《台灣另類牧師．醫師─謝緯》

 | | | 轉寄

7-06 尊重生命ê護校老師

作者 陳金興 2011.12.25

山地中心診所ê原住民患者tshoē到無夠額ê護士thang來kā in照顧，hia ê醫療人員mā嚴重欠缺，in彼此中間ê話語koh無相通。Tī tsit款情形下，謝緯kap孫理蓮參詳了後，為tio̍h beh栽培護理專業人才，koh解決因為語言、風俗kap生活習慣無仝來產生ê溝通問題，就決定開辦護士訓練班，招收初中畢業ê原住民少女來讀2年ê書。

Tùi án-ne，該中心診所tī 1958年2月tī埔里基督長老教會設立了「埔里基督教山地護理訓練班」，後來名稱改做「埔里基督教病院附設護理學校」（簡稱「埔基護校」），並且聘請盧坤山醫師、潘啟揚醫師kap謝緯同齊擔任tsit間學校ê講師。

謝緯到埔里除了tī肺病療養院kap山地病院門診部替患者看病、開刀以外，當埔基護校成立ê時，伊to̍h開始教傳染病學、精神醫學、復健矯正學、細菌學、生理解剖學、寄生蟲學kap藥物學。謝緯上課ê時，tī黑板面頂kut-la̍t寫、打拚畫，真認真教書，無joā致意學生是m̄是專心斟酌teh學習。伊ê華語無真標準，koh參雜tio̍h日語，以及日本腔口ê英語teh上課，常常致使tsiah-ê慣勢山地腔華語ê學生，聽kah「霧煞煞」，但是伊iáu是無嫌費氣講到下課，了後koh隨時去看診。

埔基護校ê課程為期二年，畢業ê學生就留tī病院做護士，無toh派到大湳肺病療養院去服務。謝緯除了tī課堂上講授醫學課程以外，mā常常以實務教導學生按怎處理急救ê病人，包紮孔嘴以及注射。Tī開刀房為患者手術ê時，謝緯就kā在場協助ê五、六位護士解釋各種手術器材ê用途。

埔基護校第一屆畢業生ê史惠貞，bat擔任過謝緯開刀時ê助手。伊講，有一pái當伊kap謝緯「上刀」ê時，bat kap另外一位護士偷偷á teh開講，koh學謝緯開刀ê面tshiuⁿ kap動作，結果無小心soà the̍h tio̍h m̄-tio̍h ê 剪刀。謝緯隨時將m̄-tio̍h ê手術刀hiat tī土腳，別ê護士隨時趕緊 koh the̍h正確ê剪刀hō͘ 伊。


等開刀息，謝緯叫in入去伊ê辦公室，對in講：「病人tī咱ê手中，任何ê動作lóng bē-sái têng-tâⁿ ê……tsit項事bē-tàng hòng-hòng。一旦入去開刀房，病人寶貴ê生命就掌握tī咱ê手裡，設使tī開刀ê過程我若有疏忽ê所在，lín護理人員mā有責任提醒醫生，因為，咱ê工作lóng仝款重要。」

這是謝緯尊重生命ê態度。


護校ê學生來自台東、花蓮、宜蘭、台北、桃園、新竹、苗栗、台中、南投、嘉義、高雄kap屏東各地ê原住民，包括泰雅爾族、太魯閣族、賽夏族、布農族、鄒族（當年稱曹族）、阿美族、排灣族、魯凱族、卑南族kap客家、漢人共172人（170名女性、2名男性）。Tsit間學校因為siūⁿ 過偏遠，師資kap設備koh不足，tī 1973年beh申請立案無通過soà來停辦。總計tī 15年中間，辦了12屆，攏總有151名護士畢業。