《當上帝開嘴講台語》

 | | | 轉寄

5.3.1 語感測驗-2

作者 梁淑慧 2008.12.07

咱已經tuì語感測驗確實知影《巴克禮譯本》無論tī「詞彙」、「語法」、「語音」或者是「信息傳達」上lóng已經無符合現代台語ê語感，án-ne，另外一個趣味ê問題是：

Tī tsit幾類題型中選擇「＝PKL」ê受訪者，kám有受tio̍h背景ê影響咧？

咱tuì表5.3.1看tio̍h「社會人士組」tī選擇「＝PKL」項目上kap「大學生組」有差異，一般來講，社會人士組對於《巴克禮譯本》ê接受度比大學生組khah kuân。譬如：Tī全部22題ê語詞題目中，社會人士組平均每一個人有5.8題會tàng接受《巴克禮譯本》所用ê語詞，佔26.4﹪；大學生組平均kan-taⁿ有1.62題會tàng接受，佔7.3﹪。Tī全部15題ê語法題目中，社會人士組平均每一個人有3.6題會tàng接受《巴克禮譯本》所用ê語法，佔24﹪；大學生組平均kan-taⁿ有2.7題會tàng接受，佔11.3﹪。Tī全部9題ê語音題目中，社會人士組平均每一個人有4.1題會tàng接受《巴克禮譯本》所用ê語音，佔45.6﹪；大學生組平均kan-taⁿ有1.9題會tàng接受，佔21.1﹪。Tī全部5題ê信息傳達題目中，社會人士組平均每一個人有0.9題會tàng認同《巴克禮譯本》所用ê表達方式，佔18﹪；大學生組平均kan-taⁿ有0.3題會tàng認同，佔6﹪。Tī 5.2.1節分析受訪者ê社會背景資料中，咱知影tsit兩組人士主要ê無仝有二點：第一是年齡，第二是教徒ê比例。社會人士組ê年齡khah年長而且教徒比例khah kuân。所以咱想beh了解這kám是造成社會人士組khah會tàng接受《巴克禮譯本》ê原因。另外，教徒中「聽台語講道時間ê長短」kap「kám有捷看《巴克禮譯本》抑是《台語漢字本》」mā可能是影響伊ê接受度ê因素，因為長期聽kap讀ê習慣會tàng改變對《巴克禮譯本》ê接受程度。

所以，以下咱beh分做「語詞」、「語法」、「語音」、「信息傳達」四個小節，進一步用SPSS統計軟體來探討「年齡」、「聽台語講道時間ê長短」kap「kám有捷看《巴克禮譯本》抑是《台語漢字本》」tsit三項變數對選擇「＝PKL」（換一句話講，是對《巴克禮譯本》ê接受度）kám會造成影響，咱應用ê是χ2 檢定ê百分比同質性檢驗（註95）。

另外，tuì問卷結果所收集ê各類題型ê答題狀況，mā會做夥tī以下逐小節中提出來討論。


註95：Tī進行χ2檢定百分比同質性ê時，咱ê目的teh檢定 J 個群體tī I 個反應方面ê百分比kám有顯著ê差異。所以tī tsia咱先將反應項目（to̍h是逐個「＝PKL」ê反應）分做kuân、kē 2組。分組ê標準界定是「社會人士組tī各類題『＝PKL』ê平均題數」。例如：「語詞」方面，社會人士組tī『＝PKL』ê平均題數是5.8題，所以咱界定「語詞」回答題數tī 0~5題者是kē組，6 ~22題者是kuân組。依此類推。所以「語法」回答題數tī 0~3題者是kē組，4~15題者是kuân組。「語音」回答題數tī 0~4題者是kē組，5~9題者是kuân組。「信息傳達」回答題數tī 0~1題者是kē組，2 ~5題者是kuân組。