《台灣另類牧師．醫師─謝緯》

 | | | 轉寄

7-02 起造第一間肺病療養院

作者 陳金興 2011.11.27

1953年12月，孫理蓮親身去到美國水牛城探望謝緯，koh邀請伊tńg來台灣了後ē-tàng同齊tī埔里地區起病院，為原住民服務。謝緯除了以醫生ê角度關心台灣當時眾多ê肺癆病患以外，mā因為伊ê大兄長期染tio̍h肺癆，hō͘ 謝緯感受tio̍h病患kap家屬ê痛苦，促成伊積極設立療養院ê行動。因此，謝緯tùi美國tńg來了後，to̍h開始進行療養院ê興建工作，同時mā kap孫理蓮同齊創辦基督教山地中心診所。

埔里鎮，tī南投縣ê北旁，徛台灣地理中心。1955年hit時ê人口5萬goā人，tī全縣13鄉鎮中間，埔里鎮為人口siōng tsē koh ba̍t-ba̍t-sī(ba̍t-tsut-tsut稠密) ê所在。其中原住民人口大約佔全縣人口數4%。台灣早期，tì-tio̍h肺癆病ê人有夠tsē，山地感染ê死亡率比平地khah高出兩倍。

1955年ê年初，tī成立了「中寮佈道所」了後，謝緯to̍h開始籌建肺病療養院。依當時參與籌備工作ê李慶耀講，原本籌備小組計畫將療養院設tī南投鎮三塊厝ê「園á」，因為tī-hia有謝綸ê現有土地以及厝宅thang提供做使用。M̄-kuh，in kap孫理蓮討論了後，孫理蓮認為療養院應該設tī埔里山區khah適合。

Tùi án-ne，謝緯4月to̍h邀請南投教會李慶耀kap陳梓和做夥到埔里四界探聽詢問，打拚tshoē土地。當時ê埔里教會牧師羅文福，兼任埔里鎮鎮民代表會主席，謝緯去kā伊拜訪，並說明beh起療養院ê計畫。經過羅文福積極kap有關單位liân-hē了後，興建ê地點tsiah有下落，最後選 tī埔里近郊，屬tī公有地ê鯉魚潭畔。Tùi án-ne，籌備小組向埔里鎮公所協商了後，鎮公所同意免費提供土地使用，並約定該筆面積二甲五分goā ê土地，kan-ta限定做興建醫療院ê路用。

續落來辦理相關手續。本來beh將土地所有權登記tī孫理蓮名下，soà因為伊是外國人，無符合法令要求。為tio̍h beh the̍h-tioh使用權，謝緯就將戶籍soá到埔里鎮，由伊登記做土地所有人。該筆土地面頂ê杉樹栽(地上物)費用由謝緯、李慶耀kap陳梓和三ê人共同負擔，各付5千元。5月中簽約完成了後，籌備小組to̍h隨時進行規劃tī tsit塊土地。

Tsit間療養院ê建設工程，包括藍圖設計、房舍建造以及監工委託謝緯ê 阿舅吳可免負責。經過八月日了後，謝緯期待真久ê「基督教肺病療養院」興建完成，tī 1956年正月26日開幕，這是台灣第一間肺病療養院，（後來稱做大湳山地療養院），大部分收容治療原住民患者。設tī湖畔ê tsit間療養院，tiàm tī幽靜山林ê中間，除了有幾間用磚仔起造ê細間病房以外，iáu有一間灶腳、一間禮拜堂kap幾條á步道，是療養ê好所在。