《台灣諺語鹹酸甜》

 | | | 轉寄

1-5 初三、四，月眉意；十五、六，月當圓；廿三、四，月暗暝。

作者 蕭平治 2011.07.24

教過國小自然科ê 老師，攏有tsit 種經驗，beh 教hō͘ 學生了解天頂星球運行ê 規則，是一項誠無簡單ê 工課，kan-taⁿ 教一下月光月暗ê 變化著好，tī 時看會著月眉仔，tī 時會出半月，tī 時ê 月上圓，台仔頂老師講kah 喉ta 嘴khuah,學生囡仔猶原大部分「莫宰羊」。

講--à 莫怪，日頭、月娘、地球ê 天體運行，本成著是一種三度空間ê 關聯，beh 講講bē tshun-tshia,beh kí 閣kí bē 好勢，規氣用畫--ê,愈畫愈花，愈畫愈看無，連老師都講kah 霧sà-sà,ah 囡仔beh 哪聽有？

Tsit-mái ê 教學卡進步，重觀察、重實驗，所以老師攏會指導學生做長期觀察月娘ê 變化，月初ê 月出現tī-tueh ，啥物形--ê ，月中央--leh，ah 月上圓ê 時陣是tī 叨一工？攏愛詳細紀錄，有影比卡早卡科學。m̄-kú好是好，做khit 來才知無簡單，你都知，台灣ê天頂時常都烏tsap-tsap，日--時beh 看會著日頭著無逐工有，向望逐暗beh 天青，免想--ò͘,講，聽無，beh 觀察看無月娘，考試beh 按怎？月考總是愛考--a,參考書sa 出來讀，測驗卷分落去「煉」，暗唸、暗記，bē 曉背kah 會曉，管thāi-I 有了解無了解，滿分卡要緊，考試100 分，老師gâu教，囡仔gâu讀，父母有面子，著是校長、主任kap hit-lō出版社ê 頭家，嘛歡喜參咧。

Li-li lo-lo講tsiah 濟beh創啥？其實是beh kā恁紹介一句咱祖公留落來ê 智慧：「初三、四，月眉意；十五、六，月當圓；廿三、四，月暗暝。」請你kā 念一遍，閣念一遍，包你一生記tiâu-tiâu,永遠bē ka-la̍uh,好聽好記閣押韻，真正一兼二顧，bong 蜊仔兼洗褲。

尾仔，閣插一個花仔，你嘛會使得插一句「初七、八，月半圓」tàu 參咧，按呢教囡仔念-- 十分鐘，卡嬴讀參考書二點鐘，敢有影？試看咧你著知。

※註解 (1) tī時：啥麼時陣。(2) 喉ta嘴khuah:喉乾嘴渴。(3) 莫宰羊：m̄ 知影。(4) bē tshun-tshia:不能透徹瞭解。(5)kí:指，用手比。(6)tī-tueh:在哪兒。(7)烏tsap-tsap:烏煙瘴氣。(8)sa:拿。(9)背：puē。(10)管thāi-I:管他的。(11)廿三：jia̍p-saⁿ。(12)記tiâu-tiâu:記得牢牢的。(13)ka-la̍uh:丟失，忘了。(14)bong 蜊仔：摸lah-á。