《寧毀不銹─馬偕e5故事》

| | | 轉寄

薪火永遠傳..落..去

19世紀60年代以後,外國人tī台灣宣教或者是獻身醫療工作ê先驅,親像馬雅各醫生、李酥牧師、德馬太醫生、甘為霖牧師、巴克禮牧師、吳威廉牧師、宋雅各牧師、戴仁壽醫生、蘭大衛、蘭大粥醫生父á-kiáⁿ……。



M̄-koh馬偕創下1項無人有ê紀錄,就是伊本人娶gó͘ⁿ股坑女子張聰明,in生2女1男,20年了後,馬偕博士長女偕媽連嫁hō͘愛徒陳清義,次女偕以 利嫁hō͘柯維思,婚禮tī仝年仝日舉行,由吳威廉牧師證婚 嘉禮ê日子是1899年3月9日,地點是馬偕家己ê khiā家,2代有3人kap本地人聯姻。



由馬偕博士家族譜系表,thang清楚看出in孕育ê後代,kap台灣1百20- guā 年ê歷史有juā-ni̍h-á深ê關連。

馬偕翁á-bó 孤kiáⁿ偕敏廉牧師,1882年1月22日出世tī台灣淡水,伊ê童年kap少年時代是tī台灣度過..ê,對台灣ê風情,生活、世俗認bat真深。

偕叡廉bat tī香港維多利亞英文學校讀冊,大學高等教育tī加拿大克拉克大學完成,28歲得tio̍h學士, 1年了後koh取得教育碩士學位, kap羅仁利女士結婚。

7-koh月了後,tsit對結婚無luā-kú翁á-bó uì多倫多起程,橫渡大西洋,坐火車行過歐洲kap西伯利亞,完成2-koh月水陸交接ê旅程,最後坐輪船平安到基隆港。Tsit位新娘受tio̍h熱烈ê歡迎,tsit時伊可能iáu m̄知淡水會成做伊後來生活57年ê所在。

1865年5月28日,英國長老會差派馬雅各醫生kap伊ê 3位助手自廈門坐船到高雄旗后(今旗津)tsiūⁿ岸,3工了後,1陣人選定台灣府(台南)作為醫療傳道ê出發點。

1895年蘭大衛醫生來到台灣,先tī台南落腳,1901年tī彰化創立彰化基督教病院,後來伊ê kiáⁿ蘭大粥醫師繼承醫療、宣教工作,父á-kiáⁿ nn̄g代為台灣奉獻beh tsi̍t世紀。

北部醫療、宣教、教育saⁿ-ê層面ê貢獻kap影響,tio̍h落tī馬偕博士ê身軀頂。加上伊本人kap gó͘ⁿ股坑女子張聰明小姐ê聯姻,nn̄g-ê tsa-bó͘-kiáⁿ別嫁hō͘伊ê愛徒柯維思、陳清義,馬偕ê孤kiáⁿ偕叡廉mā繼承教育kap宣教事業,因此馬偕家族對台灣北部基督教長老會ê影響,mā koh-khah深遠,時間i̍t直延續到20世紀90年代tsiah tâu-tâu-á落幕。

1914年3月初9,偕叡廉繼承父親ê遺志,tī牛津學堂ê基礎頂頭,選擇 馬偕博士登陸淡水ê紀念日,創辦台灣第1間tsa-po中學(當時淡水女學堂已經成立真tsē年)。Tsit時台北kan-tā有1間中學(應指台北i̍t中,現在建國中學),koh初期kan-tā日本子弟ē-tàng來讀。

創校了後偕叡廉牧師擔任第it任校長,1943年伊因第2次大戰,暫時去南美 義阿那擔任中學校長,戰爭結束了後2年,伊koh tńg去台灣教育崗位。

Jī次大戰期間,伊bat tńg去加拿大修習神學課程,受封成為牧師,66歲hit年,早年老父讀ê諾士(Knox)神學院,頒發榮譽神學博士學位表揚伊ê貢獻。



馬偕博士父á-kiáⁿ nn̄g代,lóng tī淡水仝1間學校,對培育人才付出真tsē心力,tsiah-ê子弟兵mā成做台灣現代化重要ê力量。

偕叡廉牧師70歲退休,iáu kap夫人選擇淡水做養老ê所在,晚年iáu辦理淡水查經室,培養婦女研讀聖經道理,甚至kā傳教區延伸到淡水郊區ê小基隆、興化店等地。

Tsit位對北部教育有貢獻ê老牧師kap教育家,晚年bat tī淡水khiā家受暴徒攻擊,好佳哉siong主庇佑,槍子雖然phah入身軀,suah安然脫險,這是伊生命史siong值得記錄ê神蹟。