《宋澤萊新著《天路拾穗》台譯版》

 | | | 轉寄

第三部：聖靈內住篇_35【題目】Koh再談聖靈內住﹝永住﹞ê方法、撇步

作者 宋澤萊 2026.11.01






35【題目】Koh再談聖靈內住﹝永住﹞ê方法、撇步


有人講，凡若信耶穌，人人lóng ētàng聖靈永住。Tsitê講法m̄ tio̍h！至少我to̍h無法度ánne。因為我比較khah笨，一定tio̍h等到信耶穌了後23年左右，聖靈tsiah內住tī我ê身軀裡。

Mā有人講，受洗了後，人人lóng ētàng聖靈永住。Tsitê講法mā m̄ tio̍h！至少我to̍h無法度ánne。我一定tio̍h等到受洗了後10幾年左右，聖靈tsiah永住tī我ê身軀裡。

Koh有人講，ētàng講方言、有異夢異象，人人lóng ētàng聖靈永住。Tsitê講法mā m̄ tio̍h！我先有異夢異象，了後koh ētàng講方言，卻一定tio̍h等到幾nā年了後，聖靈tsiah永住tī我ê身軀裡。

既然ánne，咱to̍h ài有一kóa方法，hō͘聖靈khah早永住。咱簡單來談一kóa方法：

對一个iáu行tī天路歷程頂面ê基督徒來講，考驗kah磨練是大ê。某一kóa信徒雖然已經稱義得救，m̄koh tī行為上總是bē ha̍h kakī ê意思，某一kóa犯罪ê意念kah行為猶原kahná附身ê蛆，ânân綑縛kakī。有時tī某一个大好ê ê時段，咱kahná行tī日光大道之下，感覺kakī ētàng卸落重擔，奔走tī神ê路裡；m̄koh，tī某一个無好ê ê時段，咱卻感覺無力來對抗邪惡，感覺行tī一條kah上主背離ê路途中。這是因為聖靈有時ē來臨tī信徒ê身軀頂，m̄koh有時聖靈ē koh離開ê緣故，這to̍h m̄是內﹝永﹞住 ê現象。

除了真正聖靈內﹝永﹞住外，聖靈是ē短暫離開信徒ê身軀。〈彼得前書〉4：14講：「因為上主榮光ê靈，常住 tī lín身軀頂。」所謂ê「常住」to̍h是「tiāⁿtiāⁿ tòa」，有暗示有時無停tī咱ê身軀頂。〈約翰福音〉15：5，耶穌講：「我是葡萄樹，lín是枝。Tiāⁿtiāⁿ tī我內面ê，我mā常tī伊內面，tsitê人就結果tsí tsētsē；因為離開我，lín to̍h無法度做啥物。」所謂「tiāⁿtiāⁿ tī」就暗示有時「無tī」。〈詩篇〉第五十一篇11節Tabi̍t講：「M̄thang棄sak我，hō͘我離開祢ê面；m̄thang tùi我收回祢ê聖靈。」Mā有明白表示聖靈ē離開信徒ê身軀。〈創世記〉6：3講tio̍h上主，講：「人既然屬血氣，我ê靈to̍h bē永遠tòa tī伊內面。」〈士師記〉十六章講tio̍h參孫被偷偷á剔去七條髮束了後，伊ê氣力to̍h離開伊，因為「上主已經離開伊ā！」。

當聖靈來到身軀ê時，當然咱ētàng得tio̍h上主ê幫助，kahná見戰見贏，見攻見破，咱ētàng短暫克服罪行；m̄koh一旦聖靈短暫離開，咱to̍h koh陷落去孤軍ê奮戰中，kahná陷落去湳á地，目tsiu金金看罪行，m̄知beh án怎tsiah好。

既然ánne，咱究竟tio̍h án怎tsiah好leh？He to̍h是teh受考驗kah磨練ê時，迫切ǹg望聖靈ê永住，tio̍h算tī tshun一口氣ê時，永遠lóng m̄thang bē記得有一工聖靈bē koh再離開我ê身軀，祂ē永住tī我ê身軀裡，帶來一生ê平安、喜樂，結出滿滿ê聖靈果tsí。咱ánne ânân lak tiâu ǹg望，終其尾有一工，聖靈果然to̍h永住tī我ê身軀裡à。

Ǹg望、忍耐to̍h是咱ê一種方法、撇步！

我舉一个例：Tī咱ê人生中，總有一kóa對咱有恩典ê人，in tiāⁿtiāⁿ成做咱所懷念ê對象，想起tsiahê人，咱ê心內to̍h充滿感謝kah溫暖，對世界充滿信心。M̄koh mā有bē少人是hō͘咱感覺痛恨、痛苦ê人，tsiahê人傷害我，hō͘ 我親身感受tio̍h kahná陷落tī地獄一般ê痛苦，因為tsiahê人，我就ánne失去對美好世界ê想像，我感覺世界to̍h是地獄！Tāitsì當然早to̍h經過去，m̄koh我對tsiahê人總是無法度放bē記得。特別是hit kóa傷害過我ê人，tī我ê性命中猶原有極大ê勢力，一想起in，我to̍h痛苦kah bē堪得。基督徒ê我，當然ētàng靠tio̍h耶穌ê力量，原諒hit kóa傷害過我ê人，甚至tētàng像耶穌所講ê，原諒in 70个7 pái；m̄koh m̄ thang bē記得，雖bóng tī原諒in ê時，我暫時感覺輕鬆、解脫；總是我mā知影，in iáu是ē tńg來我ê腦海。我tio̍h算tsitmá無beh想in，幾工了後iáu是ē想tio̍h；tio̍h算日時頭lóng無想tio̍h in，做夢mā ē夢tio̍h。Hit時，我koh陷落去仇恨kah懊惱ê中間，我苦bē得thang kā in thâi死！我總是反來反去，原諒koh懷恨，懷恨koh原諒，無完結ê一工。〈彼得後書〉2：22講：「豬洗清氣à koh tńg去nòa lō͘kô͘moâi 。」Tsit句話當然是罵人ê話，m̄koh，對信耶穌ê我來講，卻是無比這kohkhah適當。

Tsit時，陷落去苦境ê我該當tio̍h án怎？Tsia kantaⁿ有一條路，to̍h是迫切ǹg望聖靈永住tī我ê身軀，一時á都m̄thang離開我。哈里路亞！到聖靈永住ê hit時，我to̍h慢慢á脫離罪念kah罪行ê綑縛，一pái比一pái koh khah進步！因為，雖然驚烏ê我ta̍k工攏ē tú tio̍h烏暗暝，m̄koh只要我ētàng永遠la̍k有一點點á ê光，靠tio̍h它永遠ê照光，to̍h ētàng hō͘烏暗永遠bē近óa身邊，to̍h無koh驚啥物烏暗暝ê綑縛loh！

除了頂面所講ê ǹg望以外，咱iáu有啥物thang做ê leh？

一个方法是讀經。特別是對《聖經》裡ê〈保羅書信〉一定tio̍h tiāⁿtiāⁿ讀。像〈羅馬書〉第七章，hit種聖靈ê律kah罪ê律ê交戰狀況，to̍h是你所beh進入ê聖靈永住ê初步狀況。假使你ê修養ētàng進一步，tùi第七章行入去第八章ê時，to̍h不得了。Hit時，聖靈ê律to̍h ētàng完全制伏罪ê律；tsit時tsūn也to̍h是上主teh beh藉tio̍h聖靈kā祂永生bē死ê性命賞賜hō͘你ê兆頭！

另外iáu有一个方法是加kah老前輩講話。真tsē一生虔信耶穌ê老大人，lóng有聖靈永住ê經驗，你一定tio̍h tshōe in講話。少年ê基督徒總是kah意一大堆人聚做伙，答嘴鼓講笑，中間卻無任何一位老大人，這to̍h ē hō͘你食大虧！Ētàng聖靈永住通常lóng是一生虔信耶穌ê結果，kantaⁿ有tshōe tsiahê老前輩談，你tsiah ē進步，而且ētàng hō͘你提早進入聖靈永住ê神聖經驗ê中間！

──2014、07、08貼tī《基督教通訊》

──2017、09、29略改寫