《台灣之愛：盧俊義牧會筆記》

| | | 轉寄

仝款是老師卻是無仝款師表

作者 盧俊義 2006.05.07

這是台東縣小鎮中ê一間國小，我ê gín-á細漢時tsūn就tī tsia學校讀冊，學校人數無算tsē，每班平均只有三十三名左右ê學生。因為人數無tsē，因此老師對每個學生ê家庭lóng非常熟練，也知影每個小朋友ê實力。學校除了禮拜三、六全校上半工外，其他時間一、二年級生lóng是上到營養午餐用完、睏中晝醒起來了後，就thang開始整理教室環境、書包、放學。老師總是將我ê gín-á kap班上幾位同學留落來同齊寫作業。Tú開始ê時，我以家己細漢時tsūn被老師留tī學校ê經驗，講he一定是犯了校規tsiah會hō͘老師「留校」（台語稱之為「留學」）當作懲罰。Gín-á否認，並講家己做副班長，真守規矩，伊解釋講老師是ài in tsit群同學留落來陪另外一群同學寫作業，老師也tī教室裡批改作業teh陪in，直到大家lóng kā作業寫完了，tsiah回家。有時老師會the̍h一kuá比較無仝款ê試題hō͘ in tsit群先kā作業寫完ê同學做，等其他同學kā作業寫完。我感覺真意外，心想︰怎會有hiah-ni̍h好ê老師？

有一工去學校參加教學觀摩家長會，就私下詢問老師到底是怎樣一回事。老師tsiah kā我講，tāi-tsì是tsit種ê︰因為班上有bē少農家子弟，in tńg到厝了後lóng會行去田園tshuē爸媽，有ê小朋友ài照顧小弟小妹，有幾位年紀雖然tsiah只有七、八歲，也tio̍h負擔些農務小事。因此務農ê父母時常無時間á疏忽了tio̍h注意gín-á是m̄是有寫作業ê事，á gín-á有時因為厝裡tāi-tsì無閒，或是左鄰右舍ê gín-á過來sńg，就將該寫ê家庭作業kā伊放bē記得。因此，老師特別tshuē幾個會注意寫功課ê gín-á，hō͘ in留落來，in身邊lóng跟tuè一個常常bē記得寫作業ê同學，教in幫忙注意一下身邊ê同學作業是m̄是寫好。Án-ne，全班ê作業lóng ē-tàng寫完，同學也ē-tàng互相關心，大家tī功課上ê差距也會khah少，同時當縣教育局督察抽檢作業ê時，就bē發生有kuá學生作業無完成ê難堪情況。Án-ne，彼此之間學習進度ê差距不但ē-tàng縮短，同學之間ê感情也變kah相當融洽。

過一kuá日子，我因為工作關係舉家搬遷到城市來，gín-á跟tuè轉學插班入學。一班學生tsē到五十guā個，真kheh ê桌邊通道只tshun容允「毛蟹行路」ê方式tsiah ē-tàng通過。Gín-á隨時感覺有學習上ê壓力，因為空間kap tī庄腳小鎮ê學校大無相仝。

有一工gín-á哭tehtng2來厝裡，我問伊原因，伊án-ne講︰「老師叫我khà電話hō͘班上一位同學ê家長，理由是hit位同學作業經常無寫完，老師真受氣，ài我kā hit位家長講︰『老師講buài tsit種ê gín-á，伊ê作業lóng無寫，會影響tio̍h班上ê成績。』」我ê gín-á jú講，哭得jú厲害。伊講伊m̄敢對hit位媽媽án-ne講，伊只敢講︰「老師ài阿姆kā gín-á講，無寫作業無好，請阿姆加注意一下某某某同學會記得kā作業寫完。」

Khà完電話，gín-á tńg來到教室，老師問伊怎樣講ê，伊照實講了，結果顛倒hō͘老師羞辱一頓，講伊無用，無像tsa-po͘-gín-á，連hiah-ni̍h簡單ê話也m̄敢講。但是gín-á iáu是感覺真冤枉，也無理解，為甚麼學校無仝款，老師也無仝款？為甚麼老師會講buài tsit種ê學生？伊問我講︰「爸爸，為甚麼有tsit種ê老師？伊如果kā我講，我也ē-tàng『留校』來陪hit位同學ah﹗」我也m̄知該怎樣回答gín-á tsit種ê問題tsiah好。

每pái看tio̍h幼稚園刊登「mài hō͘你ê gín-á輸tī起跑點」tsit種ê廣告，我總是會想起家己gín-á ê經驗，就有真深ê感歎，因為咱已經將教育當作競爭，á m̄是注重tī人性良善ê培育，án-ne就koh-khah免講所謂人格教育ê養成。

好ê教育無應該是教導gín-á競爭，卻是beh教導gín-á有良善ê心，hō͘ in知影怎樣kap無仝能力ê人相處，並且知影會彼此分享kap相助。Tsit種ê教育tsiah會hō͘咱下一代知影和諧相處ê可貴，彼此扶持ê可愛，並且tuì-tsia體會出分享所帶hō͘生命ê喜悅。
（原載tī自由時報2004年1月11日第15頁）

盧俊義牧師的個人網站。