《BONG報bong2選》

 | | | 轉寄

快車小姐

作者 5656 2007.02.12

快車小姐，就是對號車頂ê 服務小姐；1960~80年代hit當時除了火車，公路局ê 長途對號車mā 有設án-ne ê 服務小姐。

當年beh 應徵對號車ê 服務小姐，tio̍h-ài 高中出業、身kuân 160公分以上，ài 通華語、台語iah 是客語，當然笑容ài 甜。In ê khang-khuè 除了提供車頂服務，ài koh tī 車頂賣本島各地ê 名產kap 便當；鐵路局賣ê 便當，到taⁿ 猶原hō͘ 人siàu 念。

有一首台語流行歌曲就叫做〈車頂ê suí 姑娘〉，歌詞lóng 是形容一寡當時受著大眾歡迎ê 車頂服務小姐。M̄-koh 後來因為高速公路通車，致使火車ê 營業一工bái 過一工；為著減少支出，快車小姐mā 只好順應環境漸漸行入歷史。

Koh 有一種大型車mā 有車頂ê 服務小姐，就是遊覽車小姐。遊覽車小姐需要ê 專業知識就khah tsē，像講各縣市ê 行政區、人文歷史、建設資料、風景區，當年十大建設ê 建設重點、開拓歷史mā ài 了解。

Tī 當年資訊無tsiah 發達ê 年代，一寡資料ài tsiâⁿ 用心去收集，上主要ê 資料來源就是sianpai，m̄-koh一寡手抄本，sianpai mā 無一定肯傳教，所以觀摩、偷學，是新進人員ài 做ê 功課。除了介紹一寡資料，遊覽車小姐koh tio̍h會曉唱歌、講故事……等等gī-niū 節目。自開放國外觀光了後，國內ê 遊覽車業務受著真大ê 打擊，為beh 生存只好改變經營方式，竹雞á 車自án-ne 開始tī 國道往回。

Tsit二、三冬來，為著beh 消除「竹雞á 車」tse 無好聽ê 名，有幾間往回tī 高速公路頂ê 大型遊覽巴士，為beh 提高企業形象，mā 為著beh hō͘ 旅客有khah 好ê 印象，這幾間私人客運mā tī 車頂設一位服務小姐，提供koh-khah 好ê 服務。Tse，mā tī lán 目前ê 環境，提供hō͘ 少年男女bē少工作機會。