《BONG報bóng選》

Se̍h翻頭

作者 Abon

「Ûe，董先生，你好，你昨hng有khà 電話來beh 引頭路honnh？」下晡時á接著一通電話，beh叫我去面試，伊kap我約hit暗九點面試，實在真奇怪ê時間，我mā是走去試看māi，hông tshūe總比去kâng koo-tsiânn khah好。面試了，伊叫我過tńg 工透早去上班，聽伊講真tsē，tsit款pháinn年冬真tsē 引粗工ê是teh kā人騙ê，m̄是無一禮拜bē-sái領錢，無，就是一工hông加扣幾nā 百，koh有拖tsiânn個月無發錢ê，上害ê是頭家走路無tè tshūe人領獎ê。

透早六點，紅kòng-kòng ê日頭tshiō入來我ê眠床頂，我tī眠床頂núa來núa去，紅kòng-kòng ê日頭曝著kha-tshng a，我koh無想beh起床。尾á，看時間bē赴a，tsiah 趕緊peh起來洗面、洗嘴，準備上班。

衫á褲穿好勢，ke-si款好，豬公內ê銀角á lóng khîng-khîng出來，koh有一百khoo，有夠一工來回ê車錢，帽á戴好勢，鞋á穿好，我ê跑車發kiânn，ǹg火車頭出發。路nih真tsē人beh去上班、上課，真鬧熱，m̄-koh kap夜市á hit款鬧熱無siánn kāng款，大家腳步踏真ân，若認真比起來，花蓮人ê腳步bē像台北人hiah緊，到車頭已經六點五十a，差beh坐hit班車發車koh 10幾分。

跑車tī車頭pha車場插好勢，ta̍uh-ta̍uh-á行入去車頭ê Labi，ná行koh teh想講kám beh去做，愈行愈慢，koh想講ta̍uh-ta̍uh-á行，若bē赴坐車就mài去a，行到買票ê hia tsiah六點五十三niâ，kui褲袋á ê銀角á lóng jîm出來，先lok一粒五十khoo，tsiah ta̍uh-ta̍uh-á一khoo一khoo lok，lok到七十三khoo ê時，錢suah lok bē入去，lok入去一直lak出來，後壁koh排幾nā個beh趕上班ê,看起來面tsiok臭，尾á kui-khì kā ji̍h「取消」，全部ê銀角á khiang、khiang、khiang、khiang lóng lak落來。Kā銀角á jīm tī手蹄koh算，花蓮到和平ài八十六khoo，若是我坐去，tshun十四khoo，kan-tann會使買一粒『饅頭』。

正手kā銀角á tēnn ân-ân，koh tī買票ê hia khiā beh一分鐘，「好lah！無愛去a。」騎我ê跑車tńg來，tī路nih koh去kám-á店買我今á日ê ǹg望、花蓮人ê ǹg望──tī花蓮tshūe頭路；siánn-mih三大報系lóng無效，kan-tann更生報有效niâ，算十二粒銀角á hōo頭家，我koh得著我人生ê ǹg望。

其實去面試ê時就一直teh想kám beh去做，會問ka-kī tsit款問題，實在tsiok無想beh做tsiah會án-ne，hiông-hiông koh sa無是án-tsúann無想beh做，ká-ná像sa無人teh tshòng siánn ê gín-á 一直問、一直問，面試了tńg來厝nih mā是koh想無，雖bóng hit個粗工á頭無sîng teh kā人騙，ká-ná mā會真穩定ê款，一工mā有八百khoo，mî-nūa一個月歇四工koh有兩萬六千 khoo thang khai，是án-tsúann無想beh做？我一直想lóng無。

Hit暗過十二點，人浸tī燒酒內底，mā是koh teh想是án-tsúann無想beh去做。Kap我tàu-tīn 去引ê有一個三十三歲，koh一個二十幾歲看起來khong-khong，粗工á頭應該三十thóng歲niâ，講話kài āng聲，伊講話bē tsiok大聲，kha̍p bē著就講：「做lín去探聽，gúan公司tī和平三年外，有實力tsiah會擋hiah久！」「別間án-tsúann我m̄知，工人應該ài有ê lóng bē走閃著。」「Bē hōo lín做危險ê khang-khùe，因為lín無專業。」「Gúan公司koh有tsiânn百個工人。」是án-tsúann 無愛做？伊講ê lóng bē-bái ā，tsit-má粗工ê行情mā是lóng像伊講ê,無tîng-tânn著。

Beh一點tsiah想著九十九年ùi學校出來，就是先去做粗工，一工一千khoo，phah a-tsu-lih千五，一個月涼涼á做，想著就歇睏二工，án-ne mā領beh到三萬，mā m̄是價siàu bái tsiah 無想beh 做。

尾á tsiah知影是無想beh se̍h翻頭，出來beh三年a，siánn-mih lóng無成，koh ài tńg去做真無愛做ê khang-khùe，價siàu koh lak hiah tsē，實在無想beh koh行tò-tńg去，mā無想beh承認講…，過tsiah久mā是koh無踏進前，tī半路kap無行中ng hānn進前hānn退後。

無想beh se̍h翻頭。Koh gia̍h紅筆tī花蓮人ê ǹg望頂頭走tshūe我ê ǹg望。