《BONG報bong2選》

| | | 轉寄

「忘年會」kap「尾牙」是m̄是仝款?

日本kap臺灣lóng有慶祝新年ê慣勢,所以這兩個國家ê人lóng歡喜迎接新年。雖然日本kap臺灣m̄是仝款ê國家,m̄-koh國民lóng有期待新年ê心情,所以無論是過年前 iah是過年後ê時tsūn lóng有真tsē差不多仝款ê活動。

日本用新曆過節日,所以一月初一是日本ê新年。因為有「忘年會(Boonenkai)」,每年一下到十二月,上班族ê生活就變真無閒。「忘年會」是一種宴會,辦這種宴會ê宗旨是「『忘掉』這一年ê辛苦煩惱 kap 用快樂ê心情迎接新ê一年」。

聽著這個話ê時tsūn,真tsē臺灣人是m̄是感覺日本ê「忘年會」 kap 臺灣ê「尾牙」差不多仝款ê慣勢? Tio̍h!「忘年會」kap「尾牙」lóng是一種宴會,辦這種宴會ê宗旨也是差不多仝款ê。

臺灣ê「尾牙」是tī 農曆過年前辦ê,tī仝一間公司上班ê人家tàu-tīn參加這個宴會,互相感謝同事ê幫忙iah是安慰這一年ê勞苦。聽到這階段ê時tsūn,大部分ê日本人是m̄是感覺「忘年會」kap「尾牙」親像是仝款ê tāi-tsì?M̄-tio̍h!看起來,日本ê「忘年會」 kap 臺灣ê「尾牙」無juā大ê差別,m̄-koh這兩個國家ê過年活動有khah大ê差別,就是主辦ê辦法 kap 參加人ê感覺lóng無仝款。

因為臺灣ê「尾牙」是公司ê頭家主辦ê,所以頭家lóng付所有ê費用,參加ê人無需要出錢。M̄-koh日本ê「忘年會」是基本上參加ê人互相舉辦ê,所以大家分擔「忘年會」ê費用。

臺灣ê「尾牙」是一年只有舉辦一kái ê,m̄-koh日本ê「忘年會」無一定只辦一回,有ê公司辦真tsē回。比如全公司辦一回、公司內底ê每個部門辦一回、仝款ê年度進公司ê人做夥辦一回、 kap有關係ê公司做夥辦一回等等。

對臺灣人來講,「尾牙」是非常期待ê活動,是無? M̄-koh,對日本人來講,「忘年會」無一定是歡迎ê活動。因為參加宴會ê人lóng需要lim酒,特別是參加公司ê活動就無法度拒絕lim酒,所以無歡喜lim酒ê人感覺年尾是非常辛苦ê時tsūn。


(作者是日本人,台灣大學語文中心學生)