《台灣另類牧師．醫師─謝緯》

 | | | 轉寄

8-07 謝緯化解免費診所關門ê危機

作者 陳金興 2012.02.12








Tùi án-ne，謝緯寫信hō͘ 孫理蓮，表示家己已經kap王金河談過相關ê問題。伊感覺有tsit koá tāi-tsì必須ài說明清楚，tsiah ē-tàng化解in二人之間ê誤會：

第一、謝緯bat前往會計處查閱帳簿，感覺一切lóng無問題。免費診所teh處理外界捐款方面，mā真清楚。但是，問題在tī in無hō͘ 孫理蓮看會計報表tsiah產生誤會。若芥菜種會需要，in會kā報表，包括過去到現在ê，全部lóng交hō͘ 她。

第二、tī建築新院舍ê時，王金河in有更改計劃，khàm khah貴ê厝頂，tsiah增加總支出。Tī工程進行期間，王金河向外界募集十二萬元，其中二萬元指定beh購買藥品，mā已經買，tshun落來十萬元。In向芥菜種會ài四萬元，但十四萬元並無夠所有ê建築費用，無夠 ê費用lóng由王金河支付。

第三、免費診所ê員工反應，in感覺芥菜種會ê專員去視察ê時，除了無詳細公平檢視以外，伊ê態度就kah-ná是主人對待奴僕一般， hō͘ 北門ê人感覺hit位專員不如孫理蓮ê友善。Koh講，當孫理蓮到北門ê時tsūn，免費診所ê工作人員想beh單獨kap伊講話ê時，不時hō͘ 芥菜種會ê人阻擋，或是孫理蓮無時間。In想beh有koh-khah tsē ê時間kap她談話。

第四、王金河醫師非常希望孫理蓮ē-tàng繼續烏腳病ê醫治工作，若她反對王醫師繼續留tī免費診所，伊願意離開。謝緯感覺王醫師用了真tsē家己ê錢tī工作上，但是伊卻表示為tio̍h無欲妨害免費診所ê運作，願意全部放棄。這就thang 看出伊非常看重tsit-ê工作，所以謝緯感覺孫理蓮應該hō͘ 王金河繼續tī這個工作上付出。

了後，王金河koh一pái去台北。當伊tī火車頂ê時，就一直祈禱，祈求主賜hō͘ 伊一粒 「冷靜」ê心。到了芥菜種會事務所，孫理蓮kap董大成已經tī-hia thèng候。伊對孫理蓮講：「妳是頭家，我bueh尊重妳。但妳是慈善家，á我是醫生，tī醫學方面，我有我ê專業。另外，妳交代十分，我做十二分，我將免費診所ê工作，當做家己ê事業teh做。我bē曉做出失禮上帝ê事。」

經過和平使者謝緯ê tshiâu-tshik（斡旋）了後，m̄-nā消除孫理蓮ê憤怒kap誤解，同時mā洗清王金河ê冤屈，增進兩人之間ê了解， hō͘ 「北門免費診所」會得thang渡過面臨關門ê危機，繼續經營。

兩年了後，謝緯回想tsit段往事ê時，tī日記頂面按呢寫： 「…古早人講『人生kah-ná夢』，真正感覺是án-ne。想當初設立tsit-ê北門診所，買土地kap建設方面有種種困難，我kap王醫師lóng同齊來挑戰tsit件事。Koh來就是王醫師kap孫牧師娘之間有一koá誤會，最後有排解。到taⁿ一koá真快樂ê事、痛苦ê事、悲傷ê事tī我ê腦海裡tńg-se̍h。Ǹg望通過tsiah-ê試煉，tùi今仔日起，北門ê事業，上帝beh hō͘ 它koh-khah堅固，ǹg望是án-ne。」

音樂kap行圍棋是謝緯tī真無閒中間ê娛樂。伊時常對旁觀者講：「人生ná親像一盤棋，有輸mā有贏，咱mài計較輸贏，只要專心、認真，抱tio̍h喜樂ê心情，盡本分去做就好lah。」