《哈佛台語筆記》

 | | | 轉寄

講演旅行第三站：Aⁿ Arbor

作者 李勤岸 2007.06.10

轉來ê 時坐大台ê 737噴射機，tī New York 轉機，完美ê 聯接，隨落機，行到登機門，隨上機。Detroit 到波士頓，仝一個時區，三點半鐘ê 旅程niā-niā。去ê 時，hut九點鐘才到。嚴格通關了後，等到登機時間，登機門ê 走馬燈顯示ê 時間無張持沿後三點鐘，叫是電腦歹去。去櫃臺問，講是因為天氣bái ，晚分去，無法度。看出去窗仔外，果然是天色真歹看，白茫茫一片，tâm 溼溼，鷹鳥嘛無beh 飛。到Cleveland愛等到8:16才有班機，9:16才會到 Detroit。坐這款叫做特快噴射機ê 細隻機仔，tī 厚厚ê 雲層裡飛行，小可會震動，m̄ 是像737大台ê hiah 隱。天氣bái ，雲tsiah 厚，歸tsuā 路攏tī 雲裡，飛機士嘛厲害，攏無看著頭前嘛駛會到，攏無迷路去。

安全檢查ê 人員已經有點仔理所當然，態度已經無hiah-nih禮貌，hō͘ 人檢查ê 人雖然無人抱怨，嘛m̄ 是真歡喜。因為頂遍bat thut-tshuê 過，有人tsah 9枝小刀通關，所以現在所有ê 登機門頭前攏koh tshāi 一tè 桌仔，設一個臨時抽查站，in 會uì 人名、抑是外貌koh 抽查，登機前全身、隨身行李攏koh 搜一遍。波士頓上機前，我hō͘ 人叫去搜身，可能我真sîng 恐怖分子ê 款。In 掀開我ê 詩集，看著漢字問講是Tsinese 抑是Japanese，我講是Taiwanese。

Tsiah-ni̍h 嚴格，是m̄ 是滴水不漏？其實無影，頂遍我tī 舊金山beh 轉來，過安全門，有一個穿迷彩裝，gia̍h 卡賓長槍，真suí ê 女兵問我講：Are yo͘ all done? 我kā 笑一leh ，伊就hō͘ 我過，攏無搜身。我若是恐怖分子，彼遍，彼台737就會去lòng 金門大橋。美國人到底會當過這款神經緊張ê 日子過偌久？

巧如kap 文隆來接我，問我食飽未，我tī 轉機ê 時停真久，航空公司有hō͘ 我一張餐券。若無，我tī 機場無愛食物件，因為傷貴，食bē 落去，bat 有gō 一工ê 記錄。巧如是我這遍台灣學生社講演之旅ê 經紀人，伊負責所有ê 行程安排。伊來Mitsigan 大學大學部讀經濟學，抵畢業。文隆讀電機研究所。In 是Mitsigan台灣同學會 (Taiwanese Student Association， MTSA) ê 核心。Mitsigan 大學有二個台灣同學會，另外彼個仝名仝姓，kan-nā英文名無仝 (Taiwan Student Association) 是以前ê 中國同學會改ê 。遮ê 台灣留學生約有百五人。二個同學會關係不只仔緊張，這遍我beh 來演講，聽講嘛是抹烏謠言四界飛，害辦活動 ê 人真緊張，希望我ê 演講題目kā 改khah suí-khuì leh ，叫做：『多語ê 趨勢：新世紀ê 台灣文學及母語運動』，本底in 愛我講ê 題目是：『殖民語言政策ê 影響』。

演講是排tī 明仔載ê晡二點到四點。盈暗tuà tī 邦男兄in 兜。邦南兄嘛有tī Mitsigan 大學教台語，是第二代台美人學生組織TASA ê 社團活動，伊用加拿大政府出版，陳明雄二十冬前編ê 彼本『來學台語』，伊講這本上讚。因為無學分，第一工十外個，上到尾仔tshun 無幾個。

第二工及第二代TASA ê 學生做夥食『iām-tshâ』。In teh 討論Toranto ê 餐廳、中國城 ê 市仔，大家熟kah 那灶腳，那像是tī 隔壁niâ，其實是愛出國，開車四點外鐘tsiah 會到。演講煞，in 有準備百人份ê 台灣點心，麻糬及珍珠奶茶，是Kenny 出國去Toranto 買轉來ê 。伊講按呢猶無hàm，某某人專工開車去買12個便當m̄ tsiah hàm 。

Kenny 載我去校園se̍h 一下，我10冬前嘛是hō͘ 台灣學生社安排北美巡迴演講，坐灰狗bah-suh ，利用歇熱，se̍h beh kah 20間學校，去到加拿大Toruanto，嘛有來Aⁿ Arbor。 彼遍吳宗信有tshuā 我用行ê se̍h 一liàn ，我hip 足濟幻燈片，感覺這個學校真suí ，建築物mê-mê-kak -kak，每個厝角都有彫刻，圖書館內底客廳那皇宮ê 佈置，莫怪tī 公立大學內底是上貴ê 。經過10冬，koh 加真濟建築物，嘛猶有當teh 起ê ，顯然是愈來愈興旺。

演講是tī Angell Hall ê 大演講廳，in koh 有印彩色海報、四頁ê 宣傳單，算是真認真teh 辦。出席ê 人並無預算ê hiah 濟，約有四十人，不過差頂回彭明敏ê 演講無真濟。

這是我第二遍用英語演講，雖然有準備演講稿，嘛是koh 會緊張，臨時決定先唸詩來『破冰 （breaking ice)』，一方面hō͘ 家己khah 鎮靜。詩唸落去，規個氣氛攏來啊，我發現英語嘛講加真滑溜，就koh 用英語解說詩ê 內容。後遍應該koh kā 詩用電腦投射起去銀幕，效果一定koh khah 好。這遍我有特別展示劉杰岳新發展ê 台語書寫軟體TP （Taiwanese Package)，除了配合蘇芝明ê HOTSYS 以外，伊已經會當直接用電腦字盤拍出台灣字ê 調號，koh 會當tī email，網際網路頂高流傳。Berkeley 演講轉來，有人寫電子批來問講我電腦頂高thái 有法度顯示羅馬字ê 調號，這遍我就拍hō͘ in 看。我一向反對人講因為電腦bē曉處理調號，所以咱mài 使用調號。電腦bē 曉，愛kā 電腦教hō͘ 伊會曉，咱 人是beh 用電腦，bē 使顛倒去hō͘ 電腦限制，若是 kan-nā beh 用英語字模，用拍字機tō 好，無彩工進步到電腦時代。遮ê 符號攏是法語、西班牙語真早以前tō teh 用ê ，咱台灣人敢真正比人khah 頇慢？

英語演講我加真有自信啊，不過演講愛beh 精彩嘛是愛用母語講，母語上蓋有力，聽無ê 人才掛耳機同步翻譯。當然，若是邀請ê 單位做bē 到，我嘛無beh 排除使用其他語言，來傳播台灣人脫離殖民文化，建立家己國家文學ê 決心。

2001/12/5


（Tsit篇本底是《哈佛台語筆記》輯一 Joornal•筆記－哈佛校園聽著台語ê鐘聲ê第 10 篇）