《巫義淵台語常用字》

 | | | 轉寄

常用字_07....「石」

作者 巫義淵 2012.01.15

石有四个讀音：1.tsio̍h (石) 2.*si̍k (席) 3.sia̍h (夕) (4).si̍p (習)。
這字四個讀音平常時社會有咧講的有三個，另外一個是專用名詞一般較bē曉，總是講歸講，真濟人卻不知影所講的話是這字，親像石榴[sia̍h-liû]大家攏寫「榭榴」這是m̄-tio̍h ê。這四個讀音其中的si̍k是 tsio̍h 的文音，猶一個si̍p是漢藥名的專用字，這就是使用漢字費氣ê所在。下面就將這四個讀音紹介來佮大家分饗。

重點字詞：
【石】1.tsio̍h (石) 2.*si̍k (席) 3.sia̍h (夕) (4).si̍p (習)。
【石綿瓦】[tsio̍h-mî-hiā](借八聲暝蟻)。
【石榴】[sia̍h-liû](社硫)。
【石破】[si̍k-phò](席冇)。石破天驚。
【秋石丹】[siu-si̍p-tan](收習單)。(***《台日大辭典》tshiu-se̍k-tan [秋石丹]＝[消食丹]）。

用例：新ê科技工業發達，真明顯的打擊着傳統工業，除了人才ê培養無共以外，薪資待遇差別mā足大，科技工業的師父(技師)，一個月薪水十數萬到數十萬，傳統工業ê師父大約二萬至五萬之間；工作環境mā差真濟，一爿是 GMP ê空調大廈，一爿是鐵厝石綿瓦[tsio̍h-mî-hiā]ê工場，無形中造成一寡少年家對傳統工業無興趣，致使傳統工業續tshuā無師父。近來因時代變遷工業轉形，一寡人若欲tshuā頭路，若佮伊所學ê無對同，往往履歷表寄去攏親像石沉[tsio̍h-thiām]大海；若有一間科技公司欲倩人，風聲一下出來，石破天驚[si̍k-phò thian-king]，爭先恐後欲去應徵。猶有一寡大頭家為着欲《包二奶》將錢the̍h去中國投資，不專心做生理，卻甘拜於二奶ê石榴[sia̍h-liû]裙下做情場孝子，為着欲征服紅顏費盡精力金錢，有真濟人因按呢、落得人財兩空，雙頭無一ngauh，氣到掠狂、虛火盡 giâ嘴齒岸全腫，kui尾愛倚靠這帖秋石丹[siu-si̍p-tan]來加滋陰降火。

常用字: 石 tsio̍h 有四个讀音：1.tsio̍h (石) 2.*si̍k (席) 3.sia̍h (夕) si̍p (習)。

(1).tsio̍h：「石」原第八聲，做頭字tio̍h變調做第三聲
【石】[tsio̍h](1).話音。例：巖石。(2).量詞。例：一石[tsi̍t -tsio̍h]十斗也。

註：十升[tsa̍p-tsin]= 一斗[tsi̍t-táu] ，十斗[tsa̍p-táu]= 一石[tsi̍t-tsio̍h]。
【石頭】[tsio̍h-thâu]石的通稱。註：一般石頭是指卵石類。
【石版】[tsio̍h-pán]用光潔的石做ê，石印所用ê版。
【石印】[tsio̍h-ìn]一種印刷ê方法，先將原稿翕像(照相)，再將影像製入石版頂面而成。
【石碑】[tsio̍h-pi]將文字刻tī石碑頂面豎立來做記念，或標誌。
【石灰】[tsio̍h-hue]由石灰岩燒煉製成ê，加水則發熱，成做熱石灰，是工程重要原料。
【石英】[tsio̍h-ing]一種親像水晶瑪瑙等堅硬ê礦物。
【石蠟】[tsio̍h-la̍h]一種有機化合物，將蒸餾石油餘澤製成ê白 色固體，會當做燭。
【石綿】[tsio̍h-mî]形親像絲ê一種礦物，有彈力，脆弱易破不著火，吸入肺部後果嚴重。
【石女】[tsio̍h-lí/lú]生殖器構造無完全，無法度生育ê女子。
【石油】[tsio̍h-iû]對油井抽出ê原油，是炭與氫ê化合物，可提煉塑膠汽油等石化原料。
【石墨】[tsio̍h-ba̍k]一種會當做鉛筆心ê原料，或做機械潤滑劑的礦物，合煤當素體。
【石筍】[tsio̍h-sún]長條狀ê岩石，直立親像筍，用來做園藝飾物。
【石斛】[tsio̍h-ha̍k]屬蘭科常綠草本，產岩石頂，生津止渴，強壯益精，滋陰益胃。
【石葦】[tsio̍h-uí]水龍骨科乾燥全草，清熱消炎，收斂止血，治腎炎、膀胱、尿道炎等。
【石膏】[tsio̍h-ko]含水硫酸鈣C2 SO4 H2 O 加熱後失去結晶ê水，成做白粉末可雕塑模型。
【石膏】[tsio̍h-ko]含硫酸鈣之礦物，清熱降火，消炎利尿，治急性高熱，嚨喉腫頭痛等。
【石鹼】[tsio̍h-kiⁿ]＝肥皂＝雪文[suat-bûn]用油脂合成ê棄污洗滌物。
【石鹼石】[tsio̍h-kiⁿ-tsio̍h]屬滑石類，色暗灰或綠，軟而滑，真親像石鹼。
【石決明】[tsio̍h-kuat-bîng]＝九孔螺殼，治視力減退，綠內障，高血壓所致ê頭痛頭暈。
【石壁掰】[tsio̍h-phik-hông]＝鐵翻魂，消腫退掰，治一切無名腫毒，疔癤癰腫，肺炎。
【石菖蒲】[tsio̍h-tshiuⁿ-pô͘]藥名：明耳目，利九竅，補肝益心，除痰消積，消腫止痛。
【石蓮子】[tsio̍h-liân-tsí]睡蓮科植物，蓮子經風雨沈水浸而成，清心解煩，治食欲不振。
【石灰水】[tsio̍h-hue-tsuí]溶石灰在水裡所得ê無色透明液體。
【石灰岩】[tsio̍h-hue-gâm]介類合珊瑚ê遺殼沈積海中而成ê岩石。
【石灰乳】[tsio̍h-hue-jú]將石灰放在水裡，攪成白色，供消毒用途。
【石敢當】[tsio̍h-kám-tong]傳說是晉力士人名；後世刻其名於長形石豎鄉里巷口做守護。
【石油苯】[tsio̍h-iû-pún]石油熱到四十至七十度時，餾出ê部分，易揮發，做樹膠溶劑。
【石斑魚】[tsio̍h-pan-hî]體狹長扁側，頭烏，脣紅，尻脊有斑紋。
【石首魚】[tsio̍h-siú-hî]體扁嘴闊，鱗細，色黃，頭中有二塊小石狀，俗稱：黃魚。
【石鯛魚】[tsio̍h-tiau-hî]硬鰭類，鱗細嘴大，脊鱗較大，齒強，腹有烏條紋，產太平洋。
【石器時代】[tsio̍h-khì sî-tāi]有史以前極古ê時代，用石製器具，有新舊石器時代之分。
【石門水庫】[tsio̍h-mn̂g tsuí-khò͘]桃園境內，長16.5公里，面積8.15平方公里，1963竣工。
【石獅裮鐵甲 tsio̍h-sai mua-thih-kah】過頭勇ê款式。引申；錦上添花，假愛心。
【石獅亦驚人告 tsio̍h-sai iā-kiaⁿ-lâng-kò】形：訴訟真煩的事，勸勉人盡量不通較好。

註：古早舊官僚，若有人告與石獅有關係的事，愛將數千斤重的石獅扛去衙門做證物。

(2).si̍k：
【石】[si̍k]文音。
【石鐘乳】[si̍k-tsiong-jú]泉水含有炭酸石灰，對巖縫滴落，其石灰質凝結，纍下垂而成。
【石炭系】[si̍k-thàn-hē]地質學上古生界，地層構造ê一個時代。
【石投大海 si̍k-tô͘ tāi-hái】將石頭擲落大海。引申：攏無回應。
【石火光陰 si̍k-hó͘ⁿ kong-im】形：光陰ê迅速，目一下軟就欲過去。
【石爛海乾 si̍k-lān hái-kan】引申：永久不變的意思。鄭允端詩：石爛海枯，行人歸故鄉。
【石破天驚 si̍k-phò thian-king】極大的震動。或文字、議論ê出奇驚人。李賀詩：女媧煉石補天虛，石破天驚逗秋雨。

(3).sia̍h：原第八聲，做頭字愛變第三聲。
【石竹】[sia̍h]植物名。
【石竹】[sia̍h-tik]屬石竹科，多年生草本，葉狹，披針形，花有深紅、淡紅等色。
【石榴】[sia̍h-liû]果子名：落葉灌木，初夏開紅花，結厚皮果實，破裂吐鮮紅種子可食。
【石榴皮】[sia̍h-liû-phuê (phê)]安石榴科植物乾燥果皮，收斂消炎，止瀉、止血、殺蟲。

(4).si̍p：
【石】[si̍p]藥名專用音。
【秋石丹】[siu-si̍p-tan]藥名：一種用童弱石膏秋露水等製成的，滋陰降火消腫的漢藥。

簡辭：tsio̍h
石磐[tsio̍h-puâⁿ]、石椅[tsio̍h-í]、石條[tsio̍h-liâu]、 石蠔[tsio̍h-ô]、石螺[tsio̍h-lê] 、石蟳[tsio̍h-tsîm] 、 石地[tsio̍h-tē] 、石楯[tsio̍h-tún]、石橋[tsio̍h-kiô]、 石路[tsio̍h-lō͘]、石埕[tsio̍h-tiâⁿ] 、石坊[tsio̍h-hng]、 石磨[tsio̍h-bō]、石碖[tsio̍h-lún]、石崙[tsio̍h-lûn] 、石硃[tsio̍h-tsu]、石趼[tsio̍h-lan]、石筆[tsio̍h-pit]、石花[tsio̍h-hua]、石蛋[tsio̍h-nng]、石界[tsio̍h-kài] 、石紋[tsio̍h-bûn]＝石脈、石角[tsio̍h-kak]、石矔[tsio̍h-gîm]、 石磡[tsio̍h-khàm]、石鏨[tsio̍h-tsām]、石斧[tsio̍h-pó͘]、 石胎[tsio̍h-thai]、石洞[tsio̍h-tōng]、石泉[tsio̍h-tsuâⁿ]、石重[tsio̍h-tāng]、石礦[tsio̍h-khòng]、石龍[tsio̍h-lîng]、石柱[tsio̍h-thiāu]、石窗[tsio̍h-thang]、石草[tsio̍h-tsháu]、石仙桃[tsio̍h-sian-thô]、石藍花[tsio̍h-lâm-hua]、石頭狗[tsio̍h-thâu-káu]