《台灣另類牧師．醫師─謝緯》

 | | | 轉寄

7-05 謝緯ê雙手真有價值

作者 陳金興 2011.12.18

自1955年10月起，謝緯就開始tùi南投鎮到埔里鎮為原住民義診。孫理蓮bat講：「謝緯ê手實在太有價值lah」。伊講tsit句話ê意思，表明謝緯ê手是beh為病人開刀， m̄是用來駛車ê。所以，為tio̍h無欲hō͘ 謝緯過頭操勞，tī伊41歲生日ê 1957年3月2日hit工，病院特別買一台紅色ê吉普仔車hō͘ 病院kap伊使用，mā聘請一位司機，名叫做張輝坤。



●陪伴謝緯tī埔里山區nǹg來nǹg去從事醫療ê埔基「紅車」，tī 1975年功成身退。




真無閒ê謝緯為tio̍h患者ê需要，tī南投kap埔里兩所在走tsông。伊一方面為病人開刀，一方面又koh是護校ê講師，需要kā學生上課；有時tsūn參加會議，暗時mā常常去替無方便到病院就醫ê患者khiā家「往診」。

1964年3月初4 ê日記頂面有按呢記載講，hit工伊早起tī埔里上課二小時，十二點goā kap司機tī鎮內ê路邊攤吃中晝，然後到鯉魚潭療養院看診，下晡二點為病人開刀。手術完，koh外出往診。暗時八點二十分tī愛蘭教會開會到九點半tsiah起程tńg去南投鎮，十點五十分到厝裡。大同病院已經休診，tsit時tsūn soà有人來tshi̍h 電鈴，謝緯就kā患者看病，續落來koh出外往診。

謝緯每pái beh替病人手術ê時，一定lóng會代先祈禱。因為驚講電火無夠光，koh再由工作人員提蕃仔油燈(煤油燈)來照，伊真注意手術間各種設備ê安全以及對病人手術了後負責任ê態度。3月初9這tsit工，謝緯tī埔里替病人手術toā-ām-kui (甲狀腺腫大)。Teh手術ê時，m̄知是綁ê線lēng去，á是其他問題，病人ê血一直tsoāⁿ出來，伊趕緊重新處理khang-tshùi，tsiah止血。但是，到暗時十點半，埔里ê護士khà電話hō͘ 已經tī南投厝裡ê謝緯，講病人koh有狀況，伊隨時tùi南投趕去埔里處理。Hit暗koh再tńg來到南投ê時，已經teh-beh半暝二點。