《BONG報bong2選》

 | | | 轉寄

寫hō͘我上kài siàu念ê三姊

作者 李文正 2006.11.05

親愛ê三姊，當guán接著講妳發生車厄ê電話，guán趕到佳里綜合病院kā妳看ê時，妳已經離開世間a，guán實在bē-tàng接受妳hiông-hiông過往ê事實，因為妳lóng無kap guán相辭。

當guán去到學甲分局交通處理小組ê時tsūn，tsiah知iáⁿ講妳是tī八月十三禮拜日e-po͘六點五十左右，開車落南經過學甲急水溪橋，因為橋有sió-khuá tńg彎落kiā，車速緊，失控，suah píng tuì對面ê車道，lòng著橋頂ê護欄水銀燈，車tsiah tò-khap，妳tsuaⁿ-á去hō͘ teh tī車內ê駕駛座，當吊車、救護車去kā你救出來ê時，你已經無性命ê現象a。

後來我tsiah知iáⁿ妳lóng利用hioh-khùn時á去做tsi̍t-kuá關心動物、有疼心ê khang-khuè，照nisang ê推測，hit一日妳可能是趕緊beh載tsiah-ê狗á、貓á ê屍體去岡山火化、超渡，妳驚時間bē赴，tsiah會駛hiah緊suah來發生車厄。

過去我tshiâng-tsāi去工廠tshuē妳開講，妳lóng飼真tsē狗á，我mā tshiâng-tsāi kā妳講lán teh開工廠無閒無工，而且衛生mā無好，koh會kā人吵著，ta̍k-pái去tshuē妳坐，我lóng會kā妳唸，m̄-kuh妳lóng kā我講「無lah，ah to無koh khioh tńg來飼a，bē koh增加a lah」，妳lóng顛倒會kā我講，tsiah-ê狗á tsiok有感情ê，tsiok sik ê，你對i好，i lóng mā知iáⁿ neh。三姊，妳就是一個tsiah-ni̍h-á好性，tsiah-ni̍h-á有疼心，tsiah-ni̍h-á善良ê人。

雖然工業區hām安平真近，m̄-kuh自從a母á過往去了後，妳就khah少teh tńg來a，除了選舉ê時妳khah tsia̍p來kā我tàu腳手以外，lán姊弟á就是隨人無閒ka-kī ê tāi-tsì。我會記得tī妳出tāi-tsì ê tsiâⁿ個月前，我koh去tshuē妳開講，妳lóng mā會講tsi̍t-kuá委曲、心聲hō͘我聽，我lóng mā kā妳苦勸，tio̍h-ài想想khah開leh，khang-khuè m̄免做kah hiah-ni̍h-á辛苦，衫á褲sio̍k-sio̍k a，tio̍h去買tsi̍t-kuá khah suí ê衫來穿，tú著a就去做tsi̍t-ê-á身體健康檢查，妳lóng mā kā我講「好、好」，妳lóng顛倒khah會關心我，講我食kah瘦pi-pa，mā tio̍h去hō͘醫生檢查看māi leh。我lóng mā kā妳講lán過去tuà tī海墘á，食bái穿bái生活艱苦，做粗重lán to lóng會堪得a，何況lán tsit-má已經做議員a，雖然khah無閒sió-khuá，m̄-kuh若kah過去比起來是加真khuìⁿ活leh lah。Lán姊弟á若做夥ê時，話lóng講bē煞。後--來有1日妳koh khà電話hō͘我，講有tsi̍t-kuá話beh kā我講，我kan-na kā妳講無要緊lah，我tsit 2日á若khah閒--leh tsiah koh過妳hia開講，想bē到我tsit-má連beh koh聽妳講話ê機會mā無a。

親愛ê三姊，妳自細漢就去做女工，kā a-pa、a母--á tàu thàn錢，閒ê時tio̍h-ài koh tńg來kā a-pa、a母á tàu做khang-khuè，我會記得妳thàn ê錢lóng hō͘ a-pa the̍h去買魚栽，妳lóng無為ka-kī設想，a-pa、a母á 無嫁妝hō͘妳，妳mā無計較，無分財產hō͘妳，妳kāng款對a-pa、a母á tsiah-ni̍h-á養孝，妳m̄-nā對guán tsiah-ê小弟、小妹真照顧、真疼thàng，妳對兄哥、大姊mā真有情義，妳若做會到ê，lóng bē計較。

親愛ê三姊，妳離開guán了後，guán若beh koh去看秀梅，ah是beh去kā a-pa、a母á探墓厝，車頂就減妳l個a，我聽A秋講，妳lóng tshiâng-tsāi ka-kī 1個人，車駛leh去新化仁愛之家看秀梅，因為妳知iáⁿ我khah無閒；tú著á lán兄弟姊妹lóng會相招做夥去看秀梅，tī車頂lán兄弟姊妹有講有笑，甚至mā有爭執，tsit-má我kā回想起來，he是lán上快樂ê時tsūn。我相信妳tsit-má一定kap a-pa、a母á做夥tī天國、tī佛祖ê身軀邊，母á-kiáⁿ有講有笑tsiok快樂ê。

親愛ê三姊，tī我讀小學beh升國中ê時，a-pa、a母á無kap lán tuà做夥，我印象tsiok深ê，tī我讀金城國中一年ê時，e-tàu時á妳lóng kuāⁿ tsiok好食ê便當kap果子去學校hō͘我食，hit時是我感覺上幸福ê時tsūn，tse mā是我tsi̍t世(sì)人to無法度放bē記得ê tāi-tsì。妳tshiâng-tsāi kā我講妳若tī外口聽著人teh o-ló--我，lóng tsiok歡喜ê。雖然我今á日已經做議員a，m̄-kuh妳mā是hiah-ni̍h-á疼我，體貼我，關心我，妳mā m̄敢麻煩我。三姊，妳是我心目中上好ê a姊，若準講有後世人，妳koh做我ê a姐，好無？

親愛ê三姊，妳雖然無讀juā-tsē冊，m̄-kuh妳tī我ê心目中比hiah-ê高學歷ê khah有學問，khah有是非觀念；雖然妳自細漢就食頭路，無像真tsē人受政府ê照顧，koh嫌政府，若sió-khuá影響著in ê利益，in就批評政府tsit項、hit項。幾nā pái teh kap妳開講，妳lóng真會tàng體貼政府，體貼A扁á總統，因為妳知iáⁿ beh huāⁿ 1個家庭to tsiok艱苦a，何況beh huāⁿ 一個國家？Koh再講，台灣iáu-koh有真tsē無公平ê所在。

親愛ê三姊，雖然妳真好性，真善良、真有疼心，m̄-kuh妳對性命ê積極實踐是無人thang kap妳比ê，妳kā妳ê愛心化做行動，m̄-tiāⁿ是對家庭ê付出，對序大人ê養孝，對兄弟姊姊ê情份，lóng hō͘人真感動。妳m̄-tiāⁿ疼親人，妳mā疼tsiah-ê精牲動物，甚至妳人生ê最後就是為著tsiâh-ê狗á、貓á來犧牲性命！可能有真tsē人會笑妳gōng，過去我mā tshiâng-tsāi為著tsiah-ê tāi-tsì kā妳唸，m̄-kuh tsit-má我tsiah瞭解：妳是一個不管時用疼心來實踐性命、偉大ê女性！親愛ê三姊，雖然妳tsiah五十七歲就離開guán，m̄-kuh妳ê精神永遠教示guán，mā活tī我ê心肝底。