《台灣諺語鹹酸甜》

 | | | 轉寄

一工寒，一工漏，半暝透風吹倒樓

作者 蕭平治 2006.08.20

br> 講起細漢ê故事，使人心情真鬱卒， 想beh講hō͘逐家聽，恐驚矣少年--ê會議論， 親像tsit款狗屎乾，聽聽leh是beh創啥？

無講亦是真艱苦，拜託請lín小忍耐。

四十外冬前，台灣tú好降服後， 日本á轉去in兜，國民黨tâⁿ-á來到， 萬項tng tín 動，向望生活變輕鬆， 可惜四萬換一箍，生活艱難亂tshau-tshau。

食是蕃薯簽飯配菜脯，放屎放著tsiah大箍， 穿是補了koh再補，beh穿鞋做你免孝孤， tuà --ê竹管厝，壁抹牛屎攪綿hu， 厝頂khàm稻草，有人叫做草厝。

睏竹仔眠床，熱人真正涼，寒天就hiau-hīng， 腳手凍kah痛，無暖氣，用火籠， 草蓆下底tshu草tshiⁿ，面頂tsiah 蓋十二斤ê 破棉被， 阿爸、ī -- ā，大兄、二姊，我kap小弟， kheh-kheh做一夥，講án-ni khah燒烙，實在是不得已。

穿是穿bē燒，睏是冷ki-ki， 厝頂若是àu--去，壁縫若是大裂， koh是tn̄g著十二月天，起北風，烏寒兼落雨， 真正有影「一工寒，一工漏，半暝透風吹倒樓」。

少年朋友好佳哉，出世tī tsín ê 時代， 食穿富足無煩無惱，m̄知影啥物是悲哀， 奉勸各位少年兄，少年阿姊， 人愛惜福，認真扑拼，認真讀冊才合理。

【註解】： 1.狗屎乾：[陳年往事]。 2.降服：kàng-ho̍k，日本投降。 3.tâⁿ-á來到：[剛剛]來到。 4.tng tín動：[正在變動]。 5.亂tshau-tshau：[亂七八糟]。 6.四萬換一箍：大約1950年舊台弊四萬箍（元）換新台弊一箍。物資波動真厲害。 7.免孝孤：免想，孝孤本來是講孝孤魂野鬼，借用做大食，粗魯食，無情願hō͘人食ê pháiⁿ聽話。 8.tuà--ê：[住的]。 9.綿hu：[棉屑，紙屑]。 10.tshu草tshiⁿ：[墊新鮮的稻草做墊被]。 11.十二斤ê破棉被：古早流行大棉被。 12.ī --ā：阿母。 13. àu--去：[腐壞]。 14.kheh-kheh 做一夥：[擠在一起]。