《台灣另類牧師．醫師─謝緯》

 | | | 轉寄

9-01 謝緯起先辦基督教病院ê念頭

作者 陳金興 2012.02.19

謝緯自1960年1月起接任南投教會ê第二任牧師，koh擔任台中中會第30屆中委。為tio̍h hō͘ 基督徒醫療服務團 ē-tàng順利組成，來服務貧苦病患，謝緯tī 1961年5月中親自拜訪中部地區真tsē基督徒醫生，受訪ê醫生lóng大受感動，mā願意kap謝緯同齊籌組醫療團，並參加義診活動。從事醫療傳道工作，醫療團ê醫生每禮拜固定奉獻一工，無分日暝teh參加巡迴看診。


Tùi án-ne，tī眾人ê期待中，「台中中會沿海醫療團」（簡稱「中中醫療團」）tī 1961年6月6日tī彰化教會正式成立，謝緯被選做醫療團首任主席。中中醫療團ê成員包括醫生、藥師、護士、檢驗師、牧師kap司機等。該醫療團自1961年8月18日開始tī彰化縣草港地區從事醫療傳道工作，醫療團ê醫生每禮拜固定奉獻一工，無分日暝teh參加巡迴看診。
●中中醫療團團員

　　當時tī台灣ê基督教病院以及療養慈善機構，lóng由外國人一手包辦，包括出錢創辦以及經營，thang kā in稱做「外國人病院」（Foreigner Hospitals）。謝緯kap真tsē外國ê慈善機構接觸kap合作過，包括門諾會、世界展望會以及芥菜種會等。伊看tio̍h tsiah-ê外國人為台灣做出hiah-ni̍h tsē ê貢獻，深深感受到tsit-kú ê台灣，非常需要培養在地人「自立、自治、自養」ê責任，來進一步彰顯台灣人ê尊嚴，tùi án-ne確立了伊自辦「基督教病院」ê堅定信念。謝緯講：「咱mā會、咱也ē-tàng辦基督教病院……全省醫師總人數中，基督徒醫師占百分之二十ê高比例，為什麼一定tio̍h靠外國人，才ē-tàng做到neh？……番薯beh發根、ài自立、tio̍h自覺，應該是咱家己辦，家己打拚ê時tsūn lah」。

當時擔任台中中會副議長ê謝緯，就tī 1964年1月成立了「中中基督徒醫師聯誼會」，開始積極籌劃成立病院，並四界募款，各種籌備工作繼續teh進行。Tsit間病院iáu未正式落成tsìn前，就已經開始對外看診，並依中中醫療團ê模式，每一位醫生輪流安排每禮拜前往二林看診一pái，包括陳曜煊看婦產科、侯安息負責內科kap小兒科，謝緯專責外科等。10月20日，謝緯召集幾位醫生開會討論有關興辦病院ê tāi-tsì，有一koá醫師為tio̍h tsit間病院是m̄是ē-tàng順利開辦表示憂心。Tsit時陳曜煊卻真有自信講：「絕對有辦法」。因為tsit位醫生tsiah-nih積極koh有把握ê發言，使謝緯對tī起病院ê信心大受鼓舞。