《Kah陳小小做伙讀台語》

 | | | 轉寄

工作六工安歇一工，親像上帝快樂工作

作者 陳小小，台譯：Lîm TsùnIo̍k 2025.11.30



工作六工安歇一工，親像上帝快樂工作

陳鳳翔



圖片提供／123RF

快樂工作ê上主

工作，是一種祝福。創世記1章，上主hông描述做一个快樂ê工作者！祂工作六工歇睏一工，tùi tsitê時間六比一ê比例，ē tàng看出祂kah意工作，若無，應該是工作一工、歇睏六工。上主mā欣賞kakī ê工作成果，因為「事就ánne成」（7、9、11、15、24、30節）、「上主看ánne是好ê」（10、12、18、21、25節）、「上主看tio̍h一切所造ê lóng真好」（31節）tsiahê話句重複出現幾nā pái。上主每完成一个項目，祂to̍h觀看工作成果，讚嘆kakī所做ê tsiahni̍h好！tsiahni̍h讚！

創世記1章後段，提起上主照kakī ê形像造人，照祂ê形像造男造女。上主賜福hō͘人，koh對in講：「Beh生湠tsētsē，遍滿地面，治理tsitê地，mā tio̍h管理海裡ê魚、空中ê鳥，kah地tsiūⁿ各種振動ê活物。」（28節）上主創造有kakī形像ê人類，委派人類參與開闢世界ê工ê下半場，重要是人類kah祂做伙治理tsitê地。上主是一切ê主人，是一个快樂ê工作者，人類成做祂ê同工，mā應該是快樂ê工作者，做伙kah上主享受工作ê快樂。照tsitê筋脈伸長，咱thang期待續接ē出現ánne ê關鍵句「事就ánne成」「人看ánne是好ê」「神kah人看tio̍h一切所造ê lóng真好」。

中世紀法國拉比拉希（Rashi）認為創世記描述上主hitê貫通一切ê獨一，轉化趨向超過獨一（more-than-one）。以色列學者阿維娃‧戈特利布‧佐恩伯格（Avivah Gottlieb Zornberg）順tio̍h 拉希ê思路，注意tio̍h創世六工連續teh進行各種權力下放á是分散（decentralization）ê過程，親像光暗分開、各種水分頂下、各種水kahta地分開……，上主kā kakī單一kah整體ê能力，分做無仝ê中心。美國神學家哈維‧考克斯（Harvey Cox）總結tsit兩位學者ê看法，認為上主寧可放落kakī ê獨一性，祂意愛分享kakī ê管治權，甚至到一个地步，to̍h是hō͘人類責任。亞當、夏娃bē滿足做一个平凡ê人，ǹg望成做上主，持有完全控制一切ê能力。Khau洗ê是，這tú好是上主tú放棄ê，當teh分散出去ê！（註）

工作非勞碌

亞當kah夏娃真緊to̍h墮落犯罪，按算出現ê話句「神kah人同工，看tio̍h一切所造ê lóng真好」無出現，顛倒出現「地一定為你ê緣故受咒詛；你一定一世人勞苦tsiah ētàng tùi地裡得食ê」（創世記3章17節）。就ánne，後世代一kóa基督徒因為上主對亞當ê審判，掠做工作是對人類ê處罰，而且認為上主賞賜ê恩典應該是財務自由，免工作，這mā是世俗文化價值觀終極ê追求。

M̄ koh，工作並m̄是墮落了後ê結果。Tī亞當犯罪tsìn前，to̍h已經hông分派工作，「耶和華上主kā hit人安置tī伊甸園，hō͘伊修理，看守。」（創世記2章15節）上主是一个快樂ê工作者，快樂kah創造人類做伙享受快樂工作！Tio̍h算到上主帶領以色列人出埃及，tī西奈山建立盟約，刻tī石版頂ê「十話句」（傳統翻譯做「十誡」á是「十條誡命」）關係工作ê hit段，猶原維持工作六工、歇睏一工tsitê比例原則。「Tio̍h記念安歇日，守做聖日。六工tio̍h勞碌做你一切ê工。」（出埃及記20章8～9節）

Tsia ê譯文有出現「勞碌」，是受tio̍h世俗文化價值觀認為免工作tsiah是福氣ê影響，因為ánne，suah看輕工作。事實上，「勞碌」ê希伯來原文是一个中性字，to̍h是工作、服事ê意思。現代中文譯本2019版修訂譯文：「tio̍h謹守安歇日做聖日。你有六工thang工作。」有去除「勞碌」一詞ê負面含義。我認為tsit句譯文白話ê講法是：「第七工你tio̍h守安歇日，看做是聖日，á你有六工thang盡情享受工作，好好á工作。」

聖經ê價值觀kah其他異教ê價值觀完全無仝。後者大部分lóng是人beh脫離現有ê紅塵俗世，得道成仙、成佛進入某一个超脫ê樂土。M̄koh創世記展現ê畫面，卻是傳達上帝beh kah人tī祂所創造ê地tsiūⁿ做伙享受工作，做伙享受安歇ê價值觀。罪入了世界，聖Kiáⁿ上主耶穌道成肉身來到世界，祂ê拯救ê工，mā是ài ta̍k个信耶穌ê人tī tsit地tsiūⁿ kah聖靈上主同工，拯救iáu未聽信福音ê人。

工作是彼此服事

免工作，kám真正是福氣？事實上，無想beh工作ê人ài ê是kakī免工作，其他人卻tio̍h工作來服侍伊。因為，工作to̍h是彼此需要、彼此服事，甚至是彼此相疼ê實際行動。To̍h親像社區某間好食ê肉燥飯小食店結束營業，咱to̍h ē吐大氣是án怎頭家m̄做à？某一kóa好診所貼遷sóa ê啟示，咱 to̍h ē艱苦心tio̍h走真遠tsiah ētàng hō͘ hit个好醫師看病。無論賣肉燥飯ê頭家，á是診所ê醫護人員，in工作ê意義，不只是為tio̍h thàn錢維持生活，mā是服事社區ê咱人。

世俗文化追求財務自由、免工作，絕對無符合上主創造世界ê理念。顛倒是顯露出人ê私心，想beh做皇帝，享受眾人服事。咱ê上主無想beh做皇帝，聖Kiáⁿ耶穌祂來，是為tio̍h beh服事人。路加福音記載門徒爭論啥人khah大，耶穌講：「外邦人有君王為主治理in，hitê掌權管in ê稱做恩主。M̄ koh lín bē tàng ánne；lín內面beh做大ê，顛倒tio̍h親像細漢ê，做首領ê，顛倒tio̍h親像服事人ê。」（22章25～26節，和合本）siōng尾耶穌總結講：「我tī lín中間親像服事人ê。」（27節）也to̍h是講，創造ê背後理路是上主kah人類透過工作來彼此服事、彼此相疼。

世俗文化教導咱人tī工作中，走tshōe身分價值á是某種人生終極ê意義，絕大多數人mā的確用工作來定義一个人ê價值，所以tùi世界ê角度來看，醫師ê社會地位koân過肉燥飯頭家。M̄ koh聖經kā咱講，身分價值m̄是透過工作來tshōe，卻是透過認bat上主來tshōe。人從事啥物工作，並m̄是kakī一个人決定。成做醫師、成做肉燥飯頭家，是tùi背後群體動力下各種ê因素來成就。

我個人ê職業生涯mā是順應群體ê需要，卻m̄是單單照tio̍h kakī ê意思來決定。我tī神學院攻讀道學碩士beh畢業ê時，一位新約教授beh hō͘我機會出國研究聖經抄本，期待我後來成做tsit方面ê學者做出貢獻。M̄koh當時tútn̄g網路時代來臨，翁婿kah我to̍h領受呼召beh委身tī信望愛聖經網站ê建置。Tī ánne ê群體動力下，我無法度回應hitê難得ê機會。道碩畢業了後，我本來應該獻身做女傳道，m̄ koh阮生兩个gín'á，lóng真oh照顧，連我ê takikuaⁿ kah父母lóng tio̍h輪流幫忙tshōa gín'á。In講，我ê gín'á若請保母tshōa，一定hông退貨，á是hông下「乖乖藥」。Tī ánne ê群體動力下，我一定tio̍h成做全職ê家庭主婦。十gōa年ê時間裡，我tshōa gín’á、維護信望愛網站、從事網路文字事工，而且kah父母有真tsē疼ê互動。Á了後gín'á大漢à，父母mā過往à，我去讀新約神學碩士，進入神學教育領域，tsitmá我沿路教冊，沿路讀舊約神學博士。

我注意tio̍h，關係上主工作ê動詞「創造」（בָּרָא），聖經使用ê時，主詞lóng是上主。M̄koh並m̄是限定tī「tùi無到有」（ex nihilo）ê創造，mā有「整頓á是建立秩序」（to order）kah「指派位置á是角色」（to assign a place or role）ê意涵。因此理解，thang知職涯並m̄是親像世俗文化價值觀所認為ê由kakī一人決定，卻是tī某一个時間、某塊土地，上主order、上主assign，祂kā每个人khǹg tī祂ê大計畫中，á咱tī「我想beh ài ê工作」kah「別人需要我做啥物工作」兩个思維角度下，走tshōe kakī ētàng安排出來ê。所以聖經講：「Hō͘你kah人無仝ê是啥人leh？你有啥物m̄是對上主領受ê leh？若是領受ê，是án怎自誇，kahná m̄是領受ê leh？」（哥林多前書4章7節）

工作是疼ê實踐

有kóa工作，我一點á都無ài做。親像主日學ê財務，一做to̍h做14年。信望愛聖經網站每換一个財務，中間ê交接期我mā tio̍h代理。我tsìn前有時ē怨嘆，我ê呼召是網路福音事工、是文字事工、是神學教育，m̄是財務，m̄ koh耶穌ê工作理念是「我tī lín中間親像teh服事人ê」（路加福音22章27節），該做ê，to̍h盡力去做。Á hō͘我歡喜ê是，每一个工作，無論是kakī想beh á是無想beh做ê，簡單á是複雜ê，容易á是困難ê，我lóng ētàng tī過程中感受tio̍h上主tī邊á，祂時時賞賜各種ê智慧kah恩典。

以馬內利，上主kah人同在。祂是一个快樂ê工作者！快樂kah祂創造ê人類做伙享受工作！工作六工，我參與創造ê工kah救贖ê工；安歇一工，我tī安息日稱頌祂是創造主、祂是救贖主。透過工作，咱彼此相疼，互相服事，工作是疼ê實際行動。

註

《新世代來à，咱應該án怎讀聖經》（How to Read the Bible），哈維‧考克斯（Harvey Cox）著，黃杰輝、阮雅瑜譯，基督教文藝出版社，2017年，44、50到51頁。