《大人囡a2詩》

 | | | 轉寄

Lâng ū Siang-bīn...人有雙面

作者 Li KhinhuaN 2005.11.27

listen
Hō͘ lí khuàⁿ guá ê bīn tshiò-hai-hai
Hō͘ 你看我ê 面笑hai-hai；
M̄ hō͘ lí khuàⁿ guá ê bīn lâu ba̍k-sái
M̄ hō͘ 你看我ê 面流目屎
Hō͘ lí khuàⁿ guá ê bīn pe̍h ná siù-tsâi
Hō͘ 你看我ê面白ná秀才;
M̄ hō͘ lí khuàⁿ guá ê bīn o͘ koh pháiⁿ
M̄ hō͘ 你看我ê 面烏 koh 歹
Hō͘ lí khuàⁿ guá ê tsiàⁿ-bīn tsiok kong-tshái
Hō͘ 你看我ê 正面足光彩；
M̄ hō͘ lí khuàⁿ guá ê puē-bīn tsin àu-sái
M̄ hō͘ 你看我ê 背面真àu-sái

Hō͘ lí khuàⁿ guá ê tsîng-bīn thài-pîng-tāi
Hō͘ 你看我ê 前面太平代;
M̄ hó͘ lí khuàⁿ guá ê āu-bīn tsò hong-thai
M̄ hō͘ 你看我ê 後面做風颱
Hō͘ lí khuàⁿ guá ê tíng-bīn kik m̄-tsai
Hō͘ 你看我ê 頂面kik m̄ 知；
M̄ hō͘ lí khuàⁿ guá ê lāi-bīn phi̍h-pho̍k-tshái
M̄ hō͘ 你看我ê 內面phi̍h-pho̍k-tshái
M̄ hō͘ lí khuàⁿ guá ê to-bīn ē kâng thâi
M̄ hō͘ 你看我ê 刀面會kâng thâi；
Hō͘ lí khuàⁿ guá ê to-bīn hó tshiat-tshài
Hō͘ 你看我ê 刀面好切菜
To ū nn̄g bīn lí kám m̄-tsai?
刀有兩面你kám m̄ 知？
--2003/5/3 Harvard