《BONG報bong2選》

 | | | 轉寄

北風koh 來挑戰日頭

作者 甘露 2009.01.18

頂一pái，北風kap 日頭sio 拚，結果北風無kā 路nih ê 人ê 衫褪落來，hō͘日頭贏去，伊感覺tsiâⁿ m̄甘願，koh 來tshuē日頭挑戰。

北風：「日頭ah，你頂pái 用老奸步贏我，這pái 我一定beh 討tò-tńg來，你出題，咱koh來拚一pái。」

日頭看著北風a hìng-te-te，無beh tshik 北風ê 意，一頭koh 想beh 徹底phah 贏北風，就隨kā應好：「北風ah，你beh 輸幾pái tsiah會甘願leh？Kah 你to 敢koh 來挑戰，好！這pái 我一定beh hō͘你輸kah 服服服。」

日頭想著北風頂pái 輸，是輸leh 無用頭殼，用力用m̄-tio̍h所在。這pái伊又koh 出一個難題hō͘北風lo͘h：「北風，你看頭前有一支電火柱á，咱來比siáng會tàng kā柱á ê 影tshiâu tín 動，koh 愈tshiâu 愈長，好無？」

北風：「好a，kah 是你出題ê，我就無客氣beh 開始a o͘。」

日頭：「Mh，好a，m̄-koh 你mā仝款愛保持風度o͘。」

日頭出這個題了後，tī 邊á 暗暗á 偷笑，想講穩贏ê:「Hi..hi..hi..」

北風leh？北風這pái kám koh會kap頂一pái仝款，中計失敗leh？

北風「hù-ù. . .hù-ù. . .hù-ù. . .」He 影nah會吹bē tín 動leh？怪奇，怪奇a，tio̍h a，愛吹電火柱á tsiah tio̍h。

日頭：「有進步，有進步，算你khiáu！M̄-koh 你beh按怎吹tsiah會sái kā影吹hō͘長leh？He..he..he..你無法度lah。」

日頭知影beh hō͘影變長，kan-taⁿ伊tsiah 有法度，真hiau-pai kā 北風tshiàng 聲。雖bóng 北風hō͘日頭án-ne 笑，m̄-koh伊無失志，繼續想辦法。

北風心內teh 想：「無論是吹影iah 是吹柱á，lóng 無法度hō͘影變長。是beh按怎leh？Ah，有ā！Ha...ha.. ha..日頭！看絕招！」

這個時tsūn，頂pái 路過hit 個人lia̍h一隻雞á 又koh 行來，北風sái一下力，kā hit 隻雞á 吹去柱á 頂。

路人：「怪事tiāⁿ-tiāⁿ有，koh 是我tú著，雞ah，雞ah，雞á nah會飛去電火柱á 頂leh？」

北風：「He. . .he. . .我贏a，這pái 我贏a！影變長a！影變長a！」

日頭：「H–！北風，你免歡喜了siuⁿ 早，hit 隻雞á kan-taⁿ hō͘ 影變長一sut-á niâ，我會sái hō͘電火柱á ê 影加長幾nā 倍！」

日頭beh 趕緊落西，想beh hō͘柱á 影變長。

北風：「烏雲！烏雲！去kā日頭tsa̍h起來！」

日頭：「Ah，我苦a！這聲輸thiám-thiám a，緊bih起來。」

就án-ne，日頭這pái 比輸koh m̄ 敢認輸，bih 幾nā 工lóng m̄敢出來。北風「一理通，萬理澈」，bē koh 烏白sái 力，後來就變做一個有力量koh 有智慧ê 風a。