《巫義淵台語常用字》

 | | | 轉寄

常用字_43....「數」

作者 巫義淵 2013.05.05

數有四讀音：1.*tshiok (雀) 2.siàu (少) 3.*sò͘ (素) 4.sok (縮)。這四個讀音中有兩個咱較有咧用，另外兩個真少人會曉用，甚至讀音都真少人知，其實若照說文的讀音有七八種，咱的語言提四種的讀音來用，應該是無不當，亦較無複雜。將四個讀音簡單先紹介其意義。第一個讀音：tshiok (雀)，是真細真密的意思。例如：數罟[tshiok-kó͘]。第二個讀音：siàu、是金錢收支的項目。例如：數目[siàu-ba̍k / bo̍k]。第三個讀音：sò͘、是本音、有四個含意。(1).siàu 的文音。(2).量詞。例：數次，數量。(3).運氣。例：劫數。(4).道理。例：禮數。第四個讀音：sok、是緊、迫切的意思。通作速。

重點字詞：
【數】1.tsiok (雀) 2.siàu (少) 3.sò͘ (素) 4.sok (束)。
【數罟】[tshiok-kó͘] (雀鼓)。
【數落】[sò͘-lo̍h] (素駱)。
【算數】[sǹg-siàu] (繏少)
【數數】[sok-sok] (束束)。

用例：
2000年國民黨倒擔，民進黨執政的時，有任命一位美女的經濟部長，在立法院被國親兩黨的委員一日到暗圍剿，無偌久就主動辭職落台，伊落台的聲明講，伊是《誤闖叢林的小兔》。兔仔本性是溫順咬其他動物，其另一面是活潑賢走，叢林對兔來講是危險的所在，除了有毒蛇野獸以外，猶有樹株是伊走的阻礙物，所以有一句成語呼作“守株待兔”就是一隻兔仔着樹株死亡的故事。孟子講“【數罟不入洿池】 [tshiok-kó͘ put-ji̍p ua-tî]” 就是講網絡真幼秀真密的網，使得入污穢垃圾的水池，若將網伸入去洿池，網仔隨時就報銷。這位部長在立法院被國親兩黨的立委【數落】[sò͘-lo̍h]【算舊數】[sǹg-kū-siàu]，使伊【數數】[sok-sok]來離開，解脫這個對伊來講是毒蛇猛獸的叢林！