《當上帝開嘴講台語》

 | | | 轉寄

第一章 緒論

作者 梁淑慧 2006.03.19

第一章 緒論

《聖經》hō͘人稱呼做「書中之書」，是一本流傳siōng闊ê經典，為什麼《聖經》會tàng流傳tsiah-ni̍h普遍而且時間愈久愈受人重視leh？當然，除了《聖經》本身ê信息有普世性kap永恆性ê價值以外，koh-khah重要ê是伊tī世界各地已經有兩千外種語言ê譯本(註1)，每一個人lóng 會tàng用伊家己siōng熟練ê語言文字去閱讀、理解、談論tsit本書。跟tuè時代ê腳步，tsit本年代古老koh影響人類深遠ê冊，mā一再用koh-khah接近現代人所會tàng體會ê語文來傳達伊ê內容。Tī台灣，雖然基督徒tī總人口所佔ê比例大概kan-taⁿ 5%左右(註2)，m̄-koh《聖經》卻會tàng看做是對tsiah-ê信徒ê語言siōng有穩定作用ê書面語資料。本研究to̍h是用現代語言學ê角度，來分析探討幾種台語版本ê《聖經》tī目前台灣社會ê實用情形。

1.1 論文結構

本文共分做六章，第一章是「緒論」，包括論文結構、研究動機、研究目的、研究範圍kap名詞定義。第二章是「文獻探討」，回顧kap《聖經》ê譯本比較、台灣話kap廈門話ê比較、三種文字ê比較等主題相關ê文獻。第三章是「實況化理論」，主要teh建立本研究ê方法論，分別tuì語言學、神學kap聖經翻譯理論ê角度來探討。第四章是「各譯本實況化ê比較」，tī簡單介紹各種譯本ê歷史了後，分別tuì詞彙、語法、信息傳達風格kap文字形式來做比較。第五章是「問卷調查」，包括問卷ê設計kap實施方式、受訪者背景ê整理、問卷結果ê探討等。第六章是「結論」，總結本文ê研究結果並且提出對日後研究課題ê建議。

註1: 根據「聯合聖經公會」（The United Bible Societies, UBS）ê報告，到公元2002年為止，聖經已經有2,303種語文ê翻譯，而且各種語文翻譯ê工作iáu teh繼續進行。
註2: 根據「中華基督教福音協進會」tī 2001年ê統計， 泛基督教人口tī台灣佔總人口數ê 5.06﹪。