《台灣另類牧師．醫師─謝緯》

 | | | 轉寄

5-02 赤水教會義務傳道

作者 陳金興 2011.09.18

當時設tī南投縣名間鄉ê赤水基督長老教會，已經二年無牧師牧會。1947年8月，赤水教會ê陳辛修長老tī田中火車頭遇著田中教會ê陳坤聰執事，陳坤聰關心赤水教會到今猶無牧師，就向伊推薦南投大同病院ê謝緯。陳辛修tī隔轉工就前往南投教會拜託吳天賜牧師與謝緯接洽，看會thang紹介伊去赤水鬥相共否(tàu-saⁿ-kāng bò͘ )？

謝緯雖然無閒病院ê業務，m̄-kú 伊mā真願意來擔任赤水教會ê義務傳道。仝彼年9月ê第一主日早起，謝緯就 kap南投教會許清廷執事同齊騎鐵馬到赤水教會。謝緯tī禮拜中講道，許清廷指揮聖歌隊。Tùi-án-ni了後，m̄-nā是禮拜日，連週間謝緯mā找時間去探訪會友、主持暗時祈禱會、家庭禮拜，並發動南投教會牧師、會友去赤水舉辦野外佈道會。若遇著無法度避免ê代誌阻擋tsiah會拜託伊ê小弟謝綸前往。

謝緯tī 1948年12月17日tī台灣基督長老教會台中中會受設立做教師；1949年2月28日受封立做南投教會牧師，並同時受聘做該教會無給職副牧師，協助吳天賜牧師。謝緯歷經「傳道師」、「教師」進一步koh「牧師」ê身份，tī赤水教會義務傳道連續三年，直到1950年8月聘陳添登傳道師為止。

謝緯tī 1951-1954年去美國進修，tsit ê期間赤水教會會友漸漸增加，禮拜堂廳ê座位不夠，tùi án-ne有計畫欲起新ê禮拜堂。開會決定欲買建築用地了後，教會寫phe去美國向謝緯報告tsit件 tāi-tsì。

Tī美國進修ê謝緯，建議in用「養豬」ê方式來籌備建堂經費。1953年9月陳添登傳道師離任，suah致使起禮拜堂ê事工擱置(khoà-hē) 三冬。謝緯回國了後，繼續關心赤水教會建堂ê 代誌，koh再鼓勵用養豬變賣所得ê經費來起禮拜堂。

赤水教會最後tī 1956年12月12日tī現址舉行新禮拜堂獻堂感恩禮拜。歷盡滄桑，而且數度遷徙ê百年教會，tī謝緯ê協助之下，穩定成長。