《哈佛台語筆記》

 | | | 轉寄

台語飯桌

作者 李勤岸 2007.06.17

哈佛大學有二個台灣同學會，一個是台灣留學生組成ê ，叫做哈佛ROC同學會(HROCSC)，號稱是哈佛上大ê 台灣同學會，聽講有歸百人，大部份是來公共衛生學院短期進修ê ，koh 有少數讀設計學院ê ，讀其他ê 真少。我抵來ê 時，希望會當為台灣來ê 留學生開台語文閱讀班。到處探聽，討著in ê email住址，寫批hō͘ in ，攏無回；講希望會當去參加in ê 迎新會，無beh tshap 我；講希望會當加入in ê 電子批名單，以後若有活動希望接著通知，無消無息。這個同學會以前有可能就是中國同學會，以前馬英九可能就是會員，民視報導我tī 哈佛開台語課ê 時，同時有去採訪伊，伊講真好，當初時若有人開台語課，伊一定去修。結果，我開台語課，無半個馬英九來修。 M̄ 是講攏無台灣來ê 學生來修。Tī 中級班，有一個讀電腦ê 博士生；初級班有一個客家人，讀設計碩士班。

其他多數來自另外彼個台灣同學會，第二代台美人ê 同學會。in ê 英文名叫做 Taiwan Culture Society，漢字名堂堂叫做『台灣同學會』。其他學校ê 台灣同學會攏是台灣來ê 留學生組成ê 。遮以前聽講嘛有這款有台灣意識ê 台灣留學生ê 組織，叫做『哈佛台灣研究社』，舊年tō 無teh 活動ah 。會長是一個查某囡仔，有人去kā 招，伊講會曉講tō 好，免學讀寫，無來。

按呢算起來，第二代台美人這個同學會是哈佛唯一ê 台灣同學會。

我足愛in T-shirt 頂高印ê 彼句話。除了漢字『台灣同學會』及英文名以外，in 特別印一句英文：A small island with big family。確實有影，台灣雖然是小島，m̄-koh 是大家庭，幾若代同堂，有12族南島語原住民，有漢化ê 平埔族，有Holo人，客人，koh 有新住民。

台灣同學會邀請我每隔禮拜拜四去參in 做夥食暗頓，參in 講台灣話，in 叫做 Taiwanese Table。Berkeley 及 Mitsigan 大學ê 第二代台美人嘛攏有Taiwanese Table，不過聽講攏講英語ah 。我因為時常出外，bē 當hiah-nih tsiâu 勻，有時koh 抵著放假，所以這學期kan-na 去三遍。in 攏約tī Quincy Hall 宿舍ê 餐廳，特別先去佔一間小房間，大家捧菜來做夥食。哈佛ê 學生大一一定愛tuà 宿舍，大二開始會使搬出去，不過宿舍真四是，koh khah 俗外口，所以若會當，攏beh 留leh 。每個宿舍家己有餐廳，學生註冊ê 時tō 有納飯錢，攏是buffe，據在你食ê ，嘛會使去別間宿舍ê 餐廳食。若tshuā 教授來，登記一下，簽一下名著會使，免另外交錢。食物算是真豐富，主食以外，salad bar 有二排，koh 有飲料、咖啡、甜點、冰淇淋。學生逐工食可能嘛是食厭ah ，看in 攏食真少。人數有tsiâⁿ 十個，大部份有修台語課，無修ê ，其中有人會曉講台語，有人攏bē 曉。In 有問我beh 用甚物方式進行，我建議用開講ê 方式khah 適當，嘛khah 輕鬆，對消化khah 好。我就一方面食，一方面開講，講笑話hō͘ in 聽，有人聽無，我koh 用英語翻譯，有時嘛有人會替我先翻譯。嘛是有人問真嚴肅ê 問題，比如問我台語文及台獨ê 關係等等。台語課ê 學生借機會練習幾句仔上課學ê 話。in 之間ê 對話嘛是用英語。我想我若無來，in 這個台語飯桌可能嘛是tshun 英語。M̄ 知in 會當規定: 拜四台語飯桌kan-na 會使講台語，若講英語愛罰錢。Tī 美國大漢ê 囡仔可能bē 有這款想法。

M̄ 知tī 美國ê 台灣人食飯ê 時參囡仔攏講甚物話？我想可能嘛是tuè 囡仔講英語khah 大部分，看第二代ê 囡仔攏bē 曉講台語著知ah 。秋雄兄in 兜是要求囡仔食飯愛講台語，囡仔後來攏會曉講台語，koh 攏足有台灣意識，tī 運動上嘛真活動。In 囡仔bat kā 我偷講，細漢ê 時，食暗頓是真痛苦ê 代誌，因為kan-na 會使講台語，in 台語koh 足bē liàn 轉。

我ê 囡仔自細漢我攏kā 騙講我kan-na 聽有台灣話，愛參我講台語我才聽有，才會kā 應，若是in 媽媽，khah gâu ，會曉華語，參伊講華語伊聽有。所以阮囡仔食飯ê 時，ua̍t 向我，講台語，ua̍t 過in 媽媽彼旁，換華語。Bat 參我講華語，看我攏無kā 應，隨講：『失禮，伊ua̍t m̄ 著旁。』

我m̄ 捌kā 問伊按呢ua̍t 來ua̍t 去講無仝話會艱苦bē ，不過我bat kā 問講我hiah-ni̍h堅持騙伊講台語，hō͘ 伊tsit-mái 會曉講，koh 會曉讀寫，tio̍h m̄ tio̍h ？伊kā 我thìm 頭。

哈佛遮ê 囡仔 ê 台語飯桌，若會當自細漢開始，m̄ 知偌好！

2001/12/10

（Tsit篇本底是《哈佛台語筆記》輯一 Joornal•筆記－哈佛校園聽著台語 ê 鐘聲;第 11 篇）