《宋澤萊新著《天路拾穗》TOJ/台灣字版》 |
 |
 |
|
 轉寄 |
Tsútê 28： Tsongphài tsúgī lâigoân ê sînsèng khésī
作者 Sòng Te̍klâi 2026.09.13
Tsútê 28： Tsongphài tsúgī lâigoân ê sînsèng khésī
Tsi̍tba̍knih’á kú, tshingêng ê Tâioân kòenî teh beh kòe khì, góa beh tsiokhok bôlūn tshutgōa tshitthô á sī khiāke hiohkhùn ê bīniú, tī sin lâi ê tsit nî sūsū jû’ì, hílo̍k pêngan!
Nîtseh kîkan, góa kîsi̍t ū tshutgōa khah hn̄g ê só͘tsāi, siōng hn̄g khì kàu Tangkáng béthâu, Hêngtshun kó͘siâⁿ kah Bilong lôngtshuan. Te̍kpia̍t sī tī kôaⁿthiⁿ khiok tshintshiūⁿ jua̍hthiⁿ ê Bilong, tiánhiān ê ânghue koh khah âng, tsheⁿhio̍h koh khah tsheⁿ ê kéngsik, si̍ttsāi sī tsi̍t phiàn hó suaⁿ hó tsúi, kahná jînkan ê sian kéng.
M̄koh iúkuan oániû, pēng m̄sī góa tī tsia siūⁿ beh tâm ê, siūⁿ beh kóng ê tiantò sī tńglâi liáuāu ê tshe sì àmsî tī tshù ni̍h só͘ tsò ê tsi̍tê ībāng.
Kúi kògue̍h ílâi, ū saⁿ, sì pái tsò tsi̍tê kângkhoán ê bāng. He to̍h sī góa tiāⁿtiāⁿ khì só͘ tòa ê koāntshī kah gōa koāntshī ê kaukài só͘tsāi se̍hiû, hia ū tsi̍tê bô koân khiok huisiông khuah ê tsúitshiâng, kòe tsúitshiâng, téngbīn to̍h sī gōa koāntshī, tsúitshiâng ēbīn to̍h sī pún koāntshī.
Kîkoài ê sī, suijiân tsúitshiâng hoānûi kóngkhuah, tsúisè khiok tsin sè káng, tsúitshiâng tshiong lo̍h lâi liáuāu, tī pún koān hêngsêng tsi̍t tiâu nńgtsiáⁿ ê hôliû, khe tsio̍h pōlō͘, hô tshn̂g tako͘, jîtshiáⁿ huntshe tsiâⁿtsò tsin tsē ê sió tsúiliû. Tùi pún koān ê tsōnghóng khòaⁿ khí lâi, gōa koāntshī ê tsúithâu hôtōaⁿ ittēng mā sī sè káng bô la̍t, tsúiliû tasiap.
Sī ántsóaⁿ tsóng sī tiônghok bāngkìⁿ tsitê bāng, góa pēng bô tsin tshingtshó.
Tshe sì mê, kohtsài bāngkìⁿ lâi kàu koāntshī kaukài ê tsúitshiâng; m̄koh, tī bînbāng tiong, huisiông ìgōa, góa kèngjiân ētàng khiā tī khongtiong, khiā koân hiòng ēkha khòaⁿ khì, hit pâi tsúitshiâng íking bô khòaⁿkìⁿ, m̄koh khòaⁿ tio̍h tsi̍t phiàn tsin tōa phiàn ê tsúi, khàm tiâu nn̄gê koāntshī ê piankài khu kah gánle̍k só͘ ētàng khòaⁿ tio̍h ê ke̍k tsīn ê só͘tsāi, íking bô huattō͘ piānsik nn̄gê koāntshī ê kaukài á sī lio̍ktē ā, khòaⁿ khí lâi nn̄gê koāntshī lóng tângtsê tîmté tī tōatōatōa ê tōatsúi ni̍h, koh khah ántsóaⁿ to hun bē tshing tsia á sī hia, kántan lâi kóng, sòaⁿ kah bīn lóng siausit, kantaⁿ ū tsi̍t phiàn bûkiông-bûtsīn ê tōatsúi!
Ánne ê kéngsik tī bînbāng tiong tiônghok saⁿ pái. Tshéⁿ khí lâi, tsin kín to̍h tsaiiáⁿ tse sī tsi̍tê ībāng, inūi ībāng óngóng ē tiônghok, jîtshiáⁿ tsêngkéng tōapō͘hūn sī kângkhoán, hôhòng bāng tiong kéngsik ua̍hthiàu, hō͘ lâng tsìnhām! Jîtshiáⁿ sûisî tsaiiáⁿ, tse sī Sènglêng hôetap góa tsòikīn kúi kògue̍h ílâi só͘ mn̄g ê būntê, he to̍h sī, "sī ántsóaⁿ tī sìngióng siōng ū tsongphài tsúgī, á tó tsi̍tê tsongphài tsiah sī siōng iusiù ê?"
Tsitê bāng bênghián kā góa kóng, tsongphài tsúgī lâitsū Sènglêng hō͘ in Kitok kanta iúhān ê Sènglêng ê la̍t（í sió tsúiliû, nńgtsiáⁿ tsúitshiâng tsò siōngting）. Inūi Sènglêng siúⁿsù hō͘ lâng ê lêngsèng iúhān, kahná iúhān ê tsúi bô huattō͘ khàm tsoânpō͘ ê lio̍ktē, kantaⁿ ētàng piànsêng tsiliû, kohtsài iû tōa tsiliû huntshut tsin tsē sió tsiliû, tsiū ánne huntsong-li̍pphài, piànpò͘ tēbīn. M̄koh, kású ū lâng ētàng tit tio̍h só͘ū tōatōatōa ê Sènglêng ê la̍t（í tōatsúi tsò siōngting）, ánne to̍h ētàng khàm tsoân tē, sīmtsì liân saⁿ tōa iûⁿ gō͘ tōa tsiu lóng koh khah ántsóaⁿ to kìⁿ bē tio̍h, ánne to̍h bûsó͘ūi ê tsiliû à.
Tongjiân, góa mā bêngpe̍k Sènglêng ê ìsù pēng m̄sī oântsoân hó͘ⁿtēng tsongphài tsúgī, inūi sūsi̍tsiōng, jīmhô tsongphài ētàng tshîiú tsoânpō͘ só͘ sù ê Sènglêng, inūi ánne in kantaⁿ ētàng í iúhān ê só͘ sù khì tsò iúhān ê tāitsì, tse to̍h sī tsongphài tsúgī bûnāihô ittēng ē tsûntsāi ê goânin. Tùi bāng tiong tshéⁿ khí lâi, tsiū ánne khailóng khí lâi à, kámkak hit phiàn tōatōatōa ê tōatsúi sī huisiông se̍ksāi ê, ētàng kámkak tio̍h hit phiàn tōatsúi to̍h sī só͘tsāi, to̍h sī Iésu, to̍h sī Sènglêng, sī saⁿ ūi ho̍kha̍p khí lâi ê tōatsúi, he sī tsi̍tê bānmi̍h ê goânthâu, póhō͘ iúⁿtshī bānmi̍h.
─2022, 02, 05 tī Lo̍kkáng
