《當上帝開嘴講台語》

 | | | 轉寄

4.2.1 《巴克禮譯本》的詞彙特色-2

作者 梁淑慧 2006.12.17

4.2.1.1 保留「早期台廈共同語」

（續接上期）

筆者也就《巴克禮譯本》當中kap現代台語語感無仝ê詞彙（指表4.2.1.1所列出ê詞彙）一一查考《台日大辭典》（上卷：1931，下卷：1932）以及《廈門方言詞典》（1993）、《普通話閩南方言詞典》（1981）（註63）。結果發現有真tsē tī現代台語已經無teh用ê詞彙，大多數lóng thang tī《台日大辭典》裡查考會tio̍h。《台日大辭典》是日本時代台灣總督府運用政府ê財力、人力，經過二十guā年ê調查研究編撰成--ê，共收入9萬guā個台語詞彙，thang 講是有史以來siōng完整ê口語辭典。既然tī《台日大辭典》裡會tàng tshuē-tio̍h tsiah-ê詞彙，表示tsiah-ê詞彙tī當初時確實有一定ê使用人口。另一方面，有大多數詞彙tī現代ê兩部廈門話詞典裡已經tshuē無。表示tsiah-ê詞彙已經消失抑是hō͘新所取代，就親像in tī台灣話裡變化ê情形kāng款。

到tsia咱thang下一個結論：tsiah-ê早期ê閩南詞彙bat存在tī百年前左右ê台灣話kap廈門話中，m̄-koh幾十年來台灣話kap廈門話各自經歷變化，致使造成今仔日二者ê差異。若beh將tsiah-ê早期詞彙當中ê「純粹廈門話」tshuē--出來，是有相當大ê困難--ê，所以咱thang kā tsiah-ê詞彙看做是早期ê「台廈共同語」。雖然tsiah-ê「早期台廈共同語」有真tsē lóng hō͘後起ê同義語所取代，m̄-koh現在猶koh會tàng tī長老教會ê牧師講道抑是khah年長hit輩信徒ê口語裡聽tio̍h。

表4.2.1.1 《巴克禮譯本》「馬太福音」中ê「早期台廈共同語」（按：本表格共列出164個語詞tī三種版本中ê比較，因為數量真大，無法度tī網頁tsia呈現，請有興趣ê讀者，自行閱讀原書，多謝！）

＃64「hū-jîn-lâng」tī台語裡有兩個意思：thang指「婦女」kap「某」，tī《聖經》裡kan-taⁿ有出現「婦女」tsit個意思。＃91「kiâⁿ...（行…）」是動詞，意思是：「做…」如：「行姦淫」、「行權能」、「行洗禮」……等，tī《巴克禮譯本》中真常用，m̄-koh現代台語裡khah少用。＃95「... kuà ... （…掛…）」kap＃130「suà ...（續…）」lóng是連詞，意思是：「koh…koh…」。m̄-koh前者用來連接詞kap詞，如：「睛暝掛啞口」；後者用來連接句kap句，如：「恁bē會服事上帝，續服事錢財。」現代台語khah tsē是用「...iū-koh...」代替。＃153「tī-teh」除了表示「存在」ê意思以外，tī台語裡mā thang表示「當teh進行…」。＃158「tuā pîng」台語是指「正爿」【右邊】，原文希臘文「正爿」【右邊】mā是代表「榮耀、權柄ê位置」，二個tú-tú相仝。

台語表示否定會tàng用「m̄（呣）、bô（無）、bē、put（不）」，其中「put（不）」kan-taⁿ用tī文言成語抑是華語借詞。而且台語否定詞ê用法ài看伊後面所接ê助動詞來決定用toh一個否定詞，＃105「m̄ ha̍p-gî(呣合宜）」、「m̄ ing-kai（呣應該）」ê肯定式是「ū ha̍p-gî(有合宜）」、「ū ing-kai（有應該）」，所以否定詞應該ài用「bô(無）」tsiah合理。

《巴克禮譯本》中表達「互相、彼此」tsit個語意有兩個詞，＃123「saⁿ （相）」以及＃124「saⁿ-kap（相及）」ê第二義，但＃124「saⁿ-kap（相及）」表示「互相」kan-taⁿ用tī「相及講」、「相及議論」tsit兩例。所以表達「互相、彼此」ê時，大多數是用「saⁿ」做副詞，後面續接所修飾ê動詞來形成，例如：「相叫」、「相爭」、「相看」、「相欺負」、「相激」、「相告」……等等，tsiah-ê詞tī現代台語裡有ê猶原保留原來ê讀音，有些改「saⁿ」ê讀音做「sio」，有ê是用「互相」取代，這是屬於無kāng語言層次ê同義語，各有無kāng ê結構特點kap語法功能。【saⁿ/ sio＋V】thang看做是詞法ê特列結構（註66），tī現代台語使用ê範圍縮小；新起來ê詞「互相」會tàng kap複雜ê動詞組抑是子句結合，具備khah靈活ê句法功能（鄭良偉，1992）。

＃129「siū（受）」tī《巴克禮譯本》中大部分直接用tī動詞前，是表示被動ê助詞，但並無點明施動者，如：「受批評」、「受解送」、「受熱」、「受召」、「受賣」……等等，是一個相當多產ê結構，tsiah-ê詞tī現代台語裡已經hō͘同義語「被」、「hō͘人」所取代。

Tuì表4.2.1.1咱mā看出《巴克禮譯本》ê詞彙深深受tio̍h文言文ê影響，如：＃6「bia̍t（滅）」、＃20「tshì-siūⁿ（試想）」、＃22「tshia2N-bān(且慢）」、＃30「tsiâⁿ（成）」、＃38「tsiū-kūn(就近）」、＃42「tsuí-tso̍k（水族）」、＃43「tsuì-hàn(醉漢）」、＃50「hîng-i (行醫）」、＃51「hîng-hiong（行兇）」、＃89「kî-û(其餘）」、＃91「kiâⁿ...（行…）」、＃101「kūn lah（近啦）」、＃120「pō͘-kiâⁿ（步行）」、＃121「pù lâng(富人）」、＃122「put-lūn(不論）」……等等。這是因為tī 1810年起老早就已經有文言文ê《聖經》譯本（註67），根據蔡錦圖（2000）ê研究，前後至少有26種文言文譯本tī中國流傳。Tsit寡詞彙tī「紅皮聖經」kap《現代台語譯本》中攏已經被修改做現代人常用ê詞彙。會tàng 跟tuè時代ê變遷tī無影響內容理解ê情況下做調整，使用符合現代台灣人ê語感，這是「聖經翻譯」重視台灣社會實況化ê具體表現。


註63：Tī查閱三本詞典ê時，發現聖經《台語漢字本》kap tsit三本詞典tī漢字ê使用上分別lóng有家己ê選擇，這也證明全部用「漢字」來表達台灣話想beh達到一致性有相當大ê困難。
（註64、註65為表4.2.1.1中ê註解，tī tsia省略）
註66：有關「特列結構」ê語法特點kap探討，詳見鄭良偉（1992）。
註67：文言文《聖經》ê主要對象是受過教育ê中國人，按照內容又分做「文理（文言文）」以及「淺文理（淺近ê文言文）」兩種。