《台灣諺語鹹酸甜》

 | | | 轉寄

南路鷹，一萬死九千。（鷹揚八卦）~4~

作者 蕭平治 2006.02.12

br>
「想著祖先ê 扑拼，為著生存，為著尊嚴，無惜生命，甘願犧牲認命，唉！lóng是人ê 無知，煞hō͘ 咱liân-huê pháiⁿ命。

古早古早，咱ê 祖先就教咱愛隨節氣搬徙，寒天時，咱ê 故鄉寒sih-sih，tsiâⁿ pháiⁿ徛起，m̄-tsiah 隨人組隊，趁冬季iáu未到ê 秋天，千里迢迢飛過海洋到南洋度假，順紲教lín技藝，kā lín tshiâⁿ 大漢，tsiah koh趁熱--人beh到晉前ê 春天，搬徙轉來去故鄉，hō͘ lín少年-- ê 完婚生湠，tse 就是祖先留落來ê 傳統，每一kái 經過Formosa 地界，就會去遇著「南路鷹，一萬死九千」ê 災厄，mā是宿命無奈，好佳哉，tsit-mái ê 台灣人已經覺醒，進入文明社會，有野生動物保育ê 觀念，而且經過tsi̍t-kuá有心ê 愛鳥人kap 彰化縣政府ê 認真宣傳，得著國際保育界ê 重視，m̄-tsiah 有tsiah-ni̍h 鬧熱感心ê 活動，向望明年、後年，一直到以後，咱ê 後代囝孫，攏會親像今仔日按呢，平平安安，順順序序來過日，無驚惶，無死傷來經過Formosa tsiah-ni̍h suí ê 地界，免歡迎無要緊， mài kā 咱thâi ，mài kā 咱掠就真感謝。」

「阿公！哪會kā 咱叫做南路鷹--leh ？」

「Tse是Formosa 台灣人ê 祖先，看咱逐年都ài 飛向南洋去，m̄-tsiah 按呢kā 咱稱呼，無pháiⁿ意啦！taⁿ tsiâⁿ暗-- à，tuè 阿公祈禱了後tio̍h-ài 去睏，bîn-á 早起tio̍h-ài koh上路，無，會peh bē khit 來：感謝天！感謝上帝！賜hō͘ 咱平安，賜hō͘ 咱歡喜，過去-- ê mài koh鬱卒，未來- -ē ，tio̍h-ài 扑拼sè-jī 。感謝台灣人，感謝半線ê 兄姊，lín ê 仁慈，lín ê 疼心，阮會記得，望beh lín mā會tàng平安快樂，免受恐嚇，免受壓霸，khioh 回尊嚴，tio̍h-ài 家己拚！感謝！感謝！感謝！」~結束~

【註解】：1. 八卦：ing-iông pat-kuà。 2. thiám 頭：疲勞。 3. tshìng khah kuân ：[衝高一點]。 4. 三角翼：三角翼。 5. 鳥仔踏：tsiáu-á-tah。 6. 來去！：laih --去，走，離開。7. 倒轉：ua̍t 倒轉，越倒轉（ua̍t 倒轉）。 8. 紮營：tsat –iâⁿ。9. tshu--落去：[滑下去]。 10. koh 樣：[異樣]。 11. 狀況：tsōng-hóng 。 12. 唱歌la̍h 曲：唱歌拉曲。 13. iap-thiap ：[隱密]。 14. tshap-tsa̍p ：參雜；混雜。15. 凊汗：tshìn-kuāⁿ，冷汗。 16. sau 聲：破聲；聲音沙啞。17. tshāi 旗仔：[豎旗子]。 18. kí-kí 指指：[比比指指]( kí-kí tu̍h-tu̍h)。19. khiàn-thian khiàn-thian：[看天張望]。 20. 無好空：m̄ 是好代誌。 21. 張持：tiuⁿ-tî，斟酌，小心。 22. khuaⁿ 辦：免緊張，慢慢辦。 23. thián 開：展開。 24. 穿插：[穿著]。25. 面腔目神：面容眼神。 26. phia̍t ：[晃動]。 27. hiau-pai ：驕傲。 28. thián si̍t ：展翼。29. iap 尾：[縮尾]。 30. tsông ：跑，衝。31. kik khong ：[裝傻，賣弄傻相]。 32. tsak-tsō ：[打攪]。 33. 才調：能力。 34. 上北：tsiūⁿ 北。35. beh ti̍h 咱ê 生命：[要我們的命]。 36. 剿：tsâu ，斬草除根。37. gōing-beh ：[快要]。 38. liân-huê ：無停ê pháiⁿ命，苦ê 輪迴。39. 遇著：gū-tio̍h，拄著。 40. 災厄：tsai-eh。 41. 宿命：siok-miā。 42. peh bē khit 來：[爬不起來]。 43. khioh 回：[拾回]。