《台灣另類牧師．醫師─謝緯》

 | | | 轉寄

11-03 謝緯 tiàm tī 世間 ê 最後一刻

作者 陳金興 2012.05.20

1970年6月17日下晡2點 goā，當 teh 大同病院協助看診ê汪清醫師，忽然看 tio̍h 二位警察入來，無出聲，恬恬 khiā-tī 診療桌頭前。大約過了十秒鐘，其中一位，面貌肅穆而且神情沉重，the̍h 一張小字條 hō͘ 汪清，對他講：「這是名間派出所 phah 過來 ê 電話記錄，lín 趕緊去現場處理！」汪清一下看，頂面 kan-ta「大同病院院長謝緯身亡。」拾字。

這 kah-ná 是去 hō͘ 雷公 hmh-tio̍h ，重重 phah tī 汪清身上。回想 tio̍h tú-tú 家己 tsiah 親目看謝緯出門，汪清一時 m̄ 知 beh 按怎 tsiah 好。他 m̄ 敢驚動 tī 客廳看書 ê 謝緯夫人，隨時私底下 tshoē 黃天寶（南投縣醫師公會總幹事）kap 謝載烈（大同醫院同仁）同齊趕去車禍現場。

謝緯 tī 名間發生車禍 ê 消息，真緊就傳回10公里外 ê 南投街仔。大同病院隔壁 ê 一位阿婆，走去問楊瓊英：「聽講阿緯先生 ê 車發生事故？」Kui 面僥疑 ê 楊瓊英問講：「敢是真 ê？」四圍 ê 氣氛開始變 kah 真沉重，她ê腦海內，隨時浮出一種歹 ê 兆頭。雖然 m̄ 知影 tsit ê 消息是 m̄ 是真 ê ，楊瓊英目頭 kat-kat，隨時請人 tshoā 她去現場。

因為無清楚車禍發生 ê 確實地點，心內真著急 ê 楊瓊英，坐tī o-to-bái 頂，沿路兩旁四界 tshoē，卻 iáu 無看 tio̍h 車 ê 影跡，mā 無發現任何車禍事件。她一路祈禱講：「上帝 ah！求祢保守阿緯，留他 ê 活命。他若因為車禍致使斷腳斷手，我願意照顧、幫贊他一世人……。」 到名間派出所聽警方 ê 說明了後，她就 kah-ná 飛仝款，趕去現場，卻發現謝緯早 to̍h 無 khùi-si-á，已經死。楊瓊英捶心肝 koh tsàm 腳，m̄ 敢相信目 tsiu 前所看 tio̍h ê 一切。

她問上帝：「Ná-ē 按呢？我無法度理解！」

下晡1點55分，謝緯開車經過名間鄉，急 beh 往二林為患者開刀，意外 lòng　tio̍h 公路對向 ê 路樹，車禍身亡，結束他55年tī 世間 ê 日子。他死 ê 時 tsūn，身軀真完整，kah-ná 安然 teh 睏，無流血；無別人 tī 車內傷亡；他 ê 車 mā 無 lòng　tio̍h 路邊 ê 人。小轎車左旁 ê 車門開開，謝緯坐 tī 駕駛座裡，頭殼 kap 肩胛頭 tshun 出 tī 車外，被發現 ê 時，謝緯已經斷氣。





●謝緯發生車禍 ê 時所穿 ê 衫。










●謝緯發生車禍 ê 時所穿 ê 西裝褲。





楊瓊英趕到現場，雖然懇切哀求看 ē-tàng 倚近探視謝緯 bò͘ ，但是警方人員卻極力勸阻，一直 thèng-hāu 到 hip 相、檢驗了後， tsiah kā 遺體搬 soá 到另外一叢大樹腳， tsit 時她 tsiah得 tio̍h 允准接近謝緯。楊瓊英 the̍h 手巾 á 出來， tshit謝緯 ê 面，家己 mā 目屎流、目屎滴，一面哭、一面吐大氣，講：「Ah……你……真可憐，真可憐啊！一點點 á to 無歇睏。我若無 hō͘　你出來就好 lah……，我若阻擋你開車就好 lah……，但是你卻 hiah-ni̍h 愛家己開車……。」楊瓊英心內憂傷痛苦，giōng beh 死！

謝緯發生車禍來過往 ê 消息，真緊 to̍h 傳遍南投鎮 ê 大街小巷，聽 tio̍h ê 人 lóng 驚 一 tiô，感覺真無 tshái、真 m̄-kam。真 tsē 人知影 tsit-ê 消息，隨時放落 khang-khoè，走去名間現場關心。人 kap 車 jú 來 jú tsē，無偌久，忽然天昏地暗，落大雨。有一位計程車司機主動表示，因為他非常尊敬謝緯，所以願意載運謝緯 ê 遺體 tńg 去。 Tùi 名間鄉沿路到南投街仔頂，來關心 ê 人， e-e 陣陣，大家 lóng 是憂頭結面，有人流目屎，有人恬恬無講話。當計程車到大同病院門口 ê 時，車門一 phah 開，眾人隨時合力 kā 謝緯 ê 遺體扛入去厝內。