《當上帝開嘴講台語》

 | | | 轉寄

2.2 關於「台灣話」kap「廈門話」ê比較

作者 梁淑慧 2006.04.30

2.2 關於「台灣話」kap「廈門話」ê比較

鄭良偉（1987b）tuì語言形成ê角度來比較台灣話kap廈門話，指出兩者有以下幾個無仝ê所在：
一、台灣各大城市ê居民並m̄是直接tuì漳、泉搬來；廈門ê居民則大多數直接tuì漳、泉各地遷來。
二、大批移民來台灣差不多是tī 17世紀明末清初，所以台南建府ê時間相當早；廈門市ê快速興起是19世紀五口通商以後ê代誌。
三、台灣地區因為交通、學校制度、電視、廣播事業發達，工商業、徵兵、就業、就學所帶來ê人口流動量kap交流量遠遠超過福建地區，致使「台灣話」內部ê差異微小，互相通話lóng無阻礙。「廈門話」雖然一向有「閩南語標準話」ê威信，範圍卻kan-taⁿ限tī廈門市kap伊ê近郊，無論是tuì人口抑是流通ê地區來看，lóng不如內部差異微小ê「台灣話」。
四、廈門ê居民kap泉州、漳州來往從來無斷絕過。台灣kap中國大陸居民ê往來，bat有清代ê海禁、日本ê統治、國共ê對立等，彼此影響ê機會khah小。

針對「台灣話」kap「廈門話」語言本身ê比較，眾學者一致ê結論是：雖然台灣話kap廈門話lóng是tuì漳州話kap泉州話混合造成，m̄-koh兩者混雜ê方式無啥kāng款。其中tī語音kap語法方面ê差異真小，尤其是台北話kap廈門話ê語音上接近。台灣話kap廈門話最主要ê差異是tī詞彙方面，約有10﹪ê無仝（王育德，1957；鄭良偉，1987a、1987b；周長楫，1996；張振興，1997；周長楫、歐陽憶耘，1998）。Tsiah-ê詞彙差異主要表現tī幾個方面：
一、受本身自然環境抑是文化ê影響來產生ê特有語詞。譬如：台灣話ê大甲蓆、在來米、九孔、花枝、唐山……等。
二、Kāng一個事物抑是概念ê用詞無仝。譬如：『黑板』tī台灣話是「烏枋（o͘-pang）」，廈門話是「烏牌（o͘-pâi）」。『鈔票』tī台灣話是「銀票（gîn/gûn-piò）」，廈門話是「紙字（tsuá-jī）」……等。
三、有一寡語詞，詞義範圍ê大小無仝。譬如：「烏白（ o͘ pe̍h）」tī台灣話會當指（a）烏kap白。（b）胡亂。譬如：「烏白講」、「烏白做」。廈門話to̍h無（b）ê意義。Koh譬如「古意（kó͘-ì）」tī台灣話ê意思是「忠厚老實」；廈門話除了tsit-ê意思以外koh會當表示「古道熱腸」。
四、因為兩地ê華語詞（普通話）無仝所引起ê差異，表現tī現代ê、科技ê語詞頂面。譬如：台灣話ê「電腦」廈門話稱做「計算機」。台灣話ê「計程車」廈門話稱做「出租汽車」……等。
五、台灣因為歷史背景ê關係，有真tsē ê外來語，尤其是日語ê外來語借詞上tsē，tse是其他閩南各地所無ê特色。譬如﹕甲（土地面積單位，荷蘭語）、放送（廣播，日語）、tha-tha-mih（榻榻米，日語）、水道水（自來水，日語）……等。

廈門自19世紀中葉開放通商以後，漸漸發展成做中國大陸閩南地區ê政治、經濟、文化中心，廈門話mā漸漸成做閩南地區ê優勢方言，取代早期泉州話、漳州話ê地位，hō͘人看做是閩南話ê代表(註18)（周長楫，1996；張振興，1997；周長楫、歐陽憶耘，1998）。台灣tī日本時代到四、五十年代中間，mā確實有kā廈門話看做是台灣話ê標準語，而且去模仿ê傾向（王育德，1957；鄭良偉，1987a、1987b）。M̄-koh tsit種觀念現在已經消失ah，tuì台灣民間語言kap媒體語言ê使用、字典、詞典kap教科書ê編輯……等看起來，所使用ê lóng是台灣話，m̄是廈門話（鄭良偉，1987b）。

李勤岸（2000）bat就台語ê時代背景探討台語詞彙ê變遷。主要ê研究範圍是1920年代kap 1990年代兩個台語小說詞庫中ê借詞成分，論文中真清楚指出台語借詞ê主要來源是廈門話、日語kap華語三類，廈門話借詞歸因tī基督教ê傳入，尤其是《巴克禮譯本》ê翻譯。將廈門話看做外來語tsit種觀點是一個創見，為台語研究開拓另外一個值得探討ê角度；但伊將語料中凡若kap現代台語語感無仝koh bat出現tī《巴克禮譯本》中ê 語詞lóng kā歸類做廈門話借詞，tsit點阮有無仝ê看法。透過查閱《台日大辭典》（上卷：1931，下卷：1932），阮知影tsiah-ê詞彙tī日本時代ê台灣社會是曾經存在過--ê，只是歷經時代ê變遷suah來消失抑是hō͘後來ê語詞取代去，所以應該kā tsiah-ê語詞看做是「早期台廈共同語」，並m̄是純粹ê廈門話語詞。語言一向tī「口語」ê變化會khah緊，m̄-koh因為有「書面語」《巴克禮譯本》ê記載，hō͘後來ê人會得thang看tio̍h語言變遷ê動向，tsit種推論應該khah合理才tio̍h。

註18： 《普通話閩南方言辭典》（1981）kap「現代漢語方言大詞典」的分卷《廈門方言辭典》（1993）lóng是以廈門話做閩南方言ê代表。