《宋澤萊新著《天路拾穗》TOJ/台灣字版》 |
 |
 |
|
 轉寄 |
Tsútê 17：Tâm kóng honggiân（lênggí）sî ê nn̄g tsióng tsōnghóng
作者 Sòng Te̍klâi 2026.06.28
Tējī pō͘ Sènglêng ê Koànak
Tsútê 17：Tâm kóng honggiân（lênggí）sî ê nn̄g tsióng tsōnghóng
Hit kang khì kàu kàuhōe, ū pêngiú mn̄g góa kóng honggiân hit tongsî sinsim sī m̄sī ētàng kakī khòngtsè ê būntê, góa ê hôetap tī ēbīn：
Kóng honggiân kah phó͘thong ê gígiân bôkâng ê só͘tsāi sī, tshùitsi̍h kńgtāng, tī tshùitsi̍h huisiông khoàisok ê ūntōng tiong tùi nââu kah tshùikhang só͘ kóng tshut lâi ê tsi̍t tsióng gígiân. Lán itpuaⁿ só͘ kóng ê gígiân, tshùitsi̍h bē ū tsiahni̍h khoàisok ê ūntōng.
Kóng tio̍h lán kóng honggiân ê tsūngó͘ khòngtsè tsōnghóng tāikhài thang huntsò nn̄g tsióng：
Tsi̍t tsióng sī lán pêngsiông sî kóng honggiân ê tsōnghóng, iā to̍h sī tī lán ê ìgoān ēkha só͘ tsò ê honggiân kîtó. Pílūn kóng tsitmá góa siūⁿ beh kóng honggiân, góa to̍h ētàng tsūtsú kā honggiân kóng tshut lâi, góa mā ētàng tsūtsú thêngtsí kóng honggiân; iā to̍h sī kóng ū beh kóng honggiân, góa lóng ētàng tsiàu kakī ê ìsù, siu pàng tsūiû-tsūtsāi. Tsit ê ìsù ná tshintshiūⁿ sī kóng góa goān’ì tsiāmsî kā tshùitsi̍h tsioh hō͘ Sènglêng, hō͘ Sènglêng sú'iōng, kòe sîkan liáuāu, góa to̍h siu tńg lâi. Tsit tsióng honggiân kîtó sī tsin pêngsiông ê, ná tshintshiūⁿ lán ji̍tsiông singua̍h ê kóngōe.
Lēnggōa tsi̍t tsióng sī tsin tsūjiân tsūtsú ê tsōnghóng, iā to̍h sī kóng nā Sènglêng hutjiân kànglîm, kā lí ânân paukó tī Sènglêng ni̍h, tsit sî lí ê tshùitsi̍h, nââu, tshùikhang sitkhì tsūtsú sèng, lí kantaⁿ ētàng itti̍t kóng honggiân, ti̍tkàu Sènglêng thêngtsí tsokiōng, lí tsiah ētàng thêngtsí kóng honggiân. Tsit tsióng tsōnghóng ná tshintshiūⁿ lí ê tshùitsi̍h, nââu, tshùikhang lóng pī Sènglêng tingsiu, khaisí kóng honggiân á sī thêngtsí kóng honggiân lóng tio̍h khòaⁿ Sènglêng ê ìsù. Tsit tsióng tsōnghóng píkàu khah tsió huatsing, m̄koh bētàng kóng bē huatsing!
Kóng honggiân（lênggí）sī Sènglêng tī lán ê lêng ni̍h só͘ huattōng ê tsi̍t tsióng gígiân tōngtsok, I kiktōng lán ê lêng, hō͘ lán kóng tshut honggiân, liáuāu kā gígiân tshōa kàu SiōngTsú ê bīntsêng（tsù 1）, ti̍ttsiap tùi SiōngTsú suatbêng, gígiân lāibīn ū kok tsióng òpì; mā sī Sènglêng beh líkái tsinsi̍t ê lí ê suiàu, tùi SiōngTsú tsīnliōng kóng tshut ê tsióngtsióng kîtó, kóng tio̍h sī siáⁿmi̍h lōeiông, tûhui ū huane̍k honggiân ê insù ê lâng, lán púnsin sī bô huattō͘ líkái ê, iā to̍h sī kóng lán ê ngó͘sèng（líkái le̍k）sī bûlêng-ûile̍k ê, he sûntshùi sī Sènglêng ê ìsù, só͘í kóng lāibīn lóng sī òpì.（tsù 2）
Tng lán kóng honggiân ê sî, m̄ koán sī tsioh tshùitsi̍h hō͘ Sènglêng á sī hō͘ Sènglêng kiôngpik ēng tshùitsi̍h, inūi pōeāu lóng ū Sènglêng ê ua̍htāng, só͘í sī lán kah Sènglêng tàutīn tsòhóe（tôngtsāi）ê kihōe, ingkai hóhó’á páak, inūi bô kóng honggiân ê sî, Sènglêng to̍h līkhui lán à. Góa óngóng khòaⁿ tio̍h tsin tsē íking ēhiáu kóng honggiân ê lâng, khiok bô koh kèsio̍k kóng honggiân, in lêngkhó khì thiaⁿ sèng kua á sī tshiùⁿ sèng kua, lia̍htsún kantaⁿ ū thiaⁿ sèng kua á sī tshiùⁿ sèng kua ê sî á sī tōasiaⁿ huah ê sî, Sènglêng to̍h ē kah i tôngtsāi; khiok m̄tsai i á sī i púnlâng kóng honggiân ê sî, Sènglêng tsiah koh khah tsinsi̍t kah i tôngtsāi, si̍ttsāi sī huisiông khósioh!
Só͘í kóng, lán lâi kóng honggiân lah! I ētàng hō͘ lí ê sìnsim tōatōa tsingka, lênghûn giámngē, sán sing Sènglêng tikak, huatsing tsióngtsióng ê sînjiah, hō͘ lán khoàilo̍k ê tāitsì ná ē boāi tsò leh?
Tsù 1："Lômá su" 8：26~27, "hôhòng lán ê nńgtsiáⁿ ū Sènglêng pangtsān, lán púnlâi m̄tsai tio̍h tsáiⁿiūⁿ kîtó, tsísī Sènglêng tshinsin ēng kóng bē tshut lâi ê thó͘khùi thè lán kîtó. Kàmtshat lâng ê sim, tsaiiáⁿ Sènglêng ê ìsù, inūi Sènglêng sī tsiàu SiōngTsú ê tsí'ì thè sèngtô͘ kîkiû."
Tsù 2： “Kolîmto tsiânsu” 14, 14, "Góa nā ēng honggiân kîtó, sī góa ê lêng teh kîtó, m̄koh góa ê ngó͘sèng bô hāukó." “Kolîmto tsiânsu” 14：2, "He kóng honggiân ê, goânlâi m̄sī tùi lâng kóng, sī tùi SiōngTsú kóng, inūi bô lâng thiaⁿ ē tshut lâi. M̄koh, tī i ê simlêng ni̍h khiok sī teh kóng kok tsióng ê òpì."
──2023, 1, 16 tī Lo̍kkáng
