《台灣另類牧師．醫師─謝緯》

 | | | 轉寄

7-01 山kap海ê醫療樂章

作者 陳金興 2011.11.20

除了tī南投大同病院看診以外，具有「拓荒者」精神，koh勇敢接受挑戰ê謝緯，開始參與真tsē醫療kap宣教事業ê推展工作。包括1955年協助開拓中寮佈道所、籌畫kap興建埔里基督教肺病療養院、埔里基督教山地病院；1960年開始到北門免費診所義診，成做第一位替烏腳病患開刀ê外科醫生；1964年創辦二林基督教病院等，tī埔里、台南北門以及彰化二林ta̍k所在留落伊súi ê足跡。

● 開拓中寮佈道所

南投教會tī 1909年設立，經過四、五十年了後，教勢擴展到附近鄉鎮，中寮鄉(舊名鄉親寮)mā有bē少會友。中寮鄉距離南投鎮約有10公里，屬偏遠山區，當地ê會友前往南投教會做禮拜路途tiàu遠，koh交通不便。禮拜日信徒tùi中寮山區行路到南投教會做禮拜，往往tsi̍t-tsoā就ài兩點鐘以上。謝緯非常體諒會友ê辛苦，禮拜日中晝lóng會留in tī大同病院做伙吃中晝。

1865年馬雅各醫師來台宣教，台灣基督長老教會為tio̍h紀念tsit擺有意義ê宣教歷史，tī 1954年通過設教百週年紀念「教會倍加運動」（P.K.U.）案，建議全教會應該把握時機，盡全力傳道kap開拓教會，向望(ǹg-bāng)教會、信徒會當倍增，來當做10年後設教百週年紀念大典ê奉獻禮物。謝緯kap小弟謝綸tùi án-ne 就kap吳天賜牧師同齊去中寮開拓教會。

1954年10月中，謝緯就kap吳坤淵、陳梓和專工到中寮鄉租一間店來做臨時ê佈道所。Koh tī 1955年1月聘台中中會巡迴牧師呂春長舉辦連續5工ê佈道會，這成做南投教會分設「中寮佈道所」之開始，mā是台中中會tī倍加運動中設立ê第一間教會，若tī全總會是排名第二。1956年3月由黃麗川（縣警局長）、陳國亮（縣府民政局指導員）kap吳天賜牧師向南投糖廠買土地興建禮拜堂，tī 12月27日落成，舉行獻堂感恩禮拜。續落來，除了謝緯前往義務講道以外，南投教會ê謝綸長老、李慶耀長老kap陳梓和長老等人mā前往協助教會事務。長期當做南投教會支會ê中寮佈道所，tī 2006年1月17日升格為獨立堂會。



● 謝緯(前排左五)kap中寮教會領洗禮ê信徒合照。(1960年)
前排右二為南投教會陳梓和；右四為張溫柔。


謝緯除了協助開拓中寮教會以外，伊mā長期tī hia義務傳道、參加週間ê聚會。當時南投kap中寮間，暗時無公車thang坐，中寮只靠一條猶未khōng tiám-a-ka ê石頭á路對外聯絡，彎來彎去，真tsē所在peh崎koh落崎。謝緯常常為tio̍h參加拜五暗ê家庭禮拜，家己tùi南投騎鐵馬到中寮。聚會suah，謝緯kap會友phò-tāu，關心in ê生活狀況。有時，雖然信徒一再留伊tī in tau過暝，但是為tio̍h隔工iáu有真tsē tāi-tsì ài做，伊猶原家己透暝騎一點外鐘ê鐵馬，tsiah tńg來到南投。