《BONG報bóng選》

Siá hōo lāu-su ê phue

作者 蔡氏清水

Lāu-su, lí hó !

Tsiok-kú bô kā Lāu-su tshíng-an, tsin pháinn-sè! Lāu-su iáu-sī khah bô-îng, koh sî-siông ū bûn-tsiunn teh tâu-kó?

Tāi-sing, tsin kám-siā Lāu-su tuì guán Mah-mah ê kuan-sim, tān-sī Lāu-su kám tsai-iánn? Tngg guá tńg-khì Ua̍t-lâm ê lōo-tíng, guán Mah-mah... í-king... óng-sing! Thiann-tio̍h tsit-ê siau-sit ê sî-tsūn, guá kui sin-khu lóng gōng khì, ba̍k-sái it-ti̍t lâu, guá tsin kiann-hiânn, guá ê sim-tsōng tsi̍t-tsūn, tsi̍t-tsūn thiàu siunn kín, ná-tsún ū lâng īng tshíu tsiok tuā-la̍t--ê teh tsūn hōo ta, tsiok thiànn, tsiok thiànn !

Kàu tsit-má, í-king kuí-nā-kò-gue̍h lah, tān-sī guá iáu-sī bô huat-tōo siong-sìn tse sī sū-si̍t, nah-ē án-ne? Guá it-ti̍t tsin tsū-tsik, jú sīunn jú siong-sim, jú m̄-kam. Tī ka-tîng lāi-té, guá sī siāng tuā-hàn, koh kè tsiok hn̄g, tsiok hn̄g ê sóo-tsāi, Mah-mah phuà-pīnn ê sî, bô huat-tōo tsiàu-kòo, tsi̍t-tiám íu-hàu lóng bô, guá tsin-tsiànn tsiok put-hàu ê tsa-bóo-kiánn. Guán Mah-mah ê lī-khui, tuì guá tsuân-ke, ti̍k-pia̍t sī guá ka-kī lâi kóng sī tsi̍t-hāng ki̍k-tuā ê tánn-kik kap sún-sit, mā-sī íng-uán ê thiànn. Guá tsin hi-bāng tse kan-na sī “ ok-bāng” ! ! !

Kuè lâi Tâi-uân tsit-tuānn sî-kan, guá ê sing-ua̍h tsin ut-tsut, tsi̍t-bīn, guá ài lâu tī Ua̍t-lâm puê-phuānn guá ê Pa-pa, guá ê sió-muē, lâu tī koh ū guá tshin-ài ê Má-mah hîng-iánn ê kí-liām ê sóo-tsāi; tsi̍t-bīn guá su-iàu kuánn-kín tńg lâi tsia puê-phuānn guá ê sian-sinn hām gín-á, tī tsia ū guá ê “ tsiong-lâi”. Tsit nn̄g ê sóo-tsāi, nn̄g ê ka-tîng, tuì guá lâi kóng, lóng tsin tiōng-iàu, guá lóng ài-hōo kap tin-kuì .Ka-kī ê sian-sinn, tshin-tsiânn, pîng-íu...lóng an-uì guá:M̄-thang kuè-thâu siong-sim, ài bīn-tuì jîn-sing sóo kóng ê “sing. lī. sí. pia̍t.” ê sū-si̍t, guá tsiah-ni̍h siong-sim tō pháinn sing-thé, guán Mah-mah “tsāi thian tsi lîng” nā tsai-iánn, i ē m̄-kam... ...Tse guá lóng ū thiann tio̍h, lóng bat tsiah-ê tō-lí, tān-sī guá iáu-sī tsiok pi-ai. Tsit-má, tī tsia nā khuànn-tio̍h siánn-mih sóo-tsāi ū pān song-sū, guá tō sīunn-tio̍h ka-kī ê ka-tîng tú tio̍h ê pi-ai, guá koh ē lâu ba̍k-sái, koh kan-khóo. Guá mā kám-kak tsin pháinn-sè, in-uì, kā Lāu-su kóng tsit-ê tāi-tsì hōo lí sīu-tio̍h ka-kī ê bó-tshin ( Iah-sī, Lāu-su sī tsa-poo ê, pí guá lú-sìng khah kian-kiông, khah khuànn ē khui ? ). Tse mā-sī tsiok kú guá bô kap Lāu-su liân-lo̍k ê guân-in!

Guá iáu-buē ū huat-tōo hui-ho̍k í-tsîng ê sing-ua̍h, îu-kî sī ha̍k-si̍p. Guá tsit-má Tâi-gí ê tîng-tōo, koh bô pān-huat tsiong sim-lāi ê uē, uân-tsuân kóng hōo Lāu-su thiann, tān-sī, guá tsin-tsiànn tsiok siong-sim...

Tsuè-āu, kìng-tsiok Lāu-su sin-thé kiān-khong, bān-sū jû-ì .

Ha̍k-sing Tshuà sī Tshing-tsuí Kìng-siōng

(作者是越南人)