《當上帝開嘴講台語》

4.1.6 小結

作者 梁淑慧

4.1.6 小結

Tùi以上ê簡介，咱tī-tsia做一個整理：《巴克禮譯本》代表--ê是大約一百年以前ê廈門話，而且採取早期「形式對應」ê翻譯原則；「紅皮聖經」kap《現代台語譯本》是代表最近三、四十年ê台灣話，採用khah新ê「功能對等」ê翻譯原則。另外，tī文字方面，《巴克禮譯本》kap「紅皮聖經」kap《現代台語譯本》lóng是用白話字；《台語漢字本》是《巴克禮譯本》ê漢字版；《路加福音傳漢羅試寫》ê「漢羅合用字」thang講是一項新ê試驗。

表4.1.6 聖經譯本比較表

聖經譯本出版年代內容語言文字翻譯原則
《巴克禮譯本》新約1916舊約1933新舊約廈門話白話字形式對應
「紅皮聖經」1972新約台語（台中腔）白話字功能對等
《路加福音傳漢羅試寫》1987新約的「路加福音」廈門話漢羅合用字
《台語漢字本》1996新舊約廈門話漢字形式對應
《現代台語譯本》未知新舊約台語（台北腔）白話字功能對等


Tī以下ê討論中，咱beh分別tùi詞彙kap語法ê比較，探討《巴克禮譯本》、「紅皮聖經」、《現代台語譯本》tsit三個譯本ê無仝；並且tī內容上探討無仝ê翻譯原則所表達出來ê信息傳達風格。另外一方面，「羅馬字」、「漢字」、「漢羅合用」tsit三種無仝ê文字，用來書寫台文ê時分別有什麼優缺點，mā值得咱進一步來思考。

雖然咱有tsiah-ni̍h tsē無仝ê台語《聖經》，但因為「紅皮聖經」被當時ê政府沒收，《現代台語譯本》到tann iáu未出版，《路加福音傳漢羅試寫》也只是實驗性質ê改寫，所以到tann為止對50歲以上（註57）ê信徒ê語言習慣siōng有影響力者，thang講iáu是《巴克禮譯本》。

註57：少年一輩ê信徒因為看m̄-bat白話字，koh無機會thang學習，只有tī禮拜儀式中聽牧師ê講道tsiah ē-tàng接觸tio̍h一寡《巴克禮譯本》ê內容，受tio̍h ê影響真細。