《當上帝開嘴講台語》

 | | | 轉寄

4.2 詞彙的比較(《巴克禮譯本》的詞彙特色-1)

作者 梁淑慧 2006.12.03

4.2 詞彙的比較

就現代人ê台語語感來讀《巴克禮譯本》，隨時會tàng感受tio̍h語言ê差異，尤其tī詞彙方面koh-khah明顯。咱知影現在離巴克禮翻譯ê年代已經有將近一百年ê時間，「語言」本身是會跟tuè時代來變化--ê，特別是屬tī海洋性文化ê台灣話，除了kap本島ê原住民語、客語接觸以外，koh歷經日本政府kap國民政府ê「國語」政策，tsiah-ê因素無時無刻teh影響台灣話。現代科技時代大眾傳播ê大量增加，koh-khah加速語言ê變遷，一寡使用頻率khah少ê詞彙自然to̍h會tuì口語中消失。M̄-koh書面語《聖經》卻為咱保存tio̍h早期ê語料，tsiah-ê《巴克禮譯本》中所使用ê詞彙便透過牧師ê講道、《聖經》、《聖詩》ê使用等，直接影響教會人士ê日常用語甚至文學作品（李勤岸，2000；楊允言，2003），這是一個非常趣味ê現象。

以下咱就用新約「馬太福音」做例，將三種譯本ê詞彙整理出來，進行表格化ê比較並討論。

4.2.1 《巴克禮譯本》的詞彙特色

4.2.1.1 保留「早期台廈共同語」

李勤岸（2000）bat tī伊ê論文中比較現今廈門話kap台灣話ê差異，並將1920年代台文小說中ê廈門話借詞tshuē出來。所用ê語料是鄭溪泮kap賴仁聲兩位牧師用台語羅馬字寫ê台語小說，伊將凡若kap現代台語語感無仝而且bat出現tī《巴克禮譯本》內面ê詞彙，lóng當做廈門話借詞來處理。雖然李tī判斷ê過程中有查考六本詞典（註58），m̄-koh除了1873年Dooglas ê廈英大詞典是屬tī日據時代前就已經發行ê廈門話詞典以外，其他ê幾本無論是台語詞典抑是廈門話詞典，lóng是日據時代以後tsiah出版ê詞典，離小說創作ê時代背景已經真遠，是m̄是會tàng忠實來反映出1920年代ê語言實況，實在真難保證。李tī欠缺kap其他kāng時代ê台語語料做比較ê情況下判定tsiah-ê詞彙是廈門話借詞，顯然有一寡武斷。Tsiah-ê被判定做廈門話借詞者，mā有可能是早期bat存在過ê台語詞彙，因為時代ê變遷所造成ê語言變化抑是消失。另外，tī《巴克禮譯本》裡m̄ bat出現ê詞「艱苦心」，李根據台語語言學者ê語感kap直覺將伊判定是本土台灣話，m̄-koh tsit-ê詞tī《廈門方言詞典》（1993）中mā tshuē會tio̍h（註59），顛倒是其他幾本台語詞典無收錄。所以阮感覺tsit種判斷標準無啥可靠，因為詞典有收錄該詞彙抑無對李所判定ê結果影響真大，但任何一部詞典lóng有伊收錄範圍tī時間、空間的限制tī-teh，咱無應該忽略。

雖然咱知影《巴克禮譯本》確實是一本廈門話譯本，m̄-koh tī七、八十年前台灣話kap廈門話tī詞彙上ê差異並無像現在ê差異hiah-ni̍h大，王育德（1993：81）tī《台灣話講座》第九講（註60）中提起伊bat就兩百個基本詞彙來調查，發現台灣話kap廈門話kan-taⁿ兩個詞無仝：「河川」ê台灣話是「khue (溪)」，廈門話是「hô； (河)」；「誰」的台灣話是「sia2N-lâng（啥人）」，廈門話是「sī-tsuī（是誰）」。m̄-koh tī《廈門方言詞典》（1993）裡 「溪」的解說如下：“「溪」：河。廈門通常kā河叫做溪，細條河叫做溪仔，大條河叫做江。”另外，黃丁華（1963）指出閩南方言裡一般來問人的疑問代詞是「是誰（sī-tsuī）」（註61），m̄-koh廈門話通常用「siâng」，是「sia2N-lâng（啥人）」的合音，口語裡可分可合（註62）。可見事實上就王育德當年所調查ê兩百個基本詞彙來講，台灣話kap廈門話並無差異。


註58：這六部辭典分別是：陳修（1991）《台灣話大詞典》、王育德（1957）《台灣語常用語彙》、周長楫（1993）《廈門方言詞典》、廈門大學（1981）《普通話閩南方言詞典》、Embree, Bernard L.M. 1973. A dictionary of Soothern Min. 、Dooglas, Carstairs 1873. Tsinese-Inglish Dictionary of the Vernacular or Spoken Language of Amoy.
註59：《廈門方言詞典》頁224「艱苦心」：心裡憂愁，痛苦。
註60：《台灣話講座》共24講，原作年代tuì 1960年4月到1964年1月。
註61：tī王育德kap黃丁華ê記錄中，「是誰」記音是「sī-tsuī」，m̄-koh tī《廈門音新字典》kap《巴克禮譯本》中記音做「tsī-tsuī」，《廈門方言詞典》說明「tsī-tsuī」是tuì「sī-tsuī」音變來--ê。
註62：黃丁華（1963）原文用國際音標標音，本文為tio̍h方便比較kā改做白話字。