《台灣另類牧師．醫師─謝緯》

 | | | 轉寄

11-02 一分鐘 ê 遺憾

作者 陳金興 2012.05.13

中年ê謝緯，因為時常工作過頭，koh真少有充分歇睏ê時間，感覺家己ê左旁胸坎kap胃有時tsūn會痛。本身是醫生ê謝緯，家己診斷病狀，認為左旁胸坎ē痛，可能是冠狀動脈硬化引起血管塞teh，或是心包油(心肌梗塞)。他mā家己懷疑是m̄是患tio̍h胃癌。感覺身軀不爽快，他想欲減少工作量，soà m̄知欲tùi tah-ūi減起。所以，他只有「準備心」，若上帝beh召他tńg去天家，他mā樂意順趁上帝ê旨意。

謝緯ê行程排kah真滿，莫怪他tī 1968年12月13日ê日記頂面會siàu念「家」ê溫馨：「Tùi tsit-ê禮拜日開始lóng連續出門，四界奔走，真thiám。明仔載（禮拜六）ē-tàng tī厝裡，感覺真輕鬆。」Iáu有，1969年ê聖誕暝mā講：「最近常常外出，tsit兩三工無出外，hō͘ 我感覺家庭是我siōng爽快、siōng溫暖，歇睏ê所在。」

1970年6月16日暗時11點goā，謝緯當teh北門烏腳病院為患者開刀，忽然接tio̍h二林基督教病院急診室值班護士ê電話，通知謝緯二林有病人需要開刀。謝緯向對方表示，因為北門ê手術tio̍h ài到半暝tsiah會完成，所以他明仔載tsiah ē-tàng到二林。謝緯吩咐護士，先替患者phah止痛藥仔，an-tah病人ê情緒，替患者辦理toà院手續。



●謝緯行醫所用ê醫療公事包，
是丈人楊雲龍醫師送hō͘ 他 ê 50歲生日禮物。




謝緯翻頭繼續開刀，直到隔工（17日，禮拜三）半暝點半tsiah離開北門，趕tńg去南投。當他到南投ê時，已經是透早4點。謝緯小khoá歇睏了後，tī 6點半寫一張信hō͘ 總會副議長高俊明牧師。

7點參加家庭禮拜了後，謝緯就前往埔里基督教病院kap肺病療養院巡迴看診。10點40分，謝緯ê車被發現停tī潘啟揚內科診所門口，原來是過分疲勞ê謝緯tī車內睏去。潘啟揚醫師請他入去內面歇睏，他講m̄免，因為beh tńg去南投。Kap潘醫師講息，他中晝tńg來到南投大同病院，接替夫人楊瓊英看診。食過中晝飯，他去房間內 bîn-tsi̍t-ē。

但是，無到一時仔久，夫人to̍h看tio̍h謝緯雄雄tùi眠床頂落來，他iáu閣愛睏愛睏，一面行，一面tshiāng-kha-ke teh穿襪á，如親像「金雞獨立」。謝緯急beh出門，牽手看tio̍h tsit款情形，心內真毋甘，苦勸他多歇睏一下，並關心問他講：「你tsiah tùi埔里tńg來無偌久，歇睏iáu未到10分鐘koh ài出去，按呢敢未siuⁿ thiám？」

謝緯應她講：「Bē。我必須二點到二林。我若慢一分鐘到病院，病患就加痛苦一分鐘，我bē-sái hō͘ 病人加受一分鐘ê痛苦。若是我ē-tàng khah早到，甚至ē-tàng加救一條生命！」

一向真有責任感ê謝緯，koh kā太太講，hit工到二林看完病患了後，beh去彰化，有人beh請他食暗頓，所以可能會khah oàⁿ一時仔 tńg來。1點30分，m̄願勞煩別人ê謝緯，一ê人親身開車前往二林。