《CTT出頭天園地》

 | | | 轉寄

魚肚kap肉燥

作者 Tsiúⁿ Uî-bûn 2006.01.29

Nā lí sit-luân ê sî-tsūn,
若　你　失　戀　ê　時　tsūn

Lâi Tâi-lâm, guá tshiáⁿ lí tsia̍h
來　台　南，　我　請　你　食

Hî-tō͘ kap bah-sò
魚　肚　kap　肉　燥.



Bô tshì bô kut,
無　刺　無　骨

Kan-taⁿ ū lām kiuⁿ-si ê kam-tiⁿ,
kan-taⁿ 有　lām　薑　絲　ê　甘　甜

Tsi̍t-uáⁿ hî-tō͘
一　碗　魚　肚

iù-mî-mî
幼　綿　綿

Khah iâⁿ tó tī siàu-lú ê hing-tsîng,
卡　贏　倒　tī　少　女　ê　胸　前

Tsi̍t-uáⁿ bah-sò
一　碗　肉　燥

Phang kòng-kòng
香　貢　貢

Bô su siàu-lú ê tshing-phang,
無　輸　少　女　ê　清　香



Nā lí su-hiong ê sî-tsūn,
若　你　思　鄉　ê sî-tsūn

Lâi Tâi-lâm, guá tshiáⁿ lí tsia̍h
來　台　南，　我　請　你　食

Hî-yō͘ kap bah-sò.
魚　肚　kap　肉　燥



Bô tshì bô kut,
無　刺　無　骨

Kan-taⁿ ū tsham kò͘-hiong ê tsu-bī,
kan-taⁿ 有　摻　故　鄉　e　滋　味

Tsi̍t-uáⁿ hî-tō͘
一　碗　魚　肚

Ku̍t-liù-siù,
滑-liù-siù

Khah iâⁿ pau-hî kap ián-o͘,
卡　贏　鮑　魚　kap　燕　窩

Tsi̍t-uáⁿ bah-sò,
一　碗　肉　燥

Hó bē thè,
好 bē　退

In-uī
因　為

Tse ū lām thó͘-tē ê bī-sò͘.
這　有　lām　土　地　ê　味　素


--11/25/2003 府城台南