《當上帝開嘴講台語》

 | | | 轉寄

2.3 關於台語文字

作者 梁淑慧 2006.05.07

2.3 關於台語文字

Tī討論台語文字tsìn前，咱必須先釐清「文字」kap「音標」ê差別。「文字」是指書面語系統，是書寫創作ê符號，kap聲音無一定有直接ê關係；「音標」是記錄音讀ê符號，是對語音解析ê工具。

根據楊允言、張學謙(1999)〈台灣福佬話非漢字拼音符號ê回顧kap分析〉中ê調查，台灣社會所出現過ê台語拼音符號系統有64種hiah tsē，包括50種「羅馬字」、9種「ㄅㄆㄇ注音式」、2種「日本假名式」、3種「朝鮮諺文式」。其中「ㄅㄆㄇ注音式」照伊ê名稱所表示是音標，雖然目前社會上出現一kuá以漢字為主，透濫淡薄仔ㄅㄆㄇê台語文，m̄-koh一般來講iáu kā當做是注音m̄是正式ê文字。「日本假名式」若是參考日文ê作法，kā當做是文字抑是音標lóng ē-sái，m̄-koh目前所留--落來ê文獻kan-taⁿ當做音標使用niā-niā。「朝鮮諺文式」屬tī文字系統，洪惟仁(1992a)《台語文學kap台語文字》tī冊裡真tsē擺提起伊認為諺文kap漢字合用ê文字形式是siōng-kài理想ê台語文字，m̄-koh tī現實ê考量上真oh得付諸實行。「羅馬字」方面情況khah tsē樣，「教會羅馬字」kap根據教會羅馬字改造ê「現代文書法」、「普實台文」等，是以「全羅馬字」形式做台語ê文字系統，in ê羅馬字符號兼有音標ê功用。其他各式大多數是以羅馬字來做漢字ê標音工具，或者是以羅馬字取代一部分寫bē出來ê漢字，用「漢羅合用字」做文字系統。

綜合以上ê討論咱thang知：表記台語ê「音標系統」，除了上文所講ê拼音符號以外，koh加上傳統漢語聲韻學ê漢字反切，lóng總有六十guā種hiah tsē。但歸納目前社會上使用ê台語「文字形式」來看，有「全漢字」、「全羅馬字」、「漢羅合用字」三種。本節kan-taⁿ針對「台語文字形式」做文獻ê回顧，無beh討論「台語音標系統」。用「全漢字」、「全羅馬字」、「漢羅合用字」三種文字形式表記台語ê優缺點，咱beh tī 4.5節詳細討論。另外，歷年來關於「漢字本字」ê考證、「羅馬字ê改良」等，眾學者mā有真tsē無仝ê看法，因為m̄是本研究ê重點，tī下文中kan-taⁿ簡單提起。以下第一節，咱用時代做順序簡單描述bat出現過ê主張，第二節beh回顧三種文字形式tī心理語言學kap社會語言學頂面ê比較。