《台灣另類牧師．醫師─謝緯》

 | | | 轉寄

8-01 鹽鄉ê烏腳病

作者 陳金興 2012.01.01

時序進入1960年，謝緯tī埔里山區起肺病療養院，並擔任基督教山地病院院長，koh tī埔基護校任教，iáu tio̍h兼顧南投大同病院ê業務，有時mā應邀tī禮拜日講道 á 是開會，已經非常無閒。Tsit時koh接受一項特別ê任務kap挑戰，就是謝緯將伊ê醫療觸角延伸到海邊，用伊hit雙非常有價值ê雙手，tī台南縣北門鄉替貧苦無助、痛苦無依ê烏腳病患者進行截肢手術，對按呢嘉惠了上千名ê患者，koh一pái為台灣醫療史記錄光輝ê一頁。

● 醫治烏腳病ê鐵三角

1960年美國宣教師，基督教芥菜種會ê創辦人孫理蓮為tio̍h救助烏腳病患，tī台南縣北門鄉買地，設立「北門憐憫之門免費診所」（Pak-mn̂g Mercy’s Door Free Clinic），免費醫治kap照顧病患。孫理蓮負責募款；北門鄉當地醫師王金河tī免費診所看診以及照料病患；南投鎮ê謝緯醫師義務為患者開刀。對按呢，一位美國人kap二位台灣本土醫師tī偏遠ê濱海地區從事醫療慈善事業。Tsit三ê人被稱做醫治烏腳病患ê「鐵三角」。In中間，謝緯kap王金河兩位醫師bat分別得tio̍h立法院「厚生基金會」ê第二屆（1992）kap第七屆 (1997)「醫療奉獻獎」。

● 鹽鄉怪病

台灣早tī日治時代ê 1906年tō發現烏腳病 (black fo͘t disease)， 但是案例無tsē。到了五○年代tsiah開始大流行，其中koh以嘉南沿海一帶ê布袋、義竹（嘉義縣）、北門、學甲（台南縣）四鄉鎮siōng嚴重，對當地居民有真大ê威脅。1953年kan-ta八掌溪下游一帶ê烏腳病患者就有533人，全台各地mā有bē少ê案例，但是無被重視。1956年台南縣安定鄉復榮村居民發生tsit種怪病，當時全村553人中間，有490人出現皮膚有角化現象，比例達九成以上。

Tsit-ê tāi-tsì透過新聞報導了後，省衛生處以遷村為對策，kā kui-ê村搬到距離復榮村大約2~3公里外，另外建立一個新ê村，名叫大同村。Tsit時tsūn，tsiah引起醫界kap學者，親像台大醫學院葉曙教授、陳拱北教授、曾文賓教授、連倚南教授等極度ê重視kap關切，積極投入研究ê行列，發掘病源，規劃防治措施。

為tio̍h防止疫情擴散，建議政府設法做具體有效ê改善，醫療行動tsiah j熱烈展開。除了早期「舊流行區」以外，陳拱北調查烏腳病ê流行情況了後，發現koh有新ê流行區，親像台南縣ê鹽水鎮、新營市、安定鄉kap其他西南沿海鄉鎮mā發現有烏腳病患。Tsiah-ê流行地區ê lim水tī過去lóng用深井水，直到1978年全面改做水道水了後，烏腳病疫情tsiah漸漸得tio̍h有效ê控制。

台南縣ê北門鄉，以前被稱做「北門嶼」，到1945年tsiah改名北門。因為倚海，土地鹽分非常高，水源有限，而且淺水井因為水質過頭鹹，無適合hō͘ 人kap牲畜(tsing-seⁿ) lim食，所以，in引進挖掘深井（koh稱地河井）ê方法。

講到烏腳病ê症狀，根據患者描述，病發ê時ná老鼠teh囓(gè 啃)腳，腳趾頭á 與手趾頭á會反黑、潰爛、發炎，mā會發出一陣陣ê臭味。病情萬一惡化，唯一治療ê方法，就是手術切除患部。因為真臭，厝內ê人lóng m̄敢倚近，甚至有人kā患者 hiat tī厝內，遠走他鄉一去不回。真多患者因為生活無人照顧，有人自殺。