《台灣另類牧師．醫師─謝緯》

 | | | 轉寄

11-01 死，就ē-tàng歇睏

作者 陳金興 2012.05.06

謝緯有時siān-tauh-tauh，beh出門ê時，關心ê牽手lóng會問他：「為什麼無愛ke歇睏一下？」謝緯ìn講：「死，就ē-tàng歇睏。」謝緯ê大囝婿汪清醫師問他：「你ê工作tsiah-ni̍h-tsē，你是憑什麼來完成neh？」謝緯回答講：「認bat每一件工作ê價值，koh再運用堅強ê意志kap信心來完成它。當上帝kap你同在ê時，你就ē-tàng做任何ê工作。」謝緯認為歇睏是一種奢侈（tshia-tshí）。

謝緯過身前ê 10年(1960-1970)，他ê工作量達到siōng高峰，mā實在hō͘人oh得相信。估計tsit期間他一禮拜中間所走ê醫療行程，包括南投、埔里、二林以及北門，至少500公里以上。加上1964年了後，koh續落來擔任台中中會副議長、議長、總會副議長、議長等職務，需要時常出外開會，或是處理教會相關事務。厝內底ê人kúi-nā-pái ài謝緯珍惜家己ê身軀、棄sak一koá工作ê時，他卻講：「趁我iáu強壯有精神ê時，多做一koá代誌。Kìⁿ-nā珍惜生命ê人，就會喪失生命。」

他就是按呢拚命teh工作，往往一連kúi-nā工，每工工作16個小時以上。雖然按呢，他竟然只要真少ê食物kap睏眠，就ē-tàng保持充沛ê活力kap堅強ê意志。每pái謝緯全心投入工作ê時，lóng是兩lúi目睭眼神真有氣力，如準向世界宣告：無任何一種外在ê壓力thang動搖我ê信念！因為謝緯tsit種對tī工作ê全心投入，他真少有家己ê時間，「歇睏」對伊來講，koh-khah是一種「奢侈」。

謝緯夫人就bat感慨按呢講：「莫怪他會thiám kah倒落去，就算是鐵phah ê身體，mā bē堪得這呢久長ê精力透支ah！」

1966年正月20是二九暝，大同病院ê員工lóng tńg去圍爐，只tshun家己厝內ê人teh食團圓飯。但是，nā有患者來看診，謝緯就家己看，家己配藥仔。Hit暗半暝十二點有一ê人來khà門，拜託謝緯往診。雖然已經真thiám，但是他認為tsit種時tsūn會來求診ê患者一定真嚴重，所以謝緯趕快外出往診。原來是一位吐血ê患者，家境非常sàn-tshiah，kan-ta母仔子兩人相依為命。看診了後，謝緯表示m̄免the̍h任何醫藥費，但是患者ê厝邊卻堅持beh替患者付錢。謝緯心內想，hō͘ 對方有做善事ê機會mā bē-bái。所以，包括往診、注三支射kap藥仔錢，kan-ta the̍h十塊銀，這是他hit年所做ê最後一件善事。
● 謝緯伉儷。(1969年)

1967年正月初8 tī日記頂面按呢寫：「昨暝hō͘人叫起來三pái看患者，今仔日早起起床ê時間soà比以往khah晚，差不多七點五分。所以趕快洗面來赴早起七點ê家庭禮拜。像tsit種真冷ê暗時hō͘人叫起來二、三pái，身軀確實是真thiám。但是我iáu是beh 按呢做。若是因為家己ê pîn-toāⁿ，本來應該ē-tàng被救ê患者，致使無時間thang被救ê時tsūn，我就感覺對tsit-ê患者真失禮。雖然真thiám，猶久mā是beh起來，若無按呢做，我會對不起家己ê良心。」