷害伊遠離天堂千里，終其尾無法度得救lah。

《使徒信經》既然是咱信ê開端，mā是信ê終結，你bētàng kā它輕視！ 註1：見《信義宗信徒手冊》（台北：道聲出版社，2006）頁52－53。 ──2010、08、02貼tī《基督教通訊》