《台灣另類牧師．醫師─謝緯》

 | | | 轉寄

5-03 山地醫療序曲

作者 陳金興 2011.09.25

門諾會（Mennonite）是基督教ê一ê教派，1525年tī瑞士正式成立。Tī早期ê發展過程中相當複雜，koh定定看tio̍h in受壓迫，出現危機，最後tī荷蘭神父門諾西門（Menno Simons, 1496-1561）ê領導下，盡他氣力挽救勢面，才堅固tsit-ê教派ê基礎。自按呢，「門諾」ê名漸漸成做別人對這ê教派ê稱呼。

門諾會ê信徒siōng早主要分布tī荷蘭、德國kap前蘇聯等國家，現在以美國、加拿大khah tsē。1920年tī美國賓州Akron成立ê 「門諾會中央委員會」（Mennonite Central Committee, MCC，koh稱做「門諾會互助促進會」）成做門諾會從事醫療、救濟kap教育開發ê機構。MCC自1905年tō是tī 中國傳教，1949年對hia徙(soá)到台灣，最後一位宣教師tī 1952年離開中國。

經過二次大戰摧殘ê台灣可講是破破爛爛無一所在完全，各地亟待救援，尤其是偏遠ê山地。1947年，彼時擔任台灣基督長老教會山地傳道部長ê孫雅各牧師(註)，關心山地醫療資源ê欠缺，tú好koh知影門諾會打算欲離開漸漸hō͘ 共產黨控制ê中國，tùi án-ne利用度假ê零用金75 kho͘ 美金，坐船到上海去見MCC ê救濟工作人員，邀請in到台灣為山地原住民從事醫療傳道kap救濟工作。

自按呢，門諾會中央委員會（MCC）就組團到台灣考察，確定救濟工作ê需要了後，tī 1948年2月正式派遣一批工作人員來台，kap長老教會ê同工tī 1948年組成「門諾會山地巡迴醫療團」（Mennonite Medical Mobile Clinic, MMC），開始tī台灣山地展開巡迴醫療工作。

謝緯tī 1950年到1951年參加門諾會山地巡迴醫療團，這ē-sái講是伊從事醫療宣教事業ê「預備動作」(暖身運動)。這段寶貴ê山地醫療經驗，確實為謝緯帶來相當程度ê衝擊，mā koh-khah堅定伊日後從事醫療宣教ê決心。

............................................................................................................

(註)
山地醫療團的催生者，孫雅各牧師（James I. Dickson, 1900-1967），當時除了tī台灣神學院教書以外，每禮拜六就開吉普車(jeep)進入山區逐所在去傳道，伊是台灣原住民傳道事工的開拓者。